Read Gobaith i Gymru Eseia 25 Bible Online

Eseia 25 - Gobaith i Gymru bible

Eseia 25

¹ ARGLWYDD, ti ydy fy Nuw i! Dw i'n dy ganmol di! Dw i'n moli dy enw! Ti wedi gwneud peth rhyfeddol — rhywbeth gafodd ei gynllunio ymhell yn ôl; ti'n gwbl ddibynadwy!

²Ti wedi troi dinas y gelyn yn bentwr o gerrig! Troi'r gaer amddiffynnol yn adfeilion! Gaiff y palas estron byth ei ailadeiladu!

³Felly bydd gwledydd cryfion yn dy anrhydeddu di! A threfi'r cenhedloedd creulon yn dy barchu di!

⁴Ond rwyt ti'n dal yn lle diogel i'r rhai tlawd guddio; yn lle i'r anghenus gysgodi mewn argyfwng — yn lloches rhag y storm, cysgod rhag gwres yr haul. Pan mae pobl greulon yn ein taro fel storm o law trwm,

⁵neu fel gwres yr haul yn crasu'r tir, rwyt ti'n tewi twrw'r estroniaid. Mae fel cysgod cwmwl yn dod i leddfu'r gwres, ac mae cân y gormeswr creulon yn cael ei dewi.

⁶Ar y mynydd hwn bydd yr ARGLWYDD holl-bwerus yn paratoi gwledd o fwyd blasus i'r cenhedloedd i gyd. Gwledd o winoedd aeddfed — bwyd blasus gyda'r gwin gorau.

⁷Ar y mynydd hwn bydd yn dinistrio'r llen sy'n gorchuddio wynebau'r bobloedd, a'r gorchudd sy'n bwrw cysgod dros y cenhedloedd i gyd.

⁸Bydd marwolaeth wedi ei lyncu am byth. Bydd fy Meistr, yr ARGLWYDD, yn sychu'r dagrau oddi ar bob wyneb, a symud y cywilydd sydd wedi bod ar ei bobl o'r tir. —mae'r ARGLWYDD wedi dweud.

⁹Bryd hynny bydd y bobl yn dweud: “Dyma'n Duw ni; yr un roedden ni'n disgwyl iddo'n hachub ni. Dyma'r ARGLWYDD roedden ni'n ei drystio; Gadewch i ni ddathlu a mwynhau ei achubiaeth.”

¹⁰Ydy, mae llaw yr ARGLWYDD yn gorffwys ar y mynydd hwn. Bydd Moab yn cael ei sathru ganddo fel gwellt yn cael ei sathru mewn tomen. [81†]

¹¹Bydd yn estyn ei ddwylo ar led yn ei chanol, fel nofiwr yn estyn ei ddwylo i nofio. Bydd yn gwneud i falchder Moab suddo hefo symudiad ei ddwylo.

¹²Bydd y waliau diogel sy'n eu hamddiffyn yn cael eu bwrw i lawr ganddo; bydd yn eu chwalu i'r llawr — nes byddan nhw yn y llwch.