Read Gobaith i Gymru Eseia 28 Bible Online

Eseia 28 - Gobaith i Gymru bible

Eseia 28

¹Gwae Samaria! Bydd coron falch meddwon Effraim [87] yn syrthio, a'i harddwch yn ddim ond blodau wedi gwywo — blodau oedd yn tyfu ar ben dyffryn ffrwythlon. Maen nhw'n chwil gaib!

²Edrychwch! Mae gan y Meistr un cryf a dewr sydd fel storm o genllysg, ie, drycin ddinistriol — fel storm pan mae'r glaw yn arllwys i lawr ac yn bwrw popeth i'r llawr.

³Bydd coron falch meddwon Effraim wedi ei sathru dan draed,

⁴a'i blodau wedi gwywo — y blodau oedd yn tyfu ar ben dyffryn ffrwythlon. Byddan nhw fel ffigysen gynnar cyn i'r cynhaeaf ddod. Bydd rhywun yn sylwi arni ac yn ei llyncu yr eiliad mae'n gafael ynddi.

⁵Bryd hynny, bydd yr ARGLWYDD holl-bwerus yn goron hardd, ac yn dorch wedi ei phlethu'n hyfryd i'r bobl fydd wedi eu gadael ar ôl.

⁶Bydd yn rhoi arweiniad i'r un sy'n eistedd i farnu, a nerth i'r rhai sy'n amddiffyn giatiau'r ddinas.

⁷Ond mae'r rhain wedi meddwi'n gaib ar win; maen nhw'n chwil ar ôl yfed cwrw. Mae'r offeiriad a'r proffwyd wedi meddwi'n gaib ar gwrw a drysu'n lân ar win. Maen nhw'n chwil ar ôl yfed cwrw, a'i gweledigaethau'n ddryslyd; maen nhw'n baglu wrth farnu.

⁸Mae chwŷd a charthion dros y byrddau i gyd, does dim lle'n lân o gwbl.

⁹“Pwy mae e'n gallu ei ddysgu? I bwy fyddai e'n gallu esbonio rhywbeth? I blantos bach sydd newydd ddod oddi ar y frest?

¹⁰Dim ond ailadrodd llythrennau'r wyddor, ‘a, b,’ ‘a, b,’ ‘c, ch, d,’ ‘c, ch, d’ tyrd yma, bach; fan yma, bach!”

¹¹O'r gorau, bydd yn siarad gyda nhw fel un yn siarad yn aneglur mewn iaith estron.

¹²Roedd wedi dweud wrthyn nhw: “Dyma le saff, lle i'r blinedig orffwys; dyma le i chi orwedd i lawr.” Ond doedd neb yn fodlon gwrando.

¹³Felly dyma neges yr ARGLWYDD iddyn nhw: “‘a, b,’ ‘a, b,’ ‘c, ch, d,’ ‘c, ch, d’ tyrd yma, bach; fan yma, bach!” Wrth geisio mynd yn eu blaenau byddan nhw'n syrthio ar eu tinau, yn cael eu dryllio a'u rhwymo a'u dal.

¹⁴Felly dyma neges yr ARGLWYDD i chi sy'n gwawdio; chi arweinwyr y bobl yn Jerwsalem!

¹⁵Chi sy'n brolio, “Dŷn ni wedi gwneud cytundeb gyda Marwolaeth, a taro bargen i osgoi'r bedd. Pan fydd y dinistr yn ysgubo trwodd, fydd e ddim yn ein cyffwrdd ni. Dŷn ni wedi gwneud twyll yn lle i guddio, a chelwydd yn lle saff i gysgodi.”

¹⁶Dyma mae fy Meistr, yr ARGLWYDD, yn ei ddweud: “Edrychwch, dw i'n mynd i osod carreg yn Seion, carreg ddiogel, conglfaen gwerthfawr, sylfaen hollol gadarn. Fydd pwy bynnag sy'n credu ddim yn panicio.

¹⁷Bydda i'n gwneud cyfiawnder yn llinyn mesur, a tegwch yn llinyn plwm. Bydd cenllysg yn ysgubo'r twyll, sef eich lle i guddio, a bydd dŵr y llifogydd yn boddi'ch lle saff i gysgodi.

¹⁸Bydd eich cytundeb hefo Marwolaeth yn cael ei dorri, a'ch bargen gyda'r bedd yn chwalu. Pan fydd y dinistr yn ysgubo trwodd, chi fydd yn diodde'r difrod.

¹⁹Bydd yn eich taro chi bob tro y bydd yn dod heibio. Bydd yn dod un bore ar ôl y llall, bob dydd a bob nos.” Bydd deall y neges yma yn achosi dychryn ofnadwy.

²⁰Mae'r gwely'n rhy fyr i ymestyn arno, a'r garthen yn rhy gul i rywun ei lapio amdano!

²¹Bydd yr ARGLWYDD yn codi fel y gwnaeth ar Fynydd Peratsîm [88]; bydd yn cyffroi i wneud ei waith fel y gwnaeth yn Nyffryn Gibeon [89] — ond bydd yn waith rhyfedd! Bydd yn cyflawni'r dasg — ond bydd yn dasg ddieithr!

²²Felly, stopiwch wawdio, rhag i'ch rhwymau gael eu tynhau. Dw i wedi clywed fy Meistr, yr ARGLWYDD holl-bwerus, yn gorchymyn dinistrio'r wlad gyfan.

²³Gwrandwch yn astud ar hyn! Gwnewch yn siŵr eich bod yn clywed be dw i'n ddweud.

²⁴Ydy'r sawl sy'n aredig yn aredig drwy'r amser heb hau? Ydy e'n troi'r tir a'i lyfnu'n ddi-baid?

²⁵Ar ôl ei lefelu, onid ydy e'n gwasgaru ffenigl a hadau cwmin? Onid ydy e'n hau gwenith mewn rhes, haidd yn ei le, a sbelt yn ei wely?

²⁶Ei Dduw sy'n ei ddysgu; mae'n dysgu'r ffordd iawn iddo.

²⁷Dydy ffenigl ddim yn cael ei ddyrnu gyda sled, na cwmin gydag olwyn trol. Mae ffenigl yn cael ei guro hefo ffon, a cwmin gyda gwialen.

²⁸Mae gwenith yn cael ei falu, ond ddim yn ddiddiwedd. Mae olwyn trol yn rholio trosto, ond dydy'r ceffylau ddim yn ei sathru.

²⁹A'r ARGLWYDD holl-bwerus sydd wedi trefnu hyn hefyd — Mae ganddo gynllun gwych, ac mae'n rhyfeddol o ddoeth.