Read Gobaith i Gymru Eseia 13 Bible Online

Eseia 13 - Gobaith i Gymru bible

Eseia 13

¹[40] Y neges gafodd Eseia fab Amos am Babilon [41†]

²“Codwch faner ar ben mynydd, a gweiddi'n uchel arnyn nhw! Codwch eich llaw i'w galw i mewn drwy giatiau'r bobl fawr!

³Dw i wedi rhoi gorchymyn i'r rhai dw i wedi eu dewis, a galw fy milwyr cryfion i ddangos mor ddig dw i; milwyr balch sy'n brolio.”

⁴Gwrandwch! Mae sŵn cynnwrf ar y mynyddoedd — fel byddin enfawr; Gwrandwch! Sŵn twrw'r gwledydd! Cenhedloedd yn casglu at ei gilydd! Mae'r ARGLWYDD holl-bwerus yn casglu byddin i ryfel!

⁵Maen nhw'n dod o wlad bell, y tu hwnt i'r gorwel — yr ARGLWYDD ac arfau ei lid, yn dod i ddinistrio'r holl dir!

⁶Udwch! Mae dydd barn yr ARGLWYDD yn agos! [42†] Mae'n dod fel dinistr oddi wrth yr Un sy'n rheoli popeth.

⁷Felly, bydd pob llaw yn llipa, a phawb wedi digalonni

⁸a'u llethu gan ddychryn. Bydd poen a phryder wedi gafael ynddyn nhw, a byddan nhw'n gwingo mewn poen fel gwraig yn cael babi. Byddan nhw'n syllu'n syn ar ei gilydd, a'u hwynebau'n gwrido o gywilydd.

⁹Ydy! Mae dydd barn yr ARGLWYDD yn dod; dydd creulon ei lid ffyrnig a thanbaid, i droi'r ddaear yn anialwch diffaith, a chael gwared â phechaduriaid ohoni.

¹⁰Fydd y sêr a'u clystyrau ddim yn rhoi golau. Bydd yr haul yn dywyll pan fydd yn codi, a'r lleuad ddim yn llewyrchu.

¹¹“Bydda i'n cosbi'r byd am ei holl ddrygioni, a phobl ddrwg am eu pechod. Bydda i'n rhoi diwedd ar falchder pobl haerllug, ac yn torri crib y rhai creulon.

¹²Bydd pobl yn fwy prin nag aur pur — yn fwy prin nag aur Offir. [43]

¹³Bydda i'n gwneud i'r awyr grynu, ac i'r ddaear ysgwyd o'i lle.” Mae'r ARGLWYDD holl-bwerus yn barnu ar ddiwrnod ei lid ffyrnig.

¹⁴Bydd pawb yn troi at ei bobl ei hun ac yn dianc i'w gynefin; fel gasél yn dianc pan mae'n cael ei hela, neu ddefaid ar wasgar a neb i'w casglu.

¹⁵Bydd pawb sy'n cael ei ddarganfod yn cael ei drywanu, a phawb sy'n cael ei ddal yn cael ei ladd â'r cleddyf.

¹⁶Bydd eu plant bach yn cael eu curo i farwolaeth, a'u lladd o flaen eu llygaid; eu cartrefi'n cael eu gwagio, a'u gwragedd yn cael eu treisio.

¹⁷“Ond edrychwch, dw i'n codi'r Mediaid [44] yn eu herbyn nhw. Fydd arian ddim yn rhwystro'r rheiny, nac aur yn eu denu i droi.

¹⁸Bydd eu bwâu yn taro'r dynion ifanc i lawr. Fydd dim tosturi at fabis bach, a fyddan nhw ddim yn arbed bywyd y plant.”

¹⁹Bydd Babilon, y deyrnas harddaf — ysblander a balchder ei phobl — wedi ei bwrw i lawr gan Dduw fel Sodom a Gomorra. [45†]

²⁰Fydd neb yn byw yno byth eto; neb o gwbl ar hyd y cenedlaethau — dim bedowin yn codi ei babell, na bugail yn gorffwys ei braidd.

²¹Bydd ysbrydion yr anialwch yn gorwedd yno, a'r tai yn llawn creaduriaid yn udo. Bydd y dylluan yn byw yno, a'r gafr-ddemoniaid yn llamu o gwmpas. [46†]

²²Bydd bwganod yn sgrechian yn ei hadfeilion, a siacaliaid yn ei phlastai. Mae ei hamser bron ar ben; fydd ei dyddiau ddim yn cael eu hestyn.