Read Gobaith i Gymru Caniad Solomon 1 Bible Online

Caniad Solomon 1 - Gobaith i Gymru bible

Caniad Solomon 1

¹Cân serch orau Solomon.

²[1] Tyrd, cusana fi drosodd a throsodd! Mae dy anwesu cariadus yn well na gwin,

³ac arogl dy bersawr mor hyfryd. Rwyt fel yr olew persawrus gorau — does dim syndod fod merched ifanc yn dy garu di.

⁴Tyrd, cymer fi gyda ti; gad i ni frysio! Fy mrenin, dos â fi i dy ystafell wely. Gad i ni fwynhau a chael pleser; mae profi gwefr dy gyffyrddiad yn well na gwin. [2] Mae'n ddigon teg fod merched ifanc yn dy garu di.

⁵Ferched Jerwsalem, Mae fy nghroen yn ddu ond dw i'n hardd — yn dywyll fel pebyll duon pobl Cedar [3], a hardd fel llenni palas Solomon.

⁶Peidiwch syllu arna i am fy mod yn ddu a'r haul wedi rhoi croen tywyll i mi. Roedd fy mrodyr wedi gwylltio gyda mi, a gwneud i mi ofalu am y gwinllannoedd; ond methais ofalu amdana i fy hun.

⁷Fy nghariad, dywed wrtho i, Ble rwyt ti'n arwain dy ddefaid? Ble fyddan nhw'n gorffwys ganol dydd? Dywed wrtho i, rhag i mi orfod gwisgo fêl a chrwydro o gwmpas preiddiau dy ffrindiau.

⁸O'r harddaf o ferched! Os nad wyt yn gwybod, dilyn olion traed y praidd a bwyda dy eifr wrth wersyll y bugeiliaid.

⁹F'anwylyd, rwyt fel y gaseg ifanc harddaf sy'n tynnu cerbydau'r Pharo.

¹⁰Mae tlysau ar dy fochau hardd, a chadwyn o emau hyfryd am dy wddf.

¹¹Dw i am roi tlysau aur i ti, wedi eu haddurno ag arian.

¹²Tra roedd fy mrenin yn gorwedd ar ei wely, roedd arogl fy mhersawr yn llenwi'r awyr.

¹³Mae fy nghariad fel cwdyn o fyrr hyfryd yn gorwedd trwy'r nos rhwng fy mronnau.

¹⁴Mae fy nghariad fel tusw o flodau henna o winllannoedd ffrwythlon En-gedi. [4]

¹⁵O, rwyt mor hardd f'anwylyd! O, rwyt mor hardd! Mae dy lygaid fel colomennod.

¹⁶O, rwyt mor olygus fy nghariad — ac mor hyfryd! Mae'r gwyrddni fel canopi o'n cwmpas yn gorchuddio'n gwely.

¹⁷Mae canghennau'r coed cedrwydd fel trawstiau'n y to uwch ein pen; a'r coed pinwydd fel paneli.