Read Gobaith i Gymru Diarhebion 6 Bible Online

Diarhebion 6 - Gobaith i Gymru bible

Diarhebion 6

¹Fy mab, dywed dy fod wedi gwarantu benthyciad rhywun, ac wedi cytuno i dalu ei ddyledion.

²Os wyt mewn picil, wedi dy ddal gan dy eiriau ac wedi dy rwymo gan beth ddwedaist ti,

³dyma ddylet ti ei wneud i ryddhau dy hun (achos rwyt ti wedi chwarae i ddwylo'r person arall): Dos ato i bledio am gael dy ryddhau. Dos, a'i blagio!

⁴Paid oedi! — Dim cwsg na gorffwys nes bydd y mater wedi ei setlo.

⁵Achub dy hun, fel carw yn dianc rhag yr heliwr, neu aderyn yn dianc o law'r adarwr.

⁶Ti'r diogyn, edrych ar y morgrugyn; astudia ei ffyrdd, a dysga sut i fod yn ddoeth.

⁷Does ganddo ddim arweinydd, swyddog, na rheolwr,

⁸ac eto mae'n mynd ati i gasglu bwyd yn yr haf, a storio'r hyn sydd arno'i angen adeg y cynhaeaf.

⁹Am faint wyt ti'n mynd i orweddian yn dy wely, y diogyn? Pryd wyt ti'n mynd i ddeffro a gwneud rhywbeth?

¹⁰“Ychydig bach mwy o gwsg, pum munud arall! Swatio'n gyfforddus yn y gwely am ychydig.”

¹¹Ond bydd tlodi yn dy daro di fel lleidr creulon; bydd prinder yn ymosod arnat ti fel milwr arfog!

¹²Dydy'r un sy'n mynd o gwmpas yn twyllo, yn ddim byd ond cnaf drwg!

¹³Mae'n wincio ar bobl drwy'r adeg, mae ei draed yn aflonydd, ac mae'n pwyntio bys at bawb.

¹⁴Ei unig fwriad ydy creu helynt! Mae o hyd eisiau dechrau ffrae.

¹⁵Bydd trychineb annisgwyl yn ei daro! Yn sydyn bydd yn torri, a fydd dim gwella arno!

¹⁶Dyma chwe peth mae'r ARGLWYDD yn eu casáu; ac un arall sy'n ffiaidd ganddo:

¹⁷llygaid balch, tafod celwyddog, dwylo sy'n tywallt gwaed pobl ddiniwed,

¹⁸calon sy'n cynllwynio drwg, traed sy'n brysio i wneud drwg,

¹⁹tyst sy'n dweud celwydd, a rhywun sy'n dechrau ffrae mewn teulu.

²⁰Fy mab, gwna beth orchmynodd dy dad i ti; paid troi dy gefn ar beth ddysgodd dy fam i ti.

²¹Cadw nhw ar flaen dy feddwl bob amser; gwisga nhw fel cadwyn am dy wddf.

²²Ble bynnag fyddi di'n mynd, byddan nhw'n dy arwain di; pan fyddi'n gorwedd i orffwys, byddan nhw'n edrych ar dy ôl di; pan fyddi di'n deffro, byddan nhw'n rhoi cyngor i ti.

²³Mae gorchymyn fel lamp, a dysgeidiaeth fel golau, ac mae cerydd a disgyblaeth yn arwain i fywyd.

²⁴Bydd yn dy gadw rhag y ferch ddrwg, a rhag y wraig anfoesol.

²⁵Paid gadael i'r awydd i'w chael hi afael ynot ti, na gadael iddi hi dy drapio di drwy fflyrtian â'i llygaid.

²⁶Mae putain yn dy adael gyda dim ond torth o fara; ond mae gwraig dyn arall yn cymryd popeth — gall gostio dy fywyd!

²⁷Ydy dyn yn gallu cario marwor poeth yn ei boced heb losgi ei ddillad?

²⁸Ydy dyn yn gallu cerdded ar farwor heb losgi ei draed?

²⁹Mae cysgu gyda gwraig dyn arall yr un fath; does neb sy'n gwneud hynny yn osgoi cael ei gosbi.

³⁰Does neb yn dirmygu lleidr sy'n dwyn am fod eisiau bwyd arno;

³¹Ond os ydy e'n cael ei ddal, rhaid iddo dalu'n llawn; bydd yn colli popeth sydd ganddo.

³²Does gan y rhai sy'n godinebu ddim sens o gwbl; dim ond rhywun sydd am ddinistrio'i hun sy'n gwneud peth felly.

³³Bydd yn cael ei guro a'i gam-drin; a fydd y cywilydd byth yn ei adael.

³⁴Bydd gŵr y wraig yn wyllt gynddeiriog; fydd e'n dangos dim trugaredd pan ddaw'r cyfle i ddial.

³⁵Fydd e ddim yn fodlon ystyried unrhyw iawndal; bydd yn gwrthod dy arian, faint bynnag wnei di ei gynnig iddo.