Read Gobaith i Gymru Eseia 33 Bible Online

Eseia 33 - Gobaith i Gymru bible

Eseia 33

¹Gwae ti'r dinistriwr sydd heb gael dy ddinistrio; ti'r bradwr sydd heb gael dy fradychu! Pan fyddi wedi gorffen dinistrio, cei di dy ddinistrio; pan fyddi wedi gorffen bradychu, cei di dy fradychu!

²O ARGLWYDD, bydd yn drugarog wrthon ni! Dŷn ni'n disgwyl amdanat ti. Bydd di yn nerth i ni yn y bore, ac achub ni pan dŷn ni mewn trwbwl.

³Pan wyt ti'n rhuo mae pobl yn ffoi! Pan wyt ti'n codi mae cenhedloedd yn gwasgaru!

⁴Mae'r ysbail maen nhw'n ei adael yn cael ei gasglu fel petai lindys neu haid o locustiaid wedi disgyn arno.

⁵Mae'r ARGLWYDD mor ardderchog! Mae'n byw yn yr uchelder! Mae'n llenwi Seion gyda chyfiawnder a thegwch.

⁶Fe sy'n rhoi sicrwydd iddi bob amser. Stôr helaeth o achubiaeth, doethineb, gwybodaeth, a pharch at yr ARGLWYDD — dyna ei drysor iddi.

⁷Gwrandwch! Mae eu harwr yn gweiddi y tu allan! Mae negeswyr heddwch yn wylo'n chwerw!

⁸Mae'r priffyrdd yn wag! Mae'r teithwyr wedi diflannu! Mae'r cytundebau wedi eu torri, a'r tystion yn cael eu dirmygu. Does dim parch at fywyd dynol.

⁹Y fath alar! Mae'r tir wedi darfod amdano! Mae Libanus yn crino a gwywo! Mae Saron fel anialwch, a Bashan a Carmel wedi colli eu dail.

¹⁰“Dw i'n mynd i godi nawr,” meddai'r ARGLWYDD, “Dw i'n mynd i godi i fyny, cewch weld mor uchel ydw i!

¹¹Dim ond us dych chi'n ei feichiogi; dim ond gwellt fydd yn cael ei eni! Mae eich ysbryd fel tân fydd yn eich dinistrio chi!

¹²Bydd eich pobl fel calch wedi ei losgi, neu ddrain wedi eu torri a'u rhoi ar dân.

¹³Chi sy'n bell i ffwrdd, gwrandwch beth dw i wedi ei wneud! A chi sy'n agos, gwelwch mor nerthol ydw i.”

¹⁴Mae pechaduriaid Seion wedi dychryn, Mae'r rhai annuwiol yn crynu mewn ofn. “Pwy all oroesi yn y tân dinistriol yma? Pwy all fyw gyda fflamau sydd byth yn diffodd?”

¹⁵Yr un sy'n gwneud beth sy'n iawn ac yn dweud y gwir, sy'n gwrthod elwa drwy dwyll, na derbyn breib, yn gwrthod gwrando ar gynllwyn i dywallt gwaed, ac yn cau ei lygaid rhag cael ei ddenu i wneud drwg.

¹⁶Person felly fydd yn saff rhag y cwbl, a chreigiau uchel yn gaer o'i gwmpas. Bydd bwyd yn cael ei roi i'w gynnal a bydd digonedd o ddŵr iddo.

¹⁷Byddi'n gweld brenin yn ei holl ysblander, a thir eang yn ymestyn i'r pellter.

¹⁸Byddi'n cofio am yr ofn a fu unwaith, “Ble mae'r un oedd yn cyfri'r trethi? Ble mae'r un oedd yn pwyso'r arian? Ble mae'r un oedd yn cyfri'r tyrau?”

¹⁹Fyddi di ddim yn gweld y bobl farbaraidd yna eto — yn siarad iaith doeddet ti ddim yn ei deall, ac yn paldaruo'n ddiystyr.

²⁰Dychmyga Seion, dinas ein gwyliau crefyddol! Byddi'n gweld Jerwsalem fel lle tawel i fyw — pabell does dim rhaid ei phacio, gyda pegiau fydd neb yn eu tynnu byth eto, a rhaffau fydd byth yn torri.

²¹Bydd yr ARGLWYDD yno gyda ni yn ei fawredd! Ardal o afonydd a ffrydiau llydan yn llifo, ond heb longau gali sy'n cael eu rhwyfo na llongau hwylio mawr yn mynd heibio.

²²Yr ARGLWYDD ydy'n barnwr ni, Yr ARGLWYDD ydy'n llywodraethwr ni, Yr ARGLWYDD ydy'n brenin ni — fe ydy'r un fydd yn ein hachub ni!

²³Byddi'n cael dy ddarn o dir a fyddan nhw ddim yn gallu gosod eu polyn fflag na chodi eu baner yno. Bydd digonedd o ysbail i gael ei rannu, a bydd hyd yn oed y cloff yn cael ei siâr.

²⁴Fydd neb sy'n byw yno'n dweud, “Dw i'n sâl!” Bydd y bobl sy'n byw yno wedi cael maddeuant am bob bai.