Read Gobaith i Gymru Eseia 21 Bible Online

Eseia 21 - Gobaith i Gymru bible

Eseia 21

¹[70] Neges am “yr Anialwch wrth y môr” (sef Babilon): Fel y gwyntoedd stormus sy'n rhuthro drwy'r Negef, mae e'n dod o'r anialwch, o wlad sydd i'w hofni.

²Cafodd gweledigaeth erchyll ei rhoi i mi: “Mae'r bradwr yn bradychu, a'r dinistrydd yn dinistrio! Ymlaen, Elam! Gwarchae arni, Media! Dw i am roi taw ar y griddfan mae wedi ei achosi.”

³Yn sydyn, mae fy nghorff yn ddolur i gyd; Mae poenau yn gafael yno i fel gwraig mewn poen wrth gael babi. Dw i wedi fy llethu gan beth dw i'n ei glywed, ac wedi dychryn gan beth dw i'n ei weld.

⁴Mae'r galon yn pwmpio a dw i'n crynu mewn panig. Mae fy mreuddwyd am wawr newydd wedi troi'n hunllef:

⁵Mae “Trefnwch wledd” wedi troi'n “Gosodwch wylwyr!” “Bwytwch ac yfwch!” wedi troi'n “Codwch swyddogion! Paratowch y tariannau!”

⁶Achos dyma ddwedodd y Meistr wrtho i: “Dos, gosod wyliwr i edrych allan, a dweud beth mae'n ei weld.

⁷Pan fydd yn gweld cerbyd gyda phâr o geffylau, marchog ar asyn neu farchog ar gamel, dylai ddal sylw a gwylio'n ofalus.”

⁸Yna dyma'r gwyliwr yn gweiddi'n uchel: “Meistr, dw i wedi sefyll ar y tŵr gwylio drwy'r dydd, ac wedi edrych allan bob nos.

⁹Ac edrych draw! Mae rhywun yn dod — Dyn mewn cerbyd gyda phâr o geffylau!” Ac mae'n gweiddi'n uchel, “Mae wedi syrthio! Mae Babilon wedi syrthio! Mae'r delwau o'i holl dduwiau yn ddarnau mân ar lawr!”

¹⁰Chi sydd wedi dioddef — fy mhobl ar fy llawr dyrnu: Dw i wedi dweud wrthoch chi beth glywais i gan yr ARGLWYDD holl-bwerus, Duw Israel.

¹¹Neges am Dwma. Mae rhywun yn galw arna i o Seir: [71] “Wyliwr, faint o'r nos sydd ar ôl? Wyliwr, faint o'r nos sydd ar ôl?”

¹²Atebodd y gwyliwr, “Mae'r bore yn dod, ond daw'r nos yn ôl. Os ydych chi am ofyn eto, gofynnwch. Trowch! Dewch yn ôl!”

¹³Neges am Arabia. Cuddiwch yn nrysni'r anialwch, chi grwydriaid Dedan! [72]

¹⁴Rhowch ddiod o ddŵr i'r sychedig, chi sy'n byw yn Tema; [73] rhowch fara i'r ffoaduriaid,

¹⁵achos maen nhw'n dianc rhag y rhyfel: rhag y cleddyf wedi ei dynnu o'r wain, rhag y bwa sy'n barod i saethu, a rhag caledi'r frwydr.

¹⁶Achos dyma ddwedodd fy Meistr wrtho i: “Mewn blwyddyn union [74] bydd ysblander Cedar [75] wedi darfod;

¹⁷nifer fach iawn o arwyr Cedar sy'n saethu gyda'r bwa fydd ar ôl.” Mae'r ARGLWYDD, Duw Israel, wedi dweud.