Read Gobaith i Gymru Eseia 5 Bible Online

Eseia 5 - Gobaith i Gymru bible

Eseia 5

¹Gad i mi ganu cân i'm cariad annwyl — Cân fy nghariad am ei winllan. Roedd gan fy nghariad winllan ar fryn oedd yn ffrwythlon iawn.

²Palodd y tir a chlirio'r cerrig, a phlannu gwinwydden arbennig ynddi. Adeiladodd dŵr gwylio yn ei chanol, a naddu gwinwasg ynddi. Roedd yn disgwyl cael grawnwin da, ond gafodd e ddim ond rhai drwg.

³Felly, chi bobl Jerwsalem a'r rhai sy'n byw yn Jwda — Beth ydy'ch barn chi? Beth ddylwn ni ei wneud gyda'm gwinllan?

⁴Oedd yna rywbeth mwy y gallwn ei wneud i'm gwinllan nag a wnes i? Pan oeddwn i'n disgwyl cael grawnwin da pam ges i ddim ond rhai drwg?

⁵Nawr, gadewch i mi ddweud wrthoch chi be dw i'n mynd i wneud gyda'm gwinllan: Dw i'n mynd i symud ei chlawdd iddi gael ei dinistrio; a chwalu'r wal iddi gael ei sathru dan draed.

⁶Bydda i'n ei gwneud yn dir diffaith; fydd neb yn ei thocio na'i chwynnu, a bydd yn tyfu'n wyllt gyda mieri a drain. A bydda i'n gorchymyn i'r cymylau beidio glawio arni.

⁷Gwinllan yr ARGLWYDD holl-bwerus ydy pobl Israel, a'r planhigion ofalodd amdanyn nhw ydy pobl Jwda. Roedd yn disgwyl gweld cyfiawnder, ond trais a gafodd. Roedd yn disgwyl am degwch, ond gwaedd daer a glywodd!

⁸Gwae y rhai sy'n cydio tŷ wrth dŷ, ac yn ychwanegu cae at gae, nes bod dim lle i neb arall fyw yn y wlad!

⁹Dw i wedi clywed yr ARGLWYDD holl-bwerus yn dweud: Bydd llawer o dai yn cael eu dinistrio, Fydd neb yn byw yn y tai mawr, crand.

¹⁰Bydd deg acer o winllan yn rhoi llai na chwe galwyn o win; a chae lle heuwyd deg mesur o had yn rhoi ond un mesur yn ôl.

¹¹Gwae'r rhai sy'n codi'n fore i yfed diod feddwol, ac yn aros ar eu traed gyda'r nos dan ddylanwad gwin.

¹²Y rhai sy'n cael partïon gyda'r delyn a'r nabl, y drwm a'r pib — a gwin! Ond sy'n cymryd dim sylw o'r ARGLWYDD, nac yn gweld beth mae'n ei wneud.

¹³Felly, bydd fy mhobl yn cael eu caethgludo am beidio cymryd sylw. Bydd y bobl fawr yn marw o newyn, a'r werin yn gwywo gan syched.

¹⁴Bydd chwant bwyd ar fyd y meirw, bydd yn agor ei geg yn anferth, a bydd ysblander Jerwsalem a'i chyffro, ei sŵn a'i sbri yn llithro i lawr iddo.

¹⁵Bydd pobl yn cael eu darostwng a pawb yn cywilyddio; bydd llygaid y balch wedi syrthio.

¹⁶Ond bydd yr ARGLWYDD holl-bwerus wedi ei ddyrchafu trwy ei gyfiawnder; a'r Duw sanctaidd wedi profi ei fod yn sanctaidd drwy ei degwch.

¹⁷Bydd ŵyn yn pori yno fel yn eu cynefin, a chrwydriaid yn bwyta yn adfeilion y cyfoethog.

¹⁸Gwae'r rhai sy'n llusgo drygioni gyda rhaffau twyll, a llusgo pechod ar eu holau fel trol!

¹⁹Y rhai sy'n dweud, “Gadewch iddo wneud rhywbeth yn sydyn, i ni gael gweld; Gadewch i ni weld pwrpas Un Sanctaidd Israel, i ni gael gwybod beth ydy e!”

²⁰Gwae'r rhai sy'n galw drwg yn dda a da yn ddrwg; sy'n dweud fod tywyllwch yn olau a golau yn dywyllwch; sy'n galw'r chwerw yn felys a'r melys yn chwerw!

²¹Gwae'r rhai sy'n meddwl eu bod nhw'n ddoeth, ac yn ystyried eu hunain mor glyfar!

²²Gwae'r rhai sy'n arwyr wrth yfed gwin — ac yn meddwl eu bod nhw'n rêl bois wrth gymysgu'r diodydd!

²³Y rhai sy'n gollwng troseddwyr yn rhydd am freib, [15†] ac yn gwrthod rhoi dedfryd gyfiawn i'r dieuog.

²⁴Felly, fel gwellt yn llosgi yn y fflamau a gwair yn crino yn y gwres, bydd eu gwreiddiau yn pydru, a'u blagur yn cael ei chwythu ymaith fel llwch. Am eu bod wedi gwrthod beth mae'r ARGLWYDD holl-bwerus yn ei ddysgu, a chymryd dim sylw o neges Un Sanctaidd Israel.

²⁵Dyna pam roedd yr ARGLWYDD wedi digio gyda'i bobl. Dyna pam wnaeth e droi yn eu herbyn nhw, a'u taro nhw. Roedd y mynyddoedd yn crynu, a'r cyrff yn gorwedd fel sbwriel ar y strydoedd. Ac eto wnaeth Duw ddim tawelu, roedd yn dal yn eu herbyn nhw.

²⁶Bydd e'n codi baner i alw cenedl o bell, ac yn chwibanu ar un o ben draw'r byd. Ac edrychwch, maen nhw'n dod ar ras wyllt!

²⁷Does neb yn blino nac yn baglu'n ei rhengoedd; neb yn pendwmpian nac yn cysgu; neb â'i felt wedi ei datod, na charrai ei esgid wedi torri.

²⁸Mae eu saethau'n finiog, a'u bwâu i gyd yn dynn. Mae carnau'r meirch yn galed fel carreg, ac olwynion eu cerbydau yn troi fel corwynt.

²⁹Mae eu rhuad fel llew, maen nhw'n rhuo fel llewod ifanc sy'n chwyrnu wrth ddal yr ysglyfaeth a'i lusgo i ffwrdd — all neb ei achub!

³⁰Bryd hynny, bydd sŵn y rhuo fel tonnau'r môr yn taro'r tir. Wrth edrych tua'r tir gwelir tywyllwch ac argyfwng, a'r golau'n troi'n dywyllwch yn y cymylau o ewyn.