Read Gobaith i Gymru Eseia 32 Bible Online

Eseia 32 - Gobaith i Gymru bible

Eseia 32

¹Edrychwch, bydd brenin yn teyrnasu yn gyfiawn, a'i dywysogion yn rheoli yn deg.

²Bydd pob un ohonyn nhw fel cysgod rhag y gwynt, a lloches rhag y storm; fel nentydd o ddŵr mewn tir sych, neu gysgod craig enfawr mewn crasdir.

³Bydd llygaid y rhai sy'n gweld yn edrych, a chlustiau'r rhai sy'n clywed yn gwrando.

⁴Bydd y difeddwl yn oedi ac yn sylwi, a thafod y rhai sydd ag atal dweud yn siarad yn glir.

⁵Fydd y ffŵl ddim yn cael ei alw'n ŵr bonheddig, na'r twyllwr yn cael ei anrhydeddu.

⁶Achos dweud pethau ffôl mae ffŵl a cynllunio i wneud pethau drwg. Mae'n ymddwyn yn annuwiol ac yn dweud celwydd am yr ARGLWYDD. Mae'n gadael y newynog hefo stumog wag ac yn gwrthod rhoi diod i'r sychedig.

⁷Mae arfau'r twyllwr yn ddrwg. Mae'n cynllunio i wneud drwg — dinistrio pobl dlawd trwy eu twyllo a cham-drin yr anghenus yn y llys.

⁸Ond mae bwriadau'r person anrhydeddus yn dda, ac mae bob amser yn gwneud beth sy'n nobl.

⁹Chi wragedd cyfforddus, safwch! Gwrandwch arna i! Chi ferched heb bryder yn y byd, gwrandwch beth dw i'n ddweud!

¹⁰Mewn llai na blwyddyn, cewch chi sydd mor hyderus eich ysgwyd. Bydd y cynhaeaf grawnwin yn methu, a dim ffrwyth i'w gasglu.

¹¹Dylech chi sy'n gyfforddus ddechrau poeni! Dylech chi sydd mor ddibryder ddechrau crynu! Tynnwch eich dillad! Stripiwch! Gwisgwch sachliain am eich canol,

¹²ac am y bronnau sy'n galaru! Dros y caeau hyfryd, a'r coed gwinwydd ffrwythlon.

¹³Dros dir fy mhobl, bydd drain a mieri yn tyfu. Ie, dros yr holl dai hyfryd, a'r dre llawn miri.

¹⁴Bydd y palas wedi ei adael, a'r ddinas boblog yn wag. Bydd y tyrau amddiffyn ar y bryniau yn troi'n foelydd am byth — yn gynefin i asynnod gwyllt a phorfa i breiddiau.

¹⁵Nes i ysbryd oddi uchod gael ei dywallt arnon ni, i'r anialwch gael ei droi'n gaeau ffrwythlon, a'r caeau droi'n goedwig.

¹⁶Pan fydd cyfiawnder yn aros yn yr anialwch a thegwch yn cartrefu yn y caeau.

¹⁷Bydd cyfiawnder yn arwain i heddwch, ac wedyn bydd llonydd a diogelwch am byth.

¹⁸Bydd fy mhobl yn byw mewn cymunedau saff, tai diogel, a lleoedd i orffwys yn dawel.

¹⁹Er i'r goedwig gael ei thorri i lawr gan genllysg ac i'r ddinas orwedd mewn cywilydd,

²⁰y fath fendith fydd i chi sy'n hau wrth ffrydiau dŵr, ac yn gollwng yr ych a'r asyn yn rhydd i bori.