Read Gobaith i Gymru Eseia 15 Bible Online

Eseia 15 - Gobaith i Gymru bible

Eseia 15

¹Neges am Moab. [53†] Do, cafodd ei dinistrio mewn noson, cafodd Ar yn Moab ei difrodi'n llwyr; Do, cafodd ei dinistrio mewn noson, cafodd Cir yn Moab ei difrodi'n llwyr.

²Maen nhw wedi mynd i'r deml, ac i'r allor leol yn Dibon i wylo. Mae Moab yn udo am beth ddigwyddodd i Nebo a Medeba. Mae pob pen yn foel, pob barf wedi ei siafio,

³ac maen nhw'n gwisgo sachliain yn y strydoedd. Mae pawb yn udo ac yn beichio crïo ar bennau'r tai ac yn y sgwariau.

⁴Mae sgrechian yn Cheshbon ac Eleale, ac mae'r sŵn i'w glywed mor bell â Iahats. Felly, mae milwyr Moab yn gweiddi a crynu trwyddynt mewn ofn.

⁵Mae fy nghalon yn gwaedu dros Moab — a'r ffoaduriaid sy'n dianc i Soar ac Eglath-shalisheia. Maen nhw'n wylo wrth ddringo ar lethr Lwchith Mae gwaedd dinistr yn codi ar y ffordd i Choronaïm.

⁶Mae dyfroedd Nimrim wedi sychu; mae'r glaswellt wedi gwywo, a phob tyfiant yn methu. Mae pob planhigyn wedi diflannu.

⁷Felly, maen nhw'n cario eu cynilion a'u heiddo dros Sychnant yr Helyg.

⁸Ydy, mae sŵn y sgrechian wedi lledu drwy wlad Moab i gyd: mae'r udo i'w glywed mor bell ag Eglaim, hyd yn oed yn Beër-elim!

⁹Mae dyfroedd Dimon yn llawn gwaed. Ond dw i'n mynd i wneud pethau'n waeth eto i Dimon: Bydd llew yn ymosod ar weddill Moab, a'r rhai sydd ar ôl yn y tir.