Read Gobaith i Gymru Eseia 29 Bible Online

Eseia 29 - Gobaith i Gymru bible

Eseia 29

¹Gwae Ariel! [90] Ariel, y ddinas ble roedd Dafydd yn byw! Mae'r blynyddoedd yn mynd heibio a'r gwyliau yn pasio yn eu tro.

²Ond dw i'n mynd i'w phoenydio, a bydd yn griddfan ac ochneidio. Bydd Ariel yn allor i aberthu i mi.

³Bydda i'n gwersylla o dy gwmpas, yn gwarchae arnat hefo byddin ac offer gwarchae i ymosod arnat ti.

⁴Byddi'n cael dy dynnu i lawr, a byddi'n galw o'r pridd; bydd dy eiriau fel rhywun yn mwmian o'r llwch. Byddi'n swnio fel ysbryd yn codi o'r pridd, bydd dy eiriau fel rhywun yn sibrwd o'r llwch.

⁵A bydd y dyrfa greulon ddaeth yn dy erbyn yn cael eu malu fel llwch mân. Bydd y dyrfa o ormeswyr fel us yn cael ei chwythu i ffwrdd. Yn sydyn, mewn chwinciad,

⁶bydd yr ARGLWYDD holl-bwerus yn eu cosbi gyda tharan, daeargryn, a sŵn byddarol; gyda corwynt, storm, a thân yn dinistrio.

⁷A bydd yr holl genhedloedd wnaeth ryfela yn erbyn Ariel — ymosod arni, ei gwarchae a'i gormesu — fel breuddwyd, neu weledigaeth yn y nos.

⁸Bydd fel rhywun sy'n llwgu yn breuddwydio ei fod yn bwyta, ac yna'n deffro a'i fol yn dal yn wag; neu rywun sydd â syched arno yn breuddwydio ei fod yn yfed, ac yna'n deffro yn teimlo'n wan a'i geg yn sych grimp. Felly bydd hi ar yr holl genhedloedd sy'n rhyfela yn erbyn Mynydd Seion.

⁹Arhoswch. Cewch eich syfrdanu! Ydych chi'n hollol ddall? Wedi meddwi — ond ddim ar win! Yn chwil — ond ddim ar gwrw!

¹⁰Mae'r ARGLWYDD wedi'ch gwneud chi'n gysglyd. Mae e wedi cau eich llygaid chi'r proffwydi, Ac wedi rhoi mwgwd dros eich pennau chi sy'n cael gweledigaethau.

¹¹Mae pob gweledigaeth fel neges mewn dogfen sydd wedi ei selio. Mae'n cael ei roi i rywun sy'n gallu darllen, a gofyn iddo, “Darllen hwn i mi”, ond mae hwnnw'n ateb, “Alla i ddim, mae wedi ei selio”.

¹²Yna mae'n cael ei roi i rywun sydd ddim yn gallu darllen, a gofyn i hwnnw, “Darllen hwn i mi”, a'i ateb e ydy “Dw i ddim yn gallu darllen.”

¹³Dyma ddwedodd y Meistr: Mae'r bobl yma'n dod ata i ac yn dweud pethau gwych amdana i, ond mae eu calonnau'n bell oddi wrtho i. Dydy eu haddoliad nhw yn ddim ond traddodiad dynol wedi ei ddysgu iddyn nhw.

¹⁴Felly, dw i'n mynd i syfrdanu'r bobl yma dro ar ôl tro gyda un rhyfeddod ar ôl y llall. Ond bydd doethineb y deallus yn darfod, a chrebwyll pobl glyfar wedi ei guddio.

¹⁵Gwae'r rhai sy'n ceisio cuddio eu cynlluniau oddi wrth yr ARGLWYDD! Y rhai sy'n gweithio yn y tywyllwch, ac yn dweud, “Pwy sy'n ein gweld ni?” “Pwy sy'n gwybod amdanon ni?”

¹⁶Dych chi mor droëdig! Ydy'r crochenydd i gael ei ystyried fel clai? Fel petai'r hyn gafodd ei greu yn dweud am yr un a'i gwnaeth, “Wnaeth e mohono i!” Neu'r hyn gafodd ei siapio yn dweud am yr un â'i siapiodd, “Dydy e'n deall dim!”

¹⁷Yn fuan iawn, oni fydd Libanus yn cael ei throi yn berllan, a Carmel yn cael ei ystyried yn goedwig.

¹⁸Bryd hynny, bydd y byddar yn clywed geiriau o lyfr, a bydd llygaid pobl ddall yn gweld ar ôl bod mewn tywyllwch dudew.

¹⁹Bydd y rhai sy'n cael eu gorthrymu yn llawenhau yn yr ARGLWYDD, a'r bobl dlotaf yn gorfoleddu yn Un Sanctaidd Israel.

²⁰Fydd dim gormeswyr o hynny ymlaen, a bydd y rhai sy'n gwawdio yn peidio â bod; bydd pawb sy'n dal ati i wneud drwg yn cael eu torri i ffwrdd.

²¹Y rhai sy'n gwneud i rywun edrych fel troseddwr, ac yn gosod trap i'r un sy'n erlyn yn y llys wrth giatiau'r ddinas, a gwneud iddo droi ymaith achos cyfiawn gyda dadl wag.

²²Felly, dyma mae'r ARGLWYDD yn ei ddweud wrth Deulu Jacob — y Duw brynodd ryddid i Abraham: Fydd Jacob ddim yn cael ei gywilyddio eto! Fydd ei wyneb ddim yn gwelwi eto!

²³Achos pan fyddan nhw'n gweld eu plant a beth fydda i wedi ei wneud yn eu plith, byddan nhw'n anrhydeddu fy enw i. Bydd pobl yn anrhydeddu Un Sanctaidd Jacob Ac yn dangos parch go iawn at Dduw Israel.

²⁴Bydd y rhai sydd wedi mynd ar gyfeiliorn yn dod i ddeall, a'r rhai sy'n cwyno o hyd wedi dysgu gwers.