Read Gobaith i Gymru Diarhebion 7 Bible Online

Diarhebion 7 - Gobaith i Gymru bible

Diarhebion 7

¹Fy mab, gwna beth dw i'n ddweud; a thrysori'r hyn dw i'n ei orchymyn.

²Gwna beth dw i'n ei orchymyn, i ti gael bywyd da; paid tynnu dy lygad oddi ar beth dw i'n ddysgu.

³Cadw nhw fel modrwy ar dy fys; ysgrifenna nhw ar lech dy galon.

⁴Dywed wrth ddoethineb, “Ti fel chwaer i mi,” a gwna gyngor doeth yn ffrind gorau.

⁵Bydd yn dy warchod di rhag y wraig anfoesol; rhag yr un llac ei moesau sy'n fflyrtian drwy'r adeg.

⁶Roeddwn i'n sefyll yn y tŷ, ac yn edrych allan o'r ffenest.

⁷Gwelais fachgen ifanc a dim sens ganddo gyda chriw gwyllt o bobl ifanc.

⁸Roedd yn croesi'r stryd at y groesffordd sy'n arwain at ei thŷ hi.

⁹Roedd hi'n hwyr yn y dydd, ac yn dechrau nosi a thywyllu.

¹⁰Yn sydyn dyma'r wraig yn dod allan i'w gyfarfod, wedi ei gwisgo fel putain — roedd ei bwriad hi'n amlwg.

¹¹(Dynes swnllyd, ddigywilydd, sydd byth yn aros adre.

¹²Ar y stryd un funud, ar y sgwâr y funud nesa, yn loetran ar bob cornel.)

¹³Mae hi'n gafael yn y bachgen a'i gusanu, ac yn dweud yn bowld:

¹⁴“Tyrd, mae gen i fwyd adre — cig yr offrwm rois i; dw i wedi gwneud popeth oedd ei angen.

¹⁵A dyma fi, wedi dod allan i dy gyfarfod di — roeddwn i'n edrych amdanat ti, a dyma ti!

¹⁶Dw i wedi paratoi'r gwely! Mae yna gynfasau glân arno, a chwilt lliwgar hyfryd o'r Aifft.

¹⁷Mae'n arogli'n hyfryd o bersawr — myrr, aloes, a sinamon.

¹⁸Tyrd, gad i ni ymgolli mewn pleserau rhywiol; mwynhau ein hunain yn caru drwy'r nos.

¹⁹Dydy'r gŵr ddim adre — mae e wedi mynd ar daith bell.

²⁰Mae e wedi mynd gyda'i arian, ar fusnes, a fydd e ddim yn ôl tan ddiwedd y mis.”

²¹Dyma hi'n llwyddo i'w berswadio; roedd wedi ei ddenu gyda'i fflyrtian.

²²Dyma'r llanc yn mynd ar ei hôl ar unwaith, fel ych yn mynd i'r lladd-dy, neu garw yn neidio i drap

²³cyn i saeth ei drywanu! Roedd fel aderyn wedi hedfan yn syth i'r rhwyd, heb sylweddoli ei fod yn mynd i golli ei fywyd.

²⁴Nawr gwrandwch arna i, fechgyn; gwrandwch yn ofalus ar beth dw i'n ddweud:

²⁵Peidiwch hyd yn oed meddwl amdani; peidiwch mynd yn agos ati.

²⁶Mae hi wedi achosi i lawer un syrthio; mae yna fyddin o ddynion cryf wedi diodde!

²⁷Mae ei thŷ hi yn draffordd i'r bedd, a'i ystafell wely yn siambr marwolaeth!