Read Gobaith i Gymru Caniad Solomon 8 Bible Online

Caniad Solomon 8 - Gobaith i Gymru bible

Caniad Solomon 8

¹O na fyddet ti fel brawd bach i mi, wedi ei fagu ar fron fy mam; byddwn yn dy gusanu di'n agored, a fyddai neb yn meddwl yn ddrwg amdana i.

²Af â ti i dŷ fy mam, yr un ddysgodd bopeth i mi. Rhof i ti win yn gymysg â pherlysiau; gwin melys fy mhomgranadau.

³Mae ei law chwith dan fy mhen, a'i law dde yn fy anwesu.

⁴Ferched Jerwsalem, dw i'n pledio arnoch: Pam trïo cyffroi cariad rhywiol cyn ei fod yn barod?

⁵Pwy sy'n dod o gyfeiriad yr anialwch yn pwyso ar fraich ei chariad? Cynhyrfais di dan y goeden afalau. Dyna ble gwnaeth dy fam dy genhedlu, a dyna ble gest ti dy eni.

⁶Gosod fi fel sêl ar dy galon, fel sêl-fodrwy ar dy law. Mae gafael cariad yn gryf fel marwolaeth, ac mae nwyd angerddol mor ddi-ildio â'r bedd. Mae ei fflamau'n fflachio'n wyllt, fel tân sy'n llosgi'n wenfflam.

⁷All dyfroedd y môr ddim diffodd cariad; all llifogydd mo'i ysgubo i ffwrdd. Petai rhywun yn cynnig ei gyfoeth i gyd amdano, byddai'n ddim byd ond testun sbort.

⁸Mae gynnon ni chwaer fach a'i bronnau heb dyfu. Beth wnawn ni i'w helpu pan gaiff ei haddo i'w phriodi?

⁹Os ydy hi'n saff fel wal, gallwn ei haddurno gyda thyrau arian! Os ydy hi fel drws, gallwn ei bordio gyda coed cedrwydd!

¹⁰Roeddwn i fel wal, ond bellach mae fy mronnau fel tyrau, felly dw i'n gwbl aeddfed yn ei olwg e.

¹¹Roedd gan Solomon winllan yn Baal-hamon, a rhoddodd y winllan ar rent i denantiaid. Byddai pob un yn talu mil o ddarnau arian am ei ffrwyth.

¹²Mae'r mil o ddarnau arian i ti Solomon, a dau gant i'r rhai sy'n gofalu am ei ffrwyth; ond mae fy ngwinllan i i mi'n unig.

¹³Ti sy'n aros yn y gerddi, mae yna ffrindiau'n gwrando am dy lais; ond gad i mi fod yr un sy'n ei glywed.

¹⁴Brysia, fy nghariad! — bydd fel gasél neu garw ifanc ar fynyddoedd y perlysiau.