Read Gobaith i Gymru Eseia 11 Bible Online

Eseia 11 - Gobaith i Gymru bible

Eseia 11

¹Ond bydd brigyn newydd yn tyfu o foncyff Jesse, [34] a changen ffrwythlon yn tyfu o'i wreiddiau.

²Bydd ysbryd yr ARGLWYDD yn gorffwys arno: ysbryd doethineb rhyfeddol, ysbryd strategaeth sicr, ysbryd defosiwn a pharch at yr ARGLWYDD.

³Bydd wrth ei fodd yn ufuddhau i'r ARGLWYDD: fydd e ddim yn barnu ar sail yr olwg gyntaf, nac yn gwneud penderfyniad ar sail rhyw si.

⁴Bydd yn barnu achos pobl dlawd yn deg ac yn rhoi dyfarniad cyfiawn i'r rhai sy'n cael eu cam-drin yn y tir. Bydd ei eiriau fel gwialen yn taro'r ddaear a bydd yn lladd y rhai drwg gyda'i anadl.

⁵Bydd cyfiawnder a ffyddlondeb fel belt am ei ganol.

⁶Bydd y blaidd yn cyd-fyw gyda'r oen, [35†] a'r llewpard yn gorwedd i lawr gyda'r myn gafr. Bydd y llo a'r llew ifanc yn pori gyda'i gilydd, a bachgen bach yn gofalu amdanyn nhw.

⁷Bydd y fuwch a'r arth yn pori gyda'i gilydd, a'u rhai ifanc yn cydorwedd; a bydd y llew yn bwyta gwellt fel ych.

⁸Bydd babi bach yn chwarae wrth nyth y cobra a phlentyn bach yn rhoi ei law ar dwll y wiber.

⁹Fydd neb yn gwneud drwg nac yn dinistrio dim ar y mynydd sydd wedi ei gysegru i mi. Fel mae'r môr yn llawn dop o ddŵr, bydd y ddaear yn llawn pobl sy'n nabod yr ARGLWYDD.

¹⁰Bryd hynny, bydd y ffaith fod boncyff Jesse yn dal i sefyll yn arwydd clir i bobloedd — bydd cenhedloedd yn dod ato am gyngor, a bydd ei le yn ysblennydd.

¹¹Bryd hynny, bydd y Meistr yn mynd ati i ryddhau gweddill ei bobl o wlad Asyria — ac hefyd o'r Aifft, Pathros, Dwyrain Affrica, [36] Elam, Babilonia, Chamath, a'r ynysoedd.

¹²Bydd yn codi baner i alw'r cenhedloedd, ac yn casglu'r bobl gafodd eu halltudio o Israel. Bydd yn casglu pobl Jwda gafodd eu gwasgaru o bedwar ban byd.

¹³Yna bydd cenfigen Effraim [37] yn darfod a bydd yr elyniaeth rhyngddi â Jwda yn dod i ben. Fydd Effraim ddim yn cenfigennu wrth Jwda, a fydd Jwda ddim yn plagio Effraim.

¹⁴Byddan nhw'n ymosod ar y Philistiaid i'r gorllewin, ac yn ysbeilio pobl y dwyrain gyda'i gilydd. Bydd Edom a Moab yn cael eu rheoli ganddyn nhw, a bydd pobl Ammon fel gwas bach iddyn nhw.

¹⁵Bydd yr ARGLWYDD yn sychu Môr yr Aifft. Bydd yn codi ei law dros Afon Ewffrates ac yn anfon gwynt ffyrnig i'w hollti'n saith sychnant, er mwyn gallu ei chroesi heb wlychu'r traed.

¹⁶Felly bydd priffordd ar gyfer gweddill ei bobl sydd wedi eu gadael yn Asyria, fel yr un oedd i bobl Israel pan ddaethon nhw allan o wlad yr Aifft.