Read Gobaith i Gymru Eseia 1 Bible Online

Eseia 1 - Gobaith i Gymru bible

Eseia 1

¹Gweledigaeth Eseia fab Amos. (Dyma welodd e am Jwda a Jerwsalem yn ystod y blynyddoedd pan oedd Wseia, Jotham, Ahas, a Heseceia yn frenhinoedd Jwda.) [1†] [2]

²Gwranda nefoedd! Clyw ddaear! Mae'r ARGLWYDD yn dweud: “Dw i wedi magu plant a gofalu amdanyn nhw — ond maen nhw wedi gwrthryfela yn fy erbyn i.

³Mae ychen yn nabod ei berchennog ac asyn yn gwybod ble mae cafn bwydo ei feistr: ond dydy Israel ddim yn fy nabod i; dydy fy mhobl i'n cymryd dim sylw!”

⁴O! druan ohonot ti'r wlad sy'n pechu! Pobl sy'n llawn drygioni! Nythaid o rai sy'n gwneud drwg! Plant pwdr! Maen nhw wedi troi cefn ar yr ARGLWYDD, A dirmygu Un Sanctaidd Israel, Maen nhw wedi pellhau oddi wrtho.

⁵Pam dych chi'n dal ati i wrthryfela? Ydych chi eisiau cael eich curo eto? Mae briwiau ar bob pen a'r corff yn hollol wan.

⁶Does unman yn iach o'r corun i'r sawdl: Dim ond clwyfau a chleisiau, a briwiau agored — Heb eu gwella na'u rhwymo, ac heb olew i'w hesmwytho.

⁷Mae eich gwlad fel anialwch, a'ch dinasoedd wedi eu llosgi'n ulw; Mae dieithriaid yn bwyta eich cnydau o flaen eich llygaid — Anialwch wedi ei ddinistrio gan estroniaid!

⁸Dim ond Seion hardd sydd ar ôl — fel caban yng nghanol gwinllan, neu gwt mewn gardd lysiau; fel dinas yn cael ei gwarchae.

⁹Oni bai fod yr ARGLWYDD holl-bwerus wedi gadael i rai pobl fyw, bydden ni wedi'n dinistrio fel Sodom, neu wedi diflannu'n llwyr fel Gomorra. [3]

¹⁰Gwrandwch ar neges yr ARGLWYDD, arweinwyr Sodom! Gwrandwch ar beth mae Duw'n ei ddysgu i chi, bobl Gomorra!

¹¹“Beth ydy pwynt eich holl aberthau chi?” [4†] meddai'r ARGLWYDD. “Dw i wedi cael llond bol o hyrddod yn offrymau i'w llosgi, o fraster anifeiliaid a gwaed teirw. Dw i ddim eisiau eich ŵyn a'ch bychod geifr chi.

¹²Dych chi'n ymddangos o'm blaen i — Ond pwy ofynnodd i chi ddod i stompio drwy'r deml?

¹³Stopiwch ddod â'ch offrymau diystyr! Mae'r arogldarth yn troi arna i! Dych chi'n dathlu Gŵyl y lleuad newydd a'r Sabothau, ac yn cynnal cyfarfodydd eraill, Ond alla i ddim diodde'r drygioni sy'n mynd gyda'ch dathliadau crefyddol chi.

¹⁴Dw i'n casáu'r lleuadau newydd a'ch gwyliau eraill chi. Maen nhw'n faich arna i; alla i mo'i diodde nhw.

¹⁵Pan fyddwch chi'n codi'ch dwylo i weddïo, bydda i'n edrych i ffwrdd. Gallwch chi weddïo faint fynnoch chi, ond fydda i ddim yn gwrando. Mae gwaed ar eich dwylo chi!

¹⁶Ymolchwch! Byddwch yn lân! Ewch â'r pethau drwg dych chi'n eu gwneud allan o'm golwg i! Stopiwch wneud drwg;

¹⁷Dysgwch wneud da. Brwydrwch dros gyfiawnder; o blaid y rhai sy'n cael eu gorthrymu. Cefnogwch hawliau plant amddifad, a dadlau dros achos y weddw.

¹⁸Dewch, gadewch i ni ddeall ein gilydd,” —meddai'r ARGLWYDD. “Os ydy'ch pechodau chi'n goch llachar, gallan nhw droi'n wyn fel yr eira; Os ydyn nhw'n goch tywyll, gallan nhw fod yn wyn fel gwlân.

¹⁹Os dych chi'n fodlon gwrando a gwneud be dw i'n ddweud, cewch fwyta cynnyrch da'r tir;

²⁰Ond os byddwch chi'n ystyfnig ac yn gwrthod gwrando, byddwch chi'n cael eich difa gan y cleddyf,” —mae'r ARGLWYDD wedi dweud.

²¹Ond o! Mae Seion wedi troi'n butain. Roedd hi'n ddinas ffyddlon, yn llawn o bobl yn gwneud beth oedd yn iawn. Cyfiawnder oedd yn arfer byw ynddi — ond bellach llofruddion.

²²Mae dy arian wedi ei droi'n amhuredd; mae dy win wedi ei gymysgu â dŵr!

²³Mae dy arweinwyr wedi gwrthryfela, ac yn ffrindiau i ladron; Maen nhw i gyd yn hoffi breib, Ac yn chwilio am wobr. Wnân nhw ddim amddiffyn plentyn amddifad na gwrando ar achos y weddw.

²⁴Felly, dyma mae'r Meistr yn ei ddweud (yr ARGLWYDD holl-bwerus), Arwr Israel! — “O! bydda i'n dangos fy nig i'r rhai sy'n fy erbyn! Bydda i'n dial ar fy ngelynion!

²⁵Bydda i'n ymosod arnat ac yn symud dy amhuredd â thoddydd. Bydda i'n cael gwared â'r slag i gyd!

²⁶Bydda i'n rhoi barnwyr gonest i ti fel o'r blaen, a cynghorwyr doeth, fel roedden nhw ers talwm. Wedyn byddi di'n cael dy alw ‛Y Ddinas Gyfiawn‛, ‛Tref Ffyddlon‛.”

²⁷Bydd Seion yn cael ei gollwng yn rhydd pan ddaw'r dyfarniad; a'r rhai sy'n troi'n ôl yn cael cyfiawnder.

²⁸Ond bydd y rhai sydd wedi gwrthryfela a phechu yn cael eu sathru; Bydd hi wedi darfod ar y rhai sydd wedi troi cefn ar yr ARGLWYDD.

²⁹Bydd gynnoch chi gywilydd o'r coed derw cysegredig oeddech chi mor hoff ohonyn nhw. Byddwch chi wedi drysu o achos y gerddi paganaidd [5] oeddech wedi eu dewis.

³⁰Byddwch fel coeden dderwen â'i dail wedi gwywo, neu fel gardd sydd heb ddŵr.

³¹Bydd y rhai cryf fel fflwff, a'u gwaith fel gwreichionen. Bydd y ddau yn llosgi gyda'i gilydd, a neb yn gallu diffodd y tân!