Read Gobaith i Gymru Caniad Solomon 5 Bible Online

Caniad Solomon 5 - Gobaith i Gymru bible

Caniad Solomon 5

¹Dw i'n dod i'm gardd, ferch annwyl, fy nghariad — i gasglu fy myrr a'm perlysiau, i flasu y diliau a'r mêl, ac i yfed y gwin a'r llaeth. Mwynhewch y wledd gariadon! Yfwch a meddwi ar anwesu a charu!

²Roeddwn yn gorffwys, ond roedd fy meddwl yn effro. Ust! Llais fy nghariad; mae'n curo — “Agor i mi ddod i mewn, f'anwylyd, fy nghariad, fy ngholomen berffaith. Mae fy ngwallt yn wlyb gan wlith, a'm pen yn llaith gan niwl y nos.”

³“Ond dw i'n noeth, heb ddim amdana i. Ti am i mi wisgo eto wyt ti? A dw i wedi golchi fy nhraed [8]. Oes rhaid i mi eu baeddu eto?”

⁴Yna gwthiodd ei law i agor y drws, [9] a teimlais wefr yn mynd trwyddo i.

⁵Codais i'w adael i mewn; roedd fy nwylo'n diferu o fyrr — roedd y myrr yn llifo i lawr fy mysedd pan afaelais yn yr handlen.

⁶Agorais y drws i'm cariad, ond roedd e wedi troi a mynd! Suddodd fy nghalon o'm mewn pan aeth. Chwiliais amdano, ond methu ei gael; Gelwais arno, ond doedd dim ateb.

⁷Dyma'r gwylwyr nos yn fy ngweld wrth grwydro ar batrôl o gwmpas y dre. Dyma nhw'n fy nghuro a'm cam-drin, a rhwygo fy nghlogyn oddi arna i — y gwylwyr nos oedd yn gwarchod waliau'r ddinas!

⁸Ferched Jerwsalem, gwrandwch — Os dewch chi o hyd i'm cariad, dwedwch wrtho mod i'n glaf o gariad.

⁹O'r harddaf o ferched, beth sy'n gwneud dy gariad yn well na dynion eraill? Beth sy'n gwneud dy gariad yn well na dynion eraill, i ti grefu mor daer â hyn?

¹⁰Mae nghariad yn ffit ac yn iach; mae'n sefyll allan yng nghanol y dyrfa.

¹¹Mae ei wyneb a'i wedd fel aur pur, a'i wallt cyrliog yn ddu fel y frân.

¹²Mae ei lygaid fel colomennod wrth nentydd dŵr, yn wyn fel llaeth ac yn berffaith yn eu lle.

¹³Mae arogl ei fochau fel gwely o berlysiau, a chusan ei wefusau fel y lili yn diferu o fyrr.

¹⁴Mae ei freichiau cyhyrog fel aur wedi eu haddurno â meini gwerthfawr. A'i gorff lluniaidd fel ifori llyfn wedi ei orchuddio â meini saffir.

¹⁵Mae ei goesau fel pileri o farmor wedi eu gosod ar sylfaen o aur pur. Mae e'n sefyll fel mynyddoedd Libanus a'u coed cedrwydd urddasol.

¹⁶Mae ei gusan mor felys; mae popeth amdano'n ddeniadol! Dyna fy nghariad, dyna fy nghymar, ferched Jerwsalem.