Read Gobaith i Gymru Diarhebion 5 Bible Online

Diarhebion 5 - Gobaith i Gymru bible

Diarhebion 5

¹Fy mab, clyw, dyma gyngor doeth i ti; gwrando'n ofalus ar beth dw i'n ddweud.

²Er mwyn i ti fynd y ffordd iawn, ac i dy eiriau bob amser fod yn ddoeth.

³Mae gwefusau'r wraig anfoesol yn diferu fel mêl, a'i geiriau hudol yn llyfn fel olew;

⁴Ond mae hi'n troi allan i fod yn chwerw fel y wermod, ac yn finiog fel cleddyf.

⁵Mae ei dilyn hi yn arwain at farwolaeth; mae ei chamau yn arwain i'r bedd.

⁶Dydy hi'n gwybod dim am fywyd go iawn; mae hi ar goll — a ddim yn sylweddoli hynny.

⁷Felly, fy mab, gwrando'n ofalus arna i, a paid troi cefn ar beth dw i'n ddweud.

⁸Cadw draw oddi wrthi hi! Paid mynd yn agos at ddrws ei thŷ hi,

⁹rhag i ti golli pob hunan-barch, ac i'w gŵr creulon gymryd dy fywyd oddi arnat ti.

¹⁰Rhag i bobl ddieithr lyncu dy gyfoeth di, ac i rywun arall gael popeth rwyt ti wedi gweithio'n galed amdano.

¹¹Wedyn byddi'n griddfan yn y diwedd, pan fydd dy gorff wedi ei ddifetha.

¹²Byddi'n dweud, “Pam wnes i gasáu disgyblaeth gymaint? Pam wnes i wrthod cymryd sylw o gerydd?

¹³Pam wnes i ddim gwrando ar fy athrawon, a chymryd sylw o'r rhai oedd yn fy nysgu i?

¹⁴Bu bron i bopeth chwalu'n llwyr i mi, a hynny o flaen pawb yn y gymdeithas.”

¹⁵Yfed ddŵr o dy ffynnon dy hun! Ei dŵr ffres hi a neb arall.

¹⁶Fyddet ti eisiau i ddŵr dy ffynnon di lifo allan i'r strydoedd?

¹⁷Na, cadw hi i ti dy hun, paid gadael i neb arall ei chael.

¹⁸Gad i dy ffynnon gael ei bendithio! Mwynha dy hun gyda'r wraig briodaist ti pan yn ifanc

¹⁹— dy ewig hyfryd, dy afr dlos. Gad i'w bronnau roi boddhad i ti, i ti ymgolli yn ei chariad bob amser.

²⁰Fy mab, pam gwirioni ar ferch anfoesol? Ydy anwesu bronnau gwraig rhywun arall yn iawn?

²¹Cofia fod Duw yn gweld popeth ti'n wneud. Mae'n gweld y cwbl, o'r dechrau i'r diwedd.

²²Bydd yr un sy'n gwneud drwg yn cael ei ddal gan ei ddrygioni! — bydd wedi ei rwymo gan raffau ei bechod ei hun.

²³Bydd yn marw am fod ganddo ddim disgyblaeth, ac wedi meddwi ar chwarae'r ffŵl.