Read Gobaith i Gymru Diarhebion 4 Bible Online

Diarhebion 4 - Gobaith i Gymru bible

Diarhebion 4

¹Blant, clywch beth mae'ch tad yn ei ddysgu i chi. Gwrandwch, i chi ddysgu sut i fod yn ddoeth.

²Dw i'n dysgu beth sy'n dda, felly peidiwch troi cefn ar beth dw i'n ddweud.

³Roeddwn i'n blentyn ar un adeg, yn unig blentyn, ac yn annwyl iawn yng ngolwg mam.

⁴Roedd dad yn fy nysgu i, ac yn dweud wrtho i, “Dal dy afael yn yr hyn dw i'n ddweud; Gwna beth dw i'n ei orchymyn, i ti gael bywyd da.

⁵Mynna fod yn ddoeth, mynna ddeall yn iawn; paid anghofio, na throi cefn ar beth dw i'n ddweud.

⁶Paid troi cefn ar ddoethineb — bydd hi'n dy warchod di; os gwnei di ei charu, bydd hi'n dy amddiffyn di.

⁷Mynna fod yn ddoeth o flaen popeth arall! Petai'n costio popeth sydd gen ti — mynna ddeall.

⁸Os byddi'n meddwl yn uchel ohoni, bydd hi'n dy helpu di; cofleidia hi, a bydd hi'n dod ag anrhydedd i ti.

⁹Bydd yn gosod torch hardd ar dy ben; coron fydd yn dy anrhydeddu di.”

¹⁰Fy mab, gwrando'n ofalus ar beth dw i'n ddweud, a byddi di'n cael byw yn hir.

¹¹Dw i wedi dy ddysgu di i fod yn ddoeth; ac wedi dy osod di ar y llwybr iawn.

¹²Byddi'n cerdded yn dy flaen yn hyderus; byddi'n rhedeg heb faglu o gwbl.

¹³Dal yn dynn yn beth wyt ti'n ddysgu, paid gollwng gafael. Cadw'r cwbl yn saff — mae'n rhoi bywyd i ti!

¹⁴Paid dilyn llwybrau pobl ddrwg; paid mynd yr un ffordd â nhw.

¹⁵Cadw draw! Paid mynd yn agos! Tro rownd a mynd i'r cyfeiriad arall!

¹⁶Allan nhw ddim cysgu heb fod wedi gwneud drwg. Maen nhw'n colli cwsg os nad ydyn nhw wedi baglu rhywun.

¹⁷Drygioni ydy'r bara sy'n eu cadw nhw'n fyw, A thrais ydy'r gwin maen nhw'n ei yfed!

¹⁸Mae llwybr y rhai sy'n byw yn iawn yn ddisglair fel y wawr, ac yn goleuo fwyfwy nes mae'n ganol dydd.

¹⁹Ond mae ffordd pobl ddrwg yn dywyll; dŷn nhw ddim yn gwybod beth fydd yn eu baglu nhw.

²⁰Fy mab, gwrando ar beth dw i'n ddweud; gwrando'n astud ar fy ngeiriau.

²¹Paid colli golwg arnyn nhw; cadw nhw'n agos at dy galon.

²²Maen nhw'n rhoi bywyd i'r un sy'n eu cael, a iechyd i'r corff cyfan.

²³Gwarchod dy galon o flaen pob dim arall, achos dyna ffynhonnell dy fywyd.

²⁴Paid dweud celwydd; paid dweud pethau i dwyllo pobl.

²⁵Edrych yn syth o dy flaen, cadw dy olwg ar ble wyt ti'n mynd.

²⁶Gwylia'r ffordd rwyt ti'n mynd, a byddi'n gwneud y peth iawn.

²⁷Paid crwydro i'r dde na'r chwith; cadw draw oddi wrth beth sy'n ddrwg.