Read Gobaith i Gymru Y Pregethwr 3 Bible Online

Y Pregethwr 3 - Gobaith i Gymru bible

Y Pregethwr 3

¹Mae amser wedi ei bennu i bopeth, amser penodol i bopeth sy'n digwydd yn y byd:

²Amser i gael eich geni ac amser i farw, Amser i blannu ac amser i godi beth blannwyd;

³Amser i ladd ac amser i iacháu, Amser i chwalu rhywbeth ac amser i adeiladu;

⁴Amser i wylo ac amser i chwerthin, Amser i alaru ac amser i ddawnsio;

⁵Amser i daflu cerrig i ffwrdd ac amser i gasglu cerrig, Amser i gofleidio ac amser i beidio cofleidio;

⁶Amser i chwilio ac amser i dderbyn fod rhywbeth ar goll, Amser i gadw rhywbeth ac amser i daflu i ffwrdd;

⁷Amser i rwygo ac amser i bwytho, Amser i gadw'n dawel ac amser i siarad;

⁸Amser i garu ac amser i gasáu; Amser i ryfel ac amser i heddwch.

⁹Felly beth mae'r gweithiwr yn ei ennill ar ôl ei holl ymdrech?

¹⁰Dw i wedi ystyried yr holl bethau mae Duw wedi eu rhoi i bobl eu gwneud:

¹¹Mae Duw'n gwneud i bopeth ddigwydd yn berffaith ar yr amser iawn. Mae hefyd wedi gwneud pobl yn ymwybodol o'r tragwyddol, ond dydy pobl ddim yn gallu darganfod popeth mae Duw'n bwriadu ei wneud yn ystod eu bywydau.

¹²Felly des i'r casgliad mai'r peth gorau all pobl ei wneud ydy bod yn hapus a mwynhau eu hunain tra byddan nhw byw.

¹³Rhodd Duw i bawb ydy iddyn nhw fwyta ac yfed a mwynhau eu holl weithgareddau.

¹⁴Des i'r casgliad hefyd fod popeth mae Duw yn ei wneud yn aros am byth: Does dim modd ychwanegu ato, na thynnu dim oddi wrtho. Mae Duw wedi gwneud pethau fel hyn er mwyn i bobl ei barchu.

¹⁵“Mae popeth a fu yn dal i fod, a popeth fydd fel popeth sydd. Mae Duw'n gwneud eto beth sydd wedi mynd heibio.”

¹⁶Peth arall dw i'n ei weld o hyd ac o hyd: Lle byddwn i'n disgwyl cyfiawnder a thegwch mae drygioni!

¹⁷Meddyliais, “Bydd Duw yn barnu'r bobl sy'n gwneud beth sy'n iawn a'r rhai sy'n gwneud drygioni. Mae amser wedi ei bennu i bopeth, a bydd pob gweithred yn cael ei barnu.”

¹⁸Wedyn meddyliais, “Mae Duw yn gwneud i bobl weld eu bod nhw ddim gwell nag anifeiliaid.”

¹⁹Mae tynged pobl ac anifeiliaid yn union yr un fath: mae'r naill a'r llall yn marw, a'r un anadl sy'n eu cadw nhw'n fyw. Dydy pobl ddim gwell nag anifeiliaid. Dydy e'n gwneud dim sens!

²⁰Mae'r ddau yn mynd i'r un lle yn y pen draw; mae'r ddau wedi dod o'r pridd ac yn mynd yn ôl i'r pridd. [1†]

²¹Does neb wir yn gwybod fod ysbryd pobl yn codi i fyny, ac ysbryd anifeiliaid yn mynd i lawr i'r ddaear.

²²Felly des i'r casgliad mai'r peth gorau all rhywun ei wneud ydy mwynhau ei waith. Dyna ei unig wobr. Pwy ŵyr beth fydd yn digwydd ar ôl iddo farw?