Read Gobaith i Gymru Eseia 14 Bible Online

Eseia 14 - Gobaith i Gymru bible

Eseia 14

¹Ond bydd yr ARGLWYDD yn maddau i Jacob, ac yn dewis Israel unwaith eto. Bydd yn eu gosod nhw yn eu tir eu hunain, a bydd ffoaduriaid yn ymuno gyda nhw ac yn uniaethu gyda phobl Jacob.

²Bydd pobloedd eraill yn eu harwain yn ôl i'w mamwlad. Bydd pobl Jacob yn rhannu tir yr ARGLWYDD rhyngddyn nhw, i'w drin gan eu gweision a'u morynion. Byddan nhw'n caethiwo'r rhai wnaeth eu caethiwo nhw, ac yn feistri ar y rhai wnaeth eu gorthrymu nhw.

³Pan fydd yr ARGLWYDD wedi rhoi llonydd i ti o dy holl drafferthion a dy helbulon, a'r holl waith caled pan oeddet ti'n gaethwas,

⁴byddi'n adrodd y gerdd ddychan yma am frenin Babilon: “Ble mae'r gormeswr wedi diflannu? Mae ei falchder wedi dod i ben!

⁵Mae'r ARGLWYDD wedi torri ffon y rhai drwg, a gwialen y gormeswyr.

⁶Roedd yn ddig ac yn taro cenhedloedd yn ddi-stop. Roedd yn sathru pobloedd yn ddidrugaredd a'u herlid yn ddi-baid.

⁷Bellach mae'r ddaear yn dawel a digyffro; ac mae'r bobl yn canu'n llawen.

⁸Mae hyd yn oed y coed pinwydd yn hapus, a'r coed cedrwydd yn Libanus: ‘Ers i ti gael dy fwrw i lawr, dydy'r torrwr coed ddim yn dod yn ein herbyn ni!’

⁹Mae byd y meirw isod mewn cyffro, yn barod i dy groesawu di — Bydd y meirw'n deffro, sef arweinwyr y byd, a bydd brenhinoedd gwledydd y ddaear yn codi oddi ar eu gorseddau.

¹⁰Byddan nhw i gyd yn dy gyfarch di, ‘Felly, ti hyd yn oed! — rwyt tithau'n wan fel ni!

¹¹Mae dy holl rwysg a sain cerdd dy liwtiau wedi ei dynnu i lawr i Annwn! [47] Bydd y cynrhon yn wely oddi tanat a phryfed genwair yn flanced drosot ti!

¹²Y fath gwymp! — Ti, seren ddisglair, mab y wawr, wedi syrthio o'r nefoedd! Ti wedi dy dorri i lawr i'r ddaear — ti oedd yn sathru'r holl wledydd!

¹³Roeddet ti'n meddwl i ti dy hun, “Dw i'n mynd i ddringo i'r nefoedd, a gosod fy ngorsedd yn uwch na sêr Duw. Dw i'n mynd i eistedd ar Fynydd y gynulleidfa yn y gogledd pell. [48]

¹⁴Dw i'n mynd i ddringo ar gefn y cymylau, a gwneud fy hun fel y Duw Goruchaf.”

¹⁵O'r fath gwymp! — Rwyt wedi dod i lawr i fyd y meirw, i'r lle dyfnaf yn y Pwll!

¹⁶Mae pobl yn dy weld ac yn syllu arnat, ac yn pendroni: “Ai hwn ydy'r dyn wnaeth i'r ddaear grynu, a dychryn teyrnasoedd?

¹⁷Ai fe ydy'r un drodd y byd yn anialwch, a dinistrio'i ddinasoedd — heb fyth ryddhau ei garcharorion i fynd adre?”’

¹⁸Mae brenhinoedd y gwledydd i gyd — pob un ohonyn nhw — yn gorwedd yn grand yn eu beddau eu hunain.

¹⁹Ond ti? — cest ti dy adael heb dy gladdu, yn ffiaidd, fel ffetws wedi ei erthylu. Fel corff marw yn y dillad a wisgai pan gafodd ei drywanu gan y cleddyf. Fel y rhai sy'n syrthio i waelod y pwll, neu gorff yn cael ei sathru dan draed.

²⁰Gei di ddim angladd fel brenhinoedd eraill, am dy fod ti wedi dinistrio dy wlad dy hun a lladd dy bobl dy hun. Boed i neb byth eto gofio'r fath hil o bobl ddrwg!

²¹Paratowch floc i ddienyddio ei feibion o achos drygioni eu tad. Peidiwch gadael iddyn nhw godi i feddiannu'r tir a llenwi'r byd gyda'i dinasoedd!”

²²Dyma mae'r ARGLWYDD holl-bwerus yn ei ddweud: “Bydda i'n codi yn eu herbyn nhw. Bydda i'n dileu pob enw o Babilon, a lladd phawb sy'n dal ar ôl yno, eu plant a'u disgynyddion i gyd.

²³Bydda i'n llenwi'r wlad â draenogod a'i throi'n gors o byllau dŵr mwdlyd. Bydda i'n ei hysgubo i ffwrdd hefo brwsh dinistr,” —yr ARGLWYDD holl-bwerus sy'n dweud hyn.

²⁴Mae'r ARGLWYDD holl-bwerus wedi tyngu llw: “Bydd popeth yn digwydd yn union fel dwedais i; bydd fy nghynlluniau yn dod yn wir. [49†]

²⁵Bydda i'n dryllio grym Asyria yn fy nhir, ac yn ei sathru ar fy mryniau. Bydd ei iau yn cael ei dynnu oddi arnyn nhw, a'r baich trwm yn disgyn oddi ar eu cefnau.

²⁶Dyna'r cynllun sydd gen i ar gyfer y ddaear gyfan. Dyna pam mae fy llaw yn barod i ddelio gyda'r cenhedloedd i gyd.”

²⁷Mae gan yr ARGLWYDD holl-bwerus gynllun — Pwy sy'n mynd i'w rwystro? Mae ei law yn barod i weithredu — Pwy sy'n mynd i'w ddal yn ôl?

²⁸Neges gafodd ei roi yn y flwyddyn y buodd y Brenin Ahas farw: [50] [51†]

²⁹Peidiwch dathlu, chi'r Philistiaid i gyd, am fod y ffon fuodd yn eich curo chi wedi ei thorri. O wreiddyn y neidr bydd gwiber yn codi, gwiber wibiog fydd ei ffrwyth. [52†]

³⁰Bydd y tlotaf o'r tlawd yn cael pori, a'r rhai anghenus yn gorwedd yn ddiogel. Ond bydda i'n defnyddio newyn i ddinistrio dy wreiddyn, a bydd yn lladd pawb sydd ar ôl.

³¹Udwch wrth y giatiau; sgrechian yn y ddinas; Mae Philistia i gyd mewn dychryn! Achos mae cwmwl yn dod o'r gogledd, a does neb yn ei rhengoedd yn llusgo eu traed.

³²Beth ydy'r ateb i negeswyr y genedl? Fod yr ARGLWYDD wedi gwneud Seion yn saff, a bod lloches yno i'w bobl anghenus.