Read Gobaith i Gymru Eseciel 2 Bible Online

Eseciel 2 - Gobaith i Gymru bible

Eseciel 2

¹Dyma'r llais yn dweud, “Ddyn [2], saf ar dy draed; dw i eisiau siarad â ti.”

²Dyma ysbryd yn dod i mewn i mi a gwneud i mi sefyll ar fy nhraed. A dyma'r llais oedd yn siarad â mi

³yn dweud: “Ddyn, dw i'n dy anfon di at bobl Israel. Maen nhw wedi gwrthryfela yn fy erbyn i — nhw a'u hynafiaid hefyd.

⁴Maen nhw'n bobl benstiff ac ystyfnig. Rwyt i ddweud wrthyn nhw, ‘Dyma mae'r Meistr, yr ARGLWYDD, yn ei ddweud.’

⁵Os byddan nhw'n gwrando neu beidio — wedi'r cwbl maen nhw'n griw o rebeliaid — byddan nhw o leia'n gwybod fod proffwyd wedi bod gyda nhw.

⁶“Ond paid dychryn pan fyddan nhw'n dy fygwth di. Bydd fel cael mieri a drain o dy gwmpas di ym mhobman, neu eistedd yng nghanol sgorpionau — ond paid ti bod ag ofn wrth iddyn nhw fygwth ac edrych yn gas arnat ti.

⁷Dywed di wrthyn nhw beth ydy'r neges gen i, os ydyn nhw am wrando neu beidio. Maen nhw'n griw anufudd.

⁸Gwna di'n siŵr dy fod ti'n gwrando arna i. Paid ti â tynnu'n groes. Agor dy geg a bwyta'r hyn dw i'n ei roi i ti.”

⁹A dyna pryd gwelais i law wedi ei hestyn allan ata i. Roedd y llaw yn dal sgrôl. [3]

¹⁰Dyma'r sgrôl yn cael ei hagor o'm blaen i. Roedd ysgrifen ar y ddwy ochr — a'r teitl oedd “Caneuon o alar, tristwch a gwae”.