Read Gobaith i Gymru Eseia 27 Bible Online

Eseia 27 - Gobaith i Gymru bible

Eseia 27

¹Bryd hynny bydd yr ARGLWYDD yn cosbi Lefiathan, y neidr wibiog, gyda'i gleddyf llym, mawr a didostur — Lefiathan, y neidr droellog; a bydd yn lladd Rahab, anghenfil y môr. [83] [84†]

²Bryd hynny byddwch yn canu'r gân "Y Winllan Hyfryd":

³Fi, yr ARGLWYDD, sy'n gofalu amdani, ac yn ei dyfrio hi bob amser. Dw i'n ei gwylio hi nos a dydd, rhag i rywun wneud niwed iddi.

⁴Dw i ddim yn ddig bellach: Petai rhywun yn rhoi drain a mieri i mi, byddwn yn mynd allan i ryfel yn eu herbyn, ac yn eu llosgi nhw'n ulw.

⁵Ond os ydyn nhw am i mi eu hamddiffyn nhw, rhaid iddyn nhw wneud heddwch hefo fi; ie, rhaid iddyn nhw wneud heddwch hefo fi.

⁶Mae'r amser yn dod pan fydd Jacob yn bwrw gwreiddiau, ac Israel yn tyfu ac yn blodeuo — bydd y byd i gyd yn llawn o'i ffrwyth.

⁷Gafodd e ei daro fel yr un wnaeth ei daro fe? Wnaeth e ddiodde lladdfa debyg i'r un wnaeth ei ladd e?

⁸Cafodd ei yrru i ffwrdd a'i gaethgludo i'w alw i gyfrif. Cafodd ei chwythu i ffwrdd gan wynt cryf ar ddydd y storm.

⁹Felly, dyma sut mae gwneud iawn am fai Jacob, a dyma fydd canlyniad symud ei bechod: Bydd cerrig yr allor yn cael eu malu i gyd fel petaen nhw'n garreg galch — a polion y dduwies Ashera a'r llestri dal arogldarth wedi eu torri i gyd.

¹⁰Mae'r ddinas gaerog wedi ei gadael yn wag; cartrefi gwag wedi eu gadael fel tir diffaith. Mae lloi yn pori yno, yn gorwedd i lawr ac yn bwyta popeth sydd ar y canghennau.

¹¹Yna mae'r brigau'n sychu, ac yn torri; ac mae merched yn dod ac yn cynnau tân hefo nhw. Pobl oedd ddim yn deall oedden nhw; felly doedd Duw'n dangos dim trugaredd, doedd eu Crëwr yn dangos dim caredigrwydd atyn nhw.

¹²Bryd hynny, bydd yr ARGLWYDD yn ysgwyd y goeden, o Afon Ewffrates i Wadi'r Aifft; a byddwch chi, blant Israel, yn cael eich casglu bob yn un!

¹³Bryd hynny, bydd y corn hwrdd [85] yn cael ei ganu; bydd y rhai oedd ar goll yng ngwlad Asyria, a'r rhai oedd wedi cael eu gyrru i wlad yr Aifft, yn dod i addoli'r ARGLWYDD ar y mynydd cysegredig, [86] yn Jerwsalem.