Read Gobaith i Gymru Eseia 9 Bible Online

Eseia 9 - Gobaith i Gymru bible

Eseia 9

¹Ond fydd y tywyllwch ddim yn para i'r tir aeth drwy'r fath argyfwng! Y tro cyntaf, cafodd tir Sabulon a thir Nafftali eu cywilyddio; ond yn y dyfodol bydd Duw yn dod ag anrhydedd i Galilea'r Cenhedloedd, ar Ffordd y Môr, a'r ardal yr ochr arall i'r Afon Iorddonen.

²Mae'r bobl oedd yn byw yn y tywyllwch wedi gweld golau llachar. Mae golau wedi gwawrio ar y rhai oedd yn byw dan gysgod marwolaeth.

³Ti wedi lluosogi'r genedl, a'i gwneud yn hapus iawn; Maen nhw'n dathlu o dy flaen di fel ffermwyr adeg y cynhaeaf, neu filwyr yn cael sbri wrth rannu'r ysbail.

⁴Achos rwyt ti wedi torri'r iau oedd yn faich arnyn nhw, a'r ffon oedd yn curo eu cefnau nhw — sef gwialen y meistr gwaith — fel y gwnest ti bryd hynny yn Midian. [27]

⁵Bydd yr esgidiau fu'n sathru maes y gâd, a'r gwisgoedd gafodd eu rholio mewn gwaed, yn cael eu taflu i'r fflamau i'w llosgi.

⁶Achos mae plentyn wedi cael ei eni i ni; mab wedi cael ei roi i ni. Bydd e'n cael y cyfrifoldeb o lywodraethu. A bydd yn cael ei alw yn Strategydd rhyfeddol, y Duw arwrol, Tad yr oesoedd, Tywysog heddwch.

⁷Fydd ei lywodraeth ddim yn stopio tyfu, a bydd yn dod â llwyddiant di-ben-draw i orsedd Dafydd a'i deyrnas. Bydd yn ei sefydlu a'i chryfhau a teyrnasu'n gyfiawn ac yn deg o hyn allan, ac am byth. Mae'r ARGLWYDD holl-bwerus yn benderfynol o wneud hyn i gyd.

⁸Dyma'r neges anfonodd y Meistr yn erbyn Jacob, a dyna ddigwyddodd i Israel.

⁹Roedd y bobl i gyd yn cydnabod hynny — Effraim [28] a'r rhai sy'n byw yn Samaria. Er yn dal yn falch ac ystyfnig, yn honni:

¹⁰“Mae'r blociau pridd wedi syrthio, ond byddwn yn ailadeiladu hefo cerrig nadd! Mae'r coed sycamor wedi eu torri i lawr, ond gadewch i ni dyfu cedrwydd yn eu lle!”

¹¹Gadawodd yr ARGLWYDD i elynion Resin ei gorchfygu hi. Roedd e wedi arfogi ei gelynion —

¹²daeth Syria o'r dwyrain a Philistia o'r gorllewin — Roedd eu cegau'n llydan agored, a dyma nhw'n llyncu tir Israel. Eto wnaeth Duw ddim stopio bod yn ddig, roedd yn dal yn eu herbyn nhw.

¹³Dydy'r bobl ddim wedi troi'n ôl at yr un wnaeth eu taro nhw; Dŷn nhw ddim wedi ceisio'r ARGLWYDD holl-bwerus.

¹⁴Felly bydd yr ARGLWYDD yn torri pen a chynffon Israel; y gangen balmwydd a'r frwynen ar yr un diwrnod.

¹⁵Yr arweinwyr a'r bobl bwysig — nhw ydy'r pen; y proffwydi sy'n dysgu celwydd — nhw ydy'r gynffon.

¹⁶Mae'r arweinwyr wedi camarwain, a'r rhai sy'n eu dilyn wedi llyncu'r cwbl.

¹⁷Dyna pam nad ydy'r ARGLWYDD yn hapus gyda'r bobl ifanc; Dydy e ddim yn gallu cysuro'r plant amddifad a'r gweddwon. Maen nhw i gyd yn annuwiol ac yn ddrwg; maen nhw i gyd yn dweud pethau dwl. Eto wnaeth Duw ddim stopio bod yn ddig, roedd yn dal yn eu herbyn nhw.

¹⁸Mae drygioni yn llosgi fel tân, ac yn dinistrio'r drain a'r mieri; mae'n llosgi drwy ddrysni'r coed nes bod y mwg yn codi yn golofnau.

¹⁹Pan mae'r ARGLWYDD holl-bwerus wedi digio, mae'r wlad yn llosgi. Mae'r bobl fel tanwydd, a does neb yn poeni am neb arall.

²⁰Maen nhw'n torri cig fan yma, ond yn dal i newynu; maen nhw'n bwyta fan acw ond ddim yn cael digon. Maen nhw'n brathu ac anafu ei gilydd —

²¹Manasse'n ymosod ar Effraim ac Effraim ar Manasse, a'r ddau yn ymladd yn erbyn Jwda! Eto wnaeth Duw ddim stopio bod yn ddig, Roedd yn dal yn eu herbyn nhw.