Read Gobaith i Gymru Y Pregethwr 1 Bible Online

Y Pregethwr 1 - Gobaith i Gymru bible

Y Pregethwr 1

¹Geiriau yr Athro, mab Dafydd; brenin yn Jerwsalem.

²Mae'n ddiystyr! — meddai'r Athro — dydy e'n gwneud dim sens! Mae'r cwbl yn hollol abswrd!

³Beth ydy'r pwynt gwneud unrhyw beth? Beth sydd i'w ennill o weithio'n galed yn y byd yma?

⁴Mae un genhedlaeth yn mynd, ac un arall yn dod, ond dydy'r byd ddim yn newid o gwbl.

⁵Mae'r haul yn codi ac yn machlud, yna rhuthro'n ôl i'r un lle, i godi eto.

⁶Mae'r gwynt yn chwythu i'r de, ac yna'n troi i'r gogledd. Mae'n troi ac yn troi, cyn dod yn ôl i'r un lle yn y diwedd.

⁷Mae'r nentydd i gyd yn llifo i'r môr, ac eto dydy'r môr byth yn llawn; maen nhw'n mynd yn ôl i lifo o'r un lle eto.

⁸Mae'r cwbl yn un cylch diddiwedd! Dydy hi ddim posib dweud popeth. Dydy'r llygad byth wedi gweld digon, na'r glust wedi clywed nes ei bod yn fodlon.

⁹Fydd dim yn wahanol yn y dyfodol — Yr un pethau fydd yn cael eu gwneud ac o'r blaen; Does dim byd newydd dan yr haul!

¹⁰Weithiau mae pobl yn dweud am rywbeth, “Edrychwch, dyma i chi beth newydd!” Ond mae wedi digwydd o'r blaen, ymhell yn ôl, o flaen ein hamser ni.

¹¹Does neb yn cofio pawb sydd wedi mynd, a fydd neb yn y dyfodol yn cofio pawb aeth o'u blaenau nhw chwaith.

¹²Roeddwn i, yr Athro, yn frenin ar wlad Israel yn Jerwsalem.

¹³Dyma fi'n mynd ati o ddifrif i astudio ac edrych yn fanwl ar bopeth sy'n digwydd yn y byd. Mae'n waith caled, wedi ei roi gan Dduw i'r ddynoliaeth.

¹⁴Edrychais ar bopeth oedd yn cael ei wneud ar y ddaear, a dod i'r casgliad fod dim atebion slic — mae fel ceisio rheoli'r gwynt:

¹⁵Does dim modd sythu rhywbeth sydd wedi ei blygu, na chyfrif rhywbeth sydd ddim yna!

¹⁶Meddyliais, “Dw i'n fwy llwyddiannus ac yn ddoethach na neb sydd wedi teyrnasu yn Jerwsalem o'm blaen i. Mae gen i ddoethineb a gwybodaeth.”

¹⁷Dyma fi'n mynd ati o ddifrif i geisio deall gwerth doethineb, a deall pam mae pobl yn gwneud pethau mor hurt a ffôl. Ond dw i wedi dod i'r casgliad ei bod yn dasg amhosib, fel ceisio rheoli'r gwynt:

¹⁸Po fwya'r doethineb, mwya'r dolur; mae gwybod mwy yn arwain i fwy o boen calon.