Read Gobaith i Gymru Diarhebion 9 Bible Online

Diarhebion 9 - Gobaith i Gymru bible

Diarhebion 9

¹Mae Doethineb wedi adeiladu ei thŷ; ac mae wedi naddu saith colofn iddo.

²Mae hi wedi paratoi gwledd, cymysgu'r gwin, a gosod y bwrdd.

³Mae hi wedi anfon ei morynion allan i alw ar bobl drwy'r dre.

⁴Mae'n dweud wrth bobl sy'n brin o synnwyr cyffredin, “Dewch yma, chi bobl wirion!

⁵Dewch i fwyta gyda mi, ac yfed y gwin dw i wedi ei gymysgu.

⁶Stopiwch fod mor ddwl, i chi gael byw; dechreuwch gerdded ffordd gall.”

⁷Ceisia gywiro rhywun balch sy'n gwawdio a cei lond ceg! Cerydda rhywun drwg a byddi'n cael dy gam-drin.

⁸Cerydda'r un balch sy'n gwawdio, a bydd yn dy gasáu di; ond os gwnei di geryddu'r doeth bydd e'n diolch i ti.

⁹Rho gyngor i'r doeth, a byddan nhw'n ddoethach; dysga'r rhai sy'n byw yn iawn a byddan nhw'n dysgu mwy.

¹⁰Parchu'r ARGLWYDD ydy'r cam cyntaf i fod yn ddoeth, ac mae nabod yr Un Sanctaidd yn rhoi deall.

¹¹Trwof fi byddi di'n cael byw yn hir; byddi'n cael blynyddoedd ychwanegol.

¹²Os wyt ti'n ddoeth, mae hynny'n beth da i ti; ond os wyt ti'n falch, ti fydd yn wynebu'r canlyniadau.

¹³Mae'r wraig arall, sef Ffolineb, yn gwneud lot o sŵn; mae hi'n wirion, ac yn deall dim byd.

¹⁴Mae hi'n eistedd wrth ddrws ei thŷ, neu ar fainc mewn lle amlwg yn y dre.

¹⁵Mae hi'n galw ar y rhai sy'n pasio heibio ac yn meindio eu busnes eu hunain.

¹⁶Mae'n dweud wrth bobl sy'n brin o synnwyr cyffredin, “Dewch yma, chi bobl wirion!

¹⁷Mae dŵr sydd wedi ei ddwyn yn felys; a bara sy'n cael ei fwyta ar y slei yn flasus!”

¹⁸Ond dŷn nhw ddim yn sylweddoli mai byd yr ysbrydion sydd y ffordd yna, a bod y rhai dderbyniodd ei gwahoddiad yn gwledda yn y bedd!