Read Gobaith i Gymru Eseia 10 Bible Online

Eseia 10 - Gobaith i Gymru bible

Eseia 10

¹Gwae'r rhai sy'n rhoi dyfarniad anghyfiawn ac ysgrifennu deddfau sy'n gormesu pobl.

²Maen nhw'n dwyn cyfiawnder oddi ar bobl dlawd, a chymryd eu hawliau oddi ar yr anghenus. Maen nhw'n dwyn oddi ar y gweddwon, ac yn ysbeilio plant amddifad!

³Beth wnewch chi ar ddiwrnod y cosbi, pan fydd dinistr yn dod o bell? At bwy fyddwch chi'n rhedeg am help? I ble'r ewch chi i guddio eich trysor?

⁴Bydd rhaid crymu gyda'r carcharorion eraill, neu syrthio gyda phawb arall sy'n cael eu lladd! Eto wnaeth Duw ddim stopio bod yn ddig, Roedd yn dal yn eu herbyn nhw.

⁵Gwae Asyria, y wialen dw i'n ei defnyddio pan dw i'n ddig, [29†] Mae'r ffon sy'n dangos fy mod i wedi gwylltio yn ei llaw hi.

⁶Dw i'n ei hanfon yn erbyn cenedl annuwiol, ac yn dweud wrthi am ymosod ar y bobl sy'n fy nigio i; i ysbeilio a rheibio a'u sathru dan draed fel baw ar y stryd.

⁷Ond dim dyna ydy bwriad Asyria — rhywbeth arall sydd ganddi hi mewn golwg. Ei bwriad hi ydy dinistrio, a difa gwledydd yn llwyr — llawer ohonyn nhw!

⁸Mae'n meddwl, “Mae brenhinoedd wedi dod yn swyddogion i mi!

⁹Onid ydy Calno yr un fath â Carcemish? a Chamath fel Arpad? a Samaria fel Damascus? [30]

¹⁰Gan fy mod i wedi cael gafael yn y gwledydd hynny a'u heilun-dduwiau — gwledydd oedd â llawer mwy o ddelwau na Jerwsalem a Samaria —

¹¹bydda i'n gwneud yr un peth i Jerwsalem a'i heilunod ag a wnes i i Samaria a'i delwau.”

¹²Ond pan fydd y Meistr wedi gorffen delio gyda Mynydd Seion a Jerwsalem, bydd e'n cosbi brenin Asyria am fod mor falch ac mor llawn ohono'i hun.

¹³Am feddwl fel hyn: “Dw i wedi gwneud y cwbl am fy mod i mor gryf. Roedd gen i strategaeth glyfar, a dw i wedi dileu ffiniau gwledydd. Dw i wedi cymryd eu trysorau nhw, ac wedi bwrw brenhinoedd i lawr fel tarw.

¹⁴Cefais afael ar gyfoeth y gwledydd mor hawdd a dwyn wyau o nyth: heb neb yn fflapio'i adenydd nag yn agor ei big i drydar.”

¹⁵Ydy bwyell o unrhyw werth heb rywun i'w thrin? Ydy llif yn bwysicach na'r un sy'n ei defnyddio? Fel petai gwialen yn chwifio'r dyn sy'n ei chodi! Fel petai ffon yn codi'r person sydd ddim yn bren!

¹⁶Felly, bydd y Meistr—yr ARGLWYDD holl-bwerus— yn anfon afiechyd fydd yn nychu ei filwyr iach; bydd twymyn yn taro ei ysblander ac yn llosgi fel tân.

¹⁷Bydd Golau Israel yn troi'n dân, a'r Un Sanctaidd yn fflam. Bydd yn llosgi'r drain a'r mieri mewn diwrnod,

¹⁸a dinistrio'r goedwig a'r berllan yn llwyr. Bydd fel bywyd dyn sâl yn diflannu.

¹⁹Bydd cyn lleied o goed ar ôl bydd plentyn bach yn gallu eu cyfri!

²⁰Bryd hynny, fydd y rhai sydd ar ôl yn Israel a'r rhai hynny o bobl Jacob sydd wedi dianc ddim yn pwyso ar y genedl wnaeth eu gorthrymu nhw; Byddan nhw'n pwyso'n llwyr ar yr ARGLWYDD, Un sanctaidd Israel.

²¹Bydd rhan fechan, ie, rhan fechan o Jacob yn troi yn ôl at y Duw cryf.

²²Israel, hyd yn oed petai dy bobl mor niferus â thywod y môr, dim ond nifer fechan fydd yn dod yn ôl. Mae'r dinistr yn sicr. Mae'r gosb sydd wedi ei haeddu yn dod fel llifogydd!

²³Mae fy Meistr, yr ARGLWYDD holl-bwerus, yn barod i ddod â'r dinistr sydd wedi ei ddyfarnu ar y tir.

²⁴Felly, dyma mae fy Meistr, yr ARGLWYDD holl-bwerus, yn ei ddweud: “O fy mhobl, sy'n byw yn Seion, peidiwch bod ag ofn Asyria — er iddo dy daro di gyda'i wialen a dy fygwth gyda'i ffon fel y gwnaeth yr Eifftiaid.

²⁵Yn fuan iawn bydd fy nig wedi ei dawelu, a bydda i'n troi i'w dinistrio nhw.”

²⁶Bydd yr ARGLWYDD holl-bwerus yn chwifio ei chwip uwch eu pennau, fel y gwnaeth pan drawodd Midian wrth Graig Oreb. Bydd yn codi ei wialen fel y gwnaeth dros yr Eifftiaid wrth y môr.

²⁷Bryd hynny, bydd y pwysau'n cael ei symud oddi ar dy ysgwyddau di, a bydd iau Assyria'n cael ei dorri oddi ar dy war am ei fod mor hunanfodlon.

²⁸Daeth y gelyn ac ymosod ar Aiath, [31] ac yna aeth ymlaen i Migron cyn paratoi ei gêr yn Michmas.

²⁹Yna croesi'r bwlch ac aros yn Geba [32] dros nos. Roedd Rama wedi dychryn, a pobl Gibea, tref Saul, yn ffoi.

³⁰“Rho sgrech, Bath-galîm! Gwrando'n astud, Laisha! Ateb hi, Anathoth!”

³¹Mae Madmena yn ffoi, a phobl Gebim yn cuddio.

³²Heddiw mae'r gelyn yn Nob [33] yn ysgwyd ei ddwrn bygythiol yn erbyn mynydd Seion a bryn Jerwsalem!

³³Edrych! Mae'r Meistr—yr ARGLWYDD holl-bwerus— yn mynd i hollti canghennau'r coed gyda nerth brawychus. Bydd yn torri'r coed talaf i lawr, a bydd y rhai uchel yn syrthio.

³⁴Bydd yn torri trwy ddrysni'r goedwig gyda bwyell, a bydd coed mawr Libanus yn cwympo.