Read Gobaith i Gymru Caniad Solomon 3 Bible Online

Caniad Solomon 3 - Gobaith i Gymru bible

Caniad Solomon 3

¹Wrth orwedd ar fy ngwely'n y nos byddai gen i hiraeth am fy nghariad; dyheu am ei gwmni, ond methu ei gael.

²“Dw i'n mynd i godi i edrych amdano'n y dre — crwydro'r strydoedd a'r sgwariau yn chwilio am fy nghariad.” Dyheu am ei gwmni, ond methu ei gael.

³Dyma'r gwylwyr nos yn fy ngweld wrth grwydro ar batrôl o gwmpas y dre. Gofynnais, “Welsoch chi fy nghariad?”

⁴Prin roeddwn wedi eu pasio pan ddes i o hyd i'm cariad! Gafaelais ynddo'n dynn a gwrthod ei ollwng nes mynd ag e i dŷ fy mam, i'w hystafell wely.

⁵Ferched Jerwsalem, dw i'n pledio arnoch o flaen y gasél a'r ewig gwyllt: Peidiwch trïo cyffroi cariad rhywiol nes mae'n barod.

⁶Beth sy'n dod o gyfeiriad yr anialwch, yn codi llwch fel colofnau o fwg? Fel mwg yr arogldarth yn codi o'r allor — myrr a thus a phob powdr persawrus sydd ar werth gan fasnachwyr teithiol.

⁷Edrychwch! Soffa-gludo Solomon ydy hi! Mae chwe deg o filwyr o'i gwmpas — arwyr dewr Israel.

⁸Mae gan bob un ei gleddyf yn barod, ac maen nhw wedi eu hyfforddi i ryfela. Mae cleddyf pob un ar ei glun i'w amddiffyn rhag peryglon y nos.

⁹Mae gan Solomon gadair gludo wedi ei gwneud o goed o Libanus.

¹⁰Mae ei pholion o arian a'i ffrâm o aur; ei sedd o ddefnydd porffor a'r tu mewn wedi ei addurno â chariad.

¹¹Ferched Jerwsalem, dewch allan! Dewch ferched Seion i syllu ar Solomon yn gwisgo'r goron gafodd gan ei fam ar ddiwrnod ei briodas — diwrnod hapusaf ei fywyd!