Read Gobaith i Gymru Eseia 60 Bible Online

Eseia 60 - Gobaith i Gymru bible

Eseia 60

¹“Cod! Disgleiria! Mae dy olau wedi dod. Mae ysblander yr ARGLWYDD wedi gwawrio arnat!

²Er bod tywyllwch yn gorchuddio'r ddaear, a thywyllwch dudew dros y gwledydd; bydd yr ARGLWYDD yn tywynnu arnat ti, a bydd ei ysblander i'w weld arnat.

³Bydd cenhedloedd yn dod at dy oleuni, a brenhinoedd yn troi at dy wawr ddisglair.

⁴Edrych o dy gwmpas! Maen nhw i gyd yn ymgasglu! Maen nhw'n dod atat ti! Bydd dy feibion yn dod o wledydd pell, a dy ferched yn cael eu cario adre.

⁵Pan weli hyn byddi'n wên i gyd; bydd dy galon yn curo wrth brofi'r wefr. Bydd cyfoeth y moroedd yn cael ei roi i ti, a cyfoeth y gwledydd yn dod atat.

⁶Bydd gyrroedd o gamelod yn llenwi dy strydoedd; camelod o Midian, Effa a Sheba. [138] Byddan nhw'n cario aur a thus, ac yn canu mawl i'r ARGLWYDD.

⁷Bydd holl ddefaid a geifr Cedar yn cael eu casglu atat, a bydd hyrddod Nebaioth [139] yna i ti eu defnyddio; byddan nhw'n aberthau derbyniol ar fy allor i. Bydda i'n gwneud fy nhŷ hardd yn harddach fyth!

⁸Pwy ydy'r rhain sy'n symud fel cwmwl, ac yn hedfan fel colomennod i'w nythod?

⁹Mae cychod yr ynysoedd yn ymgasglu, a llongau masnach Tarshish [140] ar y blaen. Maen nhw'n dod â dy blant o bell, a'u harian a'u haur hefo nhw, i'w gyflwyno i'r ARGLWYDD dy Dduw — Un Sanctaidd Israel, sydd wedi dy anrhydeddu.

¹⁰Bydd estroniaid yn ailadeiladu dy waliau, a'u brenhinoedd nhw yn dy wasanaethu di. Achos, er fy mod wedi dy daro di pan oeddwn i'n ddig dw i am ddangos tosturi a bod yn garedig.

¹¹Bydd dy giatiau ar agor drwy'r amser; fyddan nhw ddim yn cael eu cau ddydd na nos — er mwyn i gyfoeth y cenhedloedd a'u brenhinoedd gael ei gario i mewn.

¹²Bydd y wlad neu'r deyrnas sy'n gwrthod dy wasanaethu yn syrthio; bydd y gwledydd hynny'n cael eu dinistrio'n llwyr.

¹³Bydd coed gorau Libanus yn dod i ti — coed cypres, planwydd a pinwydd i harddu fy nghysegr, ac anrhydeddu'r lle mae fy nhraed i'n gorffwys.

¹⁴Bydd plant y rhai oedd yn dy ormesu yn dod o dy flaen ac ymgrymu. Bydd y rhai oedd yn dy gasáu yn plygu'n isel ar y llawr wrth dy draed di. Byddan nhw'n dy alw di yn ‘Ddinas yr ARGLWYDD’, a ‘Seion Un Sanctaidd Israel.’

¹⁵Yn lle bod wedi dy wrthod, a dy gasáu, a neb yn mynd trwot ti, bydda i'n dy wneud di'n destun balchder am byth — yn llawenydd o un genhedlaeth i'r llall.

¹⁶Byddi'n yfed o laeth y cenhedloedd, ac yn sugno bronnau brenhinoedd. Wedyn byddi di'n gwybod mai fi ydy'r ARGLWYDD sy'n dy achub, Ie, fi, Un Cryf Jacob, sy'n dy ollwng di yn rhydd.

¹⁷Bydda i'n dod ag aur yn lle pres ac arian yn lle haearn; pres yn lle coed a haearn yn lle cerrig. "Heddwch" fydd yn llywodraethu arnat, a "Cyfiawnder" fydd dy feistri.

¹⁸Fydd neb yn gweiddi ‘Trais!’ yn y wlad byth eto, a fydd dim dinistr o fewn dy ffiniau. Byddi'n galw dy waliau yn "Achubiaeth" a dy giatiau yn "Foliant".

¹⁹Fydd dim angen yr haul i oleuo'r dydd, na llewyrch y lleuad yn olau yn y nos. Yr ARGLWYDD fydd dy olau di am byth, a bydd ysblander dy Dduw yn disgleirio arnat.

²⁰Fydd dy haul ddim yn machlud byth mwy, a llewyrch y lleuad ddim yn cilio; yr ARGLWYDD fydd dy olau di am byth, a bydd dy gyfnod o alaru drosodd.

²¹Bydd dy bobl i gyd yn gyfiawn, ac yn etifeddu'r tir am byth. Nhw ydy'r blagur dw i wedi ei blannu, gwaith fy llaw sy'n fy anrhydeddu.

²²Bydd yr un fechan yn troi yn llwyth; a'r lleiaf yn troi'n genedl fawr. Fi ydy'r ARGLWYDD! Pan ddaw'r amser iawn bydda i'n gwneud hyn ar frys!”