Read Gobaith i Gymru Eseia 17 Bible Online

Eseia 17 - Gobaith i Gymru bible

Eseia 17

¹Neges am Damascus. “Edrychwch ar Damascus! Dydy hi ddim yn ddinas bellach — mae hi'n bentwr o gerrig! [56†]

²Bydd ei phentrefi yn wag am byth: lle i breiddiau orwedd heb neb i'w dychryn.

³Bydd trefi caerog Effraim [57], a sofraniaeth Damascus yn diflannu. Bydd y rhai sydd ar ôl yn Syria yn yr un cyflwr ‛gwych‛ ag Israel!” —yr ARGLWYDD holl-bwerus sy'n dweud hyn.

⁴“Bryd hynny, bydd gwychder Jacob wedi pylu, a'i gorff iach yn denau fel sgerbwd:

⁵Yn lle bod fel cae o ŷd yn cael ei gynaeafu, a breichiau'r medelwr yn llawn, bydd fel y tywysennau sy'n cael eu lloffa yn Nyffryn Reffaïm —

⁶dim ond ychydig loffion fydd ar ôl. Bydd fel ysgwyd coeden olewydd, a dim ond dau neu dri ffrwyth yn disgyn o'r brigau uchaf, a pedwar neu bump o'r prif ganghennau,” —meddai'r ARGLWYDD, Duw Israel.

⁷Bryd hynny, bydd pobl yn troi at eu Crëwr. Byddan nhw'n edrych at Un Sanctaidd Israel am help,

⁸yn lle syllu ar yr allorau godon nhw, polion y dduwies Ashera a'r llestri dal arogldarth — eu gwaith llaw eu hunain.

⁹Bryd hynny, bydd eu trefi caerog fel yr adfeilion adawyd gan yr Amoriaid a'r Hefiaid pan ymosododd Israel arnyn nhw — wedi eu dinistrio'n llwyr.

¹⁰Rwyt wedi anghofio'r Duw wnaeth dy achub; ac anwybyddu'r Graig — dy gaer ddiogel. Felly rwyt yn trin gerddi i'r "Anwylyd" [58], a plannu sbrigyn i dduw estron!

¹¹Ti'n codi ffens o'i gwmpas y diwrnod rwyt yn ei blannu; ei weld yn blaguro y bore hwnnw a disgwyl pentwr o gynhaeaf! Ond y cwbl gei di fydd pryder a poen na ellir ei wella!

¹²Gwae! Mae byddinoedd y gwledydd yn dod! Maen nhw'n rhuo fel tonnau'r môr; Mae sŵn y rhuo fel sŵn dŵr mawr yn llifo.

¹³Ond er bod y bobl yn rhuo fel sŵn dŵr mawr, bydd Duw'n eu ceryddu, a byddan nhw'n ffoi. Byddan nhw'n cael eu gyrru fel mân us o flaen y gwynt, neu blu ysgall o flaen corwynt.

¹⁴Fin nos, daw dychryn sydyn, ond erbyn y bore does dim ar ôl. Dyna fydd yn digwydd i'r rhai sy'n ein hysbeilio, dyna sy'n disgwyl y rhai sy'n ein rheibio!