Read Gobaith i Gymru Jeremeia 10 Bible Online

Jeremeia 10 - Gobaith i Gymru bible

Jeremeia 10

¹ [1-2] Bobl Israel, gwrandwch beth mae'r ARGLWYDD yn ei ddweud wrthoch chi: “Peidiwch gwneud yr un fath â'r gwledydd paganaidd. Peidiwch cymryd sylw o ‛arwyddion‛ y sêr a'r planedau, a gadael i bethau felly eich dychryn chi, fel maen nhw'n dychryn y gwledydd hynny.

³Dydy arferion paganaidd felly yn dda i ddim! Mae coeden yn cael ei thorri i lawr yn y goedwig, ac mae cerfiwr yn gwneud eilun ohoni gyda chŷn.

⁴Wedyn mae'n ei addurno gydag arian ac aur, ac yn defnyddio morthwyl a hoelion i'w ddal yn ei le, rhag iddo syrthio!

⁵Mae'r eilunod yma fel bwganod brain mewn gardd lysiau. Allan nhw ddim siarad; allan nhw ddim cerdded, felly mae'n rhaid eu cario nhw i bobman. Peidiwch bod a'u hofn nhw — allan nhw wneud dim niwed i chi, na gwneud dim i'ch helpu chi chwaith!”

⁶“O ARGLWYDD, does dim un ohonyn nhw'n debyg i ti. Ti ydy'r Duw mawr, sy'n enwog am dy fod mor bwerus!

⁷Ti ydy Brenin y cenhedloedd, felly dylai pawb dy addoli di — dyna wyt ti'n ei haeddu! Dydy pobl fwya doeth y gwledydd i gyd a'r teyrnasoedd ddim byd tebyg i ti.

⁸Pobl wyllt a dwl ydyn nhw, yn meddwl y gall eilun pren eu dysgu nhw! [41]

⁹Maen nhw'n dod ag arian wedi ei guro o Tarshish, ac aur pur o Wffas, i orchuddio'r delwau. Dim ond gwaith llaw cerfiwr a gof aur ydy'r rheiny; a'u dillad glas a phorffor yn waith teiliwr medrus!

¹⁰Yr ARGLWYDD ydy'r unig Dduw go iawn — y Duw byw, sy'n frenin am byth! Pan mae e'n ddig mae'r ddaear yn crynu. Mae'r cenhedloedd yn cuddio oddi wrth ei ddicter.”

¹¹(Dylech ddweud wrth y cenhedloedd: “Wnaeth y ‛duwiau‛ yma ddim creu y nefoedd a'r ddaear. Byddan nhw i gyd yn diflannu — fydd dim sôn amdanyn nhw yn unman!”) [42]

¹²Yr ARGLWYDD ddefnyddiodd ei rym i greu y ddaear. Fe ydy'r un osododd y byd yn ei le trwy ei ddoethineb, a lledu'r awyr trwy ei ddeall.

¹³Mae sŵn ei lais yn gwneud i'r awyr daranu. Mae'n gwneud i gymylau ddod i'r golwg ar y gorwel. Mae'n gwneud i fellt fflachio yng nghanol y glaw. Mae'n dod â'r gwynt allan o'i stordai i chwythu.

¹⁴Mae pobl mor ddwl! Dŷn nhw'n gwybod dim byd! Bydd yr eilunod yn codi cywilydd ar y rhai a'i gwnaeth nhw. Duwiau ffals ydy'r delwau; does dim bywyd ynddyn nhw.

¹⁵Dŷn nhw'n dda i ddim! Pethau i wneud sbort ohonyn nhw! Mae'r amser yn dod pan gân nhw eu cosbi a'u dinistrio.

¹⁶Dydy Duw Jacob ddim byd tebyg iddyn nhw. Fe ydy'r un wnaeth greu pob peth, ac mae pobl Israel yn bobl sbesial iddo. Yr ARGLWYDD holl-bwerus ydy ei enw!

¹⁷Mae'r gelyn o'ch cwmpas yn gwarchae [43], felly heliwch eich pac yn barod i fynd!

¹⁸Ie, dyma mae'r ARGLWYDD yn ei ddweud: Dw i'n mynd i daflu'r bobl allan o'r wlad yma, nawr! Maen nhw'n mynd i fod mewn helbul go iawn, a byddan nhw'n teimlo'r peth i'r byw.

¹⁹Meddai Jerwsalem, “Mae ar ben arna i! Dw i wedi fy anafu'n ddifrifol. Roeddwn i'n arfer meddwl, ‘Salwch ydy e a bydda i'n dod drosto.’

²⁰Mae fy mhabell wedi ei dryllio, a'r rhaffau i gyd wedi eu torri. Mae fy mhlant wedi mynd, a fyddan nhw ddim yn dod yn ôl. Does neb ar ôl i godi'r babell eto, nac i hongian y llenni tu mewn iddi.

²¹Mae'r arweinwyr [44] wedi bod mor ddwl! Dŷn nhw ddim wedi gofyn i'r ARGLWYDD am arweiniad. Maen nhw wedi methu'n llwyr, ac mae eu praidd nhw wedi eu gyrru ar chwâl.

²²Gwrandwch! Mae'r si ar led! Mae'n dod! Sŵn twrw'r fyddin yn dod o gyfeiriad y gogledd. Mae'n dod i droi trefi Jwda yn rwbel, ac yn lle i siacaliaid fyw.

²³ ARGLWYDD, dw i'n gwybod na all pobl reoli eu bywydau. Dŷn nhw ddim yn gallu trefnu beth sy'n mynd i ddigwydd.

²⁴Felly, ARGLWYDD, cywira ni, ond paid bod yn rhy galed. Paid gwylltio, neu bydd dim ohonon ni ar ôl.

²⁵Tywallt dy lid ar y bobloedd sydd ddim yn dy nabod, a'r llwythau hynny sydd ddim yn dy addoli. Nhw ydy'r rhai sydd wedi llarpio pobl Jacob — wedi eu dinistrio nhw'n llwyr a gadael y wlad yn adfeilion.”