Read Gobaith i Gymru Caniad Solomon 4 Bible Online

Caniad Solomon 4 - Gobaith i Gymru bible

Caniad Solomon 4

¹O, rwyt mor hardd f'anwylyd! O, rwyt mor hardd! Mae dy lygaid fel colomennod y tu ôl i'r fêl. Mae dy wallt du yn llifo fel praidd o eifr yn dod i lawr o fynydd Gilead.

²Mae dy ddannedd yn wyn fel rhes o ddefaid newydd eu cneifio a'u golchi. Maen nhw i gyd yn berffaith [5]; does dim un ar goll.

³Mae dy wefusau fel edau goch, a'th geg mor siapus. Tu ôl i'r fêl mae dy fochau a'u gwrid fel pomgranadau.

⁴Mae dy wddf fel tŵr Dafydd a'r rhesi o gerrig o'i gwmpas; mil o darianau yn hongian arno, fel arfau milwyr arwrol.

⁵Mae dy fronnau yn berffaith fel dwy gasél ifanc, efeilliaid yn pori ymysg y lilïau.

⁶Rhaid i mi fynd a dringo mynydd myrr a bryn thus, ac aros yno hyd nes iddi wawrio ac i gysgodion y nos ddiflannu. [6†]

⁷Mae popeth amdanat mor hardd f'anwylyd! Ti'n berffaith!

⁸Tyrd gyda mi o Libanus, fy nghariad, tyrd gyda mi o fryniau Libanus. Tyrd i lawr o gopa Amana, o ben Senir, sef copa Hermon [7†]; Tyrd i lawr o ffeuau'r llewod a lloches y llewpard.

⁹Ti wedi cipio fy nghalon, ferch annwyl, fy nghariad. Ti wedi cipio fy nghalon gydag un edrychiad, un em yn dy gadwyn.

¹⁰Mae dy gyffyrddiad mor hyfryd, ferch annwyl, fy nghariad. Mae dy anwesu cariadus gymaint gwell na gwin, ac arogl dy bersawr yn well na pherlysiau.

¹¹Mae dy gusan yn felys fy nghariad, yn diferu fel diliau mêl. Mae mêl a llaeth dan dy dafod, ac mae sawr dy ddillad fel persawr Libanus.

¹²Fy merch annwyl, fy nghariad — rwyt fel gardd breifat dan glo; yn ffynnon gaiff neb yfed ohoni.

¹³Rwyt yn ardd baradwysaidd o bomgranadau, yn llawn o'r ffrwyth gorau. Gardd bersawrus hudolus o henna hyfryd,

¹⁴nard a saffrwn, sbeisiau pêr a sinamon thus o wahanol fathau, myrr ac aloes — pob un o'r perlysiau drutaf.

¹⁵Ti ydy'r ffynnon yn yr ardd — ffynnon o ddŵr glân gloyw yn llifo i lawr bryniau Libanus.

¹⁶Deffra, wynt y gogledd; tyrd, wynt y de! Chwytha ar fy ngardd i ledu sawr ei pherlysiau. Tyrd i mewn i dy ardd fy nghariad, a gwledda ar ei ffrwyth gorau.