Read Gobaith i Gymru Galarnad 5 Bible Online

Galarnad 5 - Gobaith i Gymru bible

Galarnad 5

¹ ARGLWYDD, cofia beth sydd wedi digwydd i ni. Edrycha arnon ni yn ein cywilydd!

²Mae'n gwlad [20] wedi ei rhoi yn nwylo'r gelyn, a'n cartrefi wedi eu meddiannu gan bobl estron.

³Dŷn ni fel plant amddifad, heb dadau, ac mae ein mamau fel gwragedd gweddwon.

⁴Rhaid i ni brynu dŵr i'w yfed, a thalu am y coed tân dŷn ni'n ei gasglu.

⁵Dŷn ni'n cael ein gyrru fel anifeiliaid â iau ar eu gwarrau; wedi blino'n lân, ac yn cael dim gorffwys.

⁶Gwnaethon gytundeb gyda'r Aifft ac Asyria, er mwyn cael digon o fwyd i fyw.

⁷Roedd ein hynafiaid, sy'n farw bellach, wedi pechu; a dŷn ni'n diodde canlyniadau eu drygioni nhw. [21†]

⁸Mae caethweision yn feistri arnon ni, a does neb yn gallu'n hachub ni o'u gafael nhw.

⁹Dŷn ni'n gorfod mentro'n bywydau i nôl bwyd, am fod lladron arfog yn cuddio yng nghefn gwlad.

¹⁰Mae newyn yn achosi i ni ddiodde o dwymyn; mae ein croen yn teimlo'n boeth fel ffwrn.

¹¹Mae'r gwragedd yn cael eu treisio yn Seion, a'r merched ifanc yn nhrefi Jwda.

¹²Mae'r gelyn wedi crogi ein harweinwyr, a cham-drin y rhai hynaf ohonynt.

¹³Mae'r dynion ifanc yn cael eu gorfodi i weithio'r maen melin, a'r bechgyn yn baglu wrth gario llwyth o goed.

¹⁴Dydy'r arweinwyr hŷn ddim yn cyfarfod wrth giât y ddinas, ac mae'r bechgyn ifanc wedi stopio canu eu cerddoriaeth.

¹⁵Mae pob llawenydd wedi diflannu; yn lle dawnsio dŷn ni'n galaru.

¹⁶Mae'r dathlu wedi dod i ben. Gwae ni, dŷn ni wedi pechu!

¹⁷Dŷn ni'n teimlo'n sâl, ac wedi colli pob hyder; mae'r sbarc wedi diflannu o'n llygaid,

¹⁸am fod Mynydd Seion yn gorwedd yn wag; dim ond siacaliaid sydd yno'n prowla.

¹⁹Ond rwyt ti, ARGLWYDD, yn teyrnasu am byth; mae dy orsedd yn para ar hyd y cenedlaethau.

²⁰Pam wyt ti wedi anghofio amdanon ni? Pam wyt ti wedi troi cefn arnon ni mor hir?

²¹Tynn ni'n ôl atat dy hun, ARGLWYDD, i ni droi nôl. Gwna ni eto fel roedden ni ers talwm.

²²Neu wyt ti wedi'n gwrthod ni'n llwyr? Wyt ti wedi digio'n lân gyda ni?