Read Gobaith i Gymru Caniad Solomon 7 Bible Online

Caniad Solomon 7 - Gobaith i Gymru bible

Caniad Solomon 7

¹Mae dy draed yn dy sandalau mor hardd, o ferch fonheddig. Mae dy gluniau mor siapus — fel gemwaith gan grefftwr medrus.

²Mae dy wain ddirgel fel cwpan gron yn llawn o'r gwin cymysg gorau. Mae dy fol fel pentwr o wenith a chylch o lilïau o'i gwmpas.

³Mae dy fronnau yn berffaith fel dwy gasél ifanc, efeilliaid.

⁴Mae dy wddf fel tŵr o ifori, a'th lygaid fel llynnoedd Cheshbon ger mynedfa Bath-rabbîm. Mae dy drwyn hardd fel y tŵr yn Libanus sy'n wynebu dinas Damascus.

⁵Ti'n dal dy ben yn uchel fel Mynydd Carmel ac mae dy wallt hardd fel edafedd drud yn dal y brenin yn gaeth yn ei dresi.

⁶O! rwyt mor hardd! Mor hyfryd! Ti'n fy hudo, fy nghariad!

⁷Ti'n dal fel coeden balmwydd, a'th fronnau'n llawn fel ei sypiau o ddatys.

⁸Dw i am ddod a dringo'r goeden a gafael yn ei ffrwythau. Mae dy fronnau fel sypiau o rawnwin, a'u sawr yn felys fel afalau.

⁹Mae dy gusanau fel y gwin gorau yn llifo'n rhydd ar fy ngwefusau wrth i ni fynd i gysgu.

¹⁰Fy nghariad piau fi, ac mae f'eisiau.

¹¹Tyrd, fy nghariad, gad i ni fynd i'r caeau; gad i ni dreulio'r nos rhwng y blodau henna.

¹²Gad i ni godi'n gynnar a mynd lawr i'r gwinllannoedd, i weld os ydy'r winwydden wedi blaguro a'u blodau wedi agor; ac i weld os ydy'r pomgranadau'n blodeuo — yno gwnaf roi fy hun i ti.

¹³Yno bydd persawr hyfryd y mandragorau [15] yn llenwi'r awyr, a danteithion pleser wrth ein drysau — y cwbl dw i wedi ei gadw i'w rannu gyda ti fy nghariad.