Read Gobaith i Gymru Diarhebion 31 Bible Online

Diarhebion 31 - Gobaith i Gymru bible

Diarhebion 31

¹Y pethau ddysgodd Lemwel, brenin Massa [26], gan ei fam:

²O fy mab! O blentyn annwyl fy nghroth! Y mab wnes i ei gyflwyno i Dduw!

³Paid gwastraffu dy nerth i gyd ar ferched, a rhoi dy holl egni i'r rhai sy'n dinistrio brenhinoedd.

⁴O Lemwel, ddylai brenhinoedd ddim yfed gwin, ac arweinwyr ddim ysu am gwrw,

⁵rhag iddyn nhw yfed ag anghofio'r deddfau, a sathru ar hawliau'r tlodion.

⁶Rhowch ddiod feddwol i'r rhai sy'n marw a gwin i'r un sy'n diodde'n chwerw.

⁷Gadewch iddyn nhw yfed i anghofio'u tlodi, a fydd dim rhaid iddyn nhw gofio'u trafferthion.

⁸Siarad ar ran y bobl hynny sydd heb lais, ac amddiffyn y rhai sydd wedi colli popeth.

⁹Coda dy lais o'u plaid nhw, barna'n gyfiawn, a dadlau dros hawliau'r rhai mewn angen a'r tlawd.

¹⁰Pwy sy'n gallu dod o hyd i wraig dda? Mae hi'n fwy gwerthfawr na gemau.

¹¹Mae ei gŵr yn ymddiried ynddi'n llwyr, ac ar ei ennill bob amser.

¹²Mae hi'n dda iddo bob amser, a byth yn gwneud drwg.

¹³Mae hi'n edrych am wlân a defnydd arall ac yn mwynhau gweu a gwnïo.

¹⁴Mae hi fel fflyd o longau masnach yn cario bwyd o wledydd pell.

¹⁵Mae hi'n codi yn yr oriau mân, i baratoi bwyd i'w theulu, a rhoi gwaith i'w morynion.

¹⁶Mae hi'n meddwl yn ofalus cyn prynu cae, a defnyddio'i harian i blannu gwinllan ynddo.

¹⁷Mae hi'n bwrw iddi'n frwd, ac yn gweithio'n galed.

¹⁸Mae hi'n gwneud yn siŵr fod ei busnes yn llwyddo; dydy ei lamp ddim yn diffodd drwy'r nos.

¹⁹Mae hi'n brysur yn nyddu â'i dwylo, a'i bysedd yn trin y gwlân.

²⁰Mae hi'n rhoi yn hael i'r tlodion; ac yn helpu pwy bynnag sydd mewn angen.

²¹Dydy hi ddim yn poeni am ei theulu pan ddaw eira, am fod digon o ddillad cynnes ganddyn nhw.

²²Mae hi'n gwneud cwiltiau i'r gwely, a dillad o liain main drud.

²³Mae ei gŵr yn adnabyddus ar gyngor y ddinas, ac yn eistedd gyda'r arweinwyr i gyd.

²⁴Mae hi'n gwneud defnydd i'w werthu, a dillad i'r masnachwyr eu prynu.

²⁵Mae hi'n wraig o gymeriad cryf ac urddasol, ac yn edrych ymlaen i'r dyfodol yn hyderus.

²⁶Mae hi'n siarad yn ddoeth bob amser, ac yn garedig wrth ddysgu eraill.

²⁷Mae hi'n gofalu am y teulu i gyd, a dydy hi byth yn segur.

²⁸Mae ei phlant yn tyfu ac yn meddwl y byd ohoni; ac mae ei gŵr yn ei chanmol i'r cymylau,

²⁹“Mae yna lawer o ferched da i'w cael, ond rwyt ti'n well na nhw i gyd.”

³⁰Mae prydferthwch yn gallu twyllo, a harddwch yn arwynebol. Gwraig sy'n parchu'r ARGLWYDD sydd yn haeddu cael ei chanmol.

³¹Rhowch glod iddi am beth mae wedi ei gyflawni, a boed i arweinwyr y ddinas ei chanmol am ei gwaith.