Read Gobaith i Gymru Eseciel 27 Bible Online

Eseciel 27 - Gobaith i Gymru bible

Eseciel 27

¹Dyma'r ARGLWYDD yn rhoi'r neges yma i mi:

²“Ddyn, dw i eisiau i ti ganu cân i alaru ar ôl Tyrus.

³Dywed wrth Tyrus, sy'n eistedd wrth borthladdoedd, ac yn ganolfan fasnachol bwysig i weddill y byd: ‘Dyma mae'r ARGLWYDD, y Meistr, yn ei ddweud: O Tyrus, rwyt yn brolio mai ti ydy harddwch yn ei berffeithrwydd.

⁴Gyda dy ffiniau yng nghanol y moroedd, cest dy lunio fel y llong berffaith —

⁵dy fyrddau o goed pinwydd Senir a dy fast o goed cedrwydd Libanus.

⁶Dy rwyfau o goed derw Bashan, a dy gorff yn bren cypres o dde Cyprus, wedi ei addurno ag ifori.

⁷Dy hwyl o liain main gorau'r Aifft wedi ei brodio'n batrymau, ac yn faner i bawb dy nabod. Y llen dros y dec yn borffor a phiws; defnydd o lannau Elisha.

⁸Arweinwyr Sidon ac Arfad oedd dy rwyfwyr, a dynion medrus Tyrus yn forwyr wrth yr helm.

⁹Roedd arweinwyr Gebal ar dy fwrdd yn trwsio unrhyw niwed. Roedd y llongau i gyd a'u criwiau yn galw yn dy borthladdoedd i gyfnewid nwyddau.

¹⁰Roedd dynion o wledydd pell — Persia, Lydia a Libia — yn filwyr yn dy fyddin. Yn hongian tarian a helmed ar dy waliau; ac yn rhoi i ti enw gwych.

¹¹“‘Roedd dynion Arfad a Helech yn gwarchod dy waliau, a dynion Gammad ar y tyrau amddiffynnol. Roedden nhw'n hongian eu cewyll saethau ar dy waliau, a gwneud dy harddwch yn berffaith.

¹²“‘Roeddet ti'n masnachu gyda Tarshish [58] bell, ac yn cyfnewid arian, haearn, tin a phlwm am dy nwyddau.

¹³Roedd Iafan, Twbal a Meshech yn cyfnewid caethweision a nwyddau pres.

¹⁴Beth-togarma yn cyfnewid ceffylau, meirch a mulod.

¹⁵Roeddet ti'n masnachu gyda phobl Rhodos, a llawer o ynysoedd eraill. Roedden nhw'n talu gydag ifori a choed eboni.

¹⁶Roedd Edom [59] yn delio gyda ti am dy fod yn gwerthu cymaint o bethau gwahanol. Roedden nhw'n talu gyda meini gwerthfawr, defnydd porffor, defnydd wedi ei frodio, lliain main drud, cwrel, a rhuddem.

¹⁷A Jwda a gwlad Israel hefyd, yn cyfnewid gwenith o Minnith, ffigys, mêl, olew olewydd a gwm balm.

¹⁸Roedd Damascus yn delio gyda ti am fod gen ti gymaint o nwyddau ac am dy fod ti mor gyfoethog. Roedden nhw'n dod â gwin o Chelbon, gwlân o Sachar,

¹⁹a casgenni o win o Isal. Haearn bwrw, powdr casia a sbeisiau persawrus hefyd.

²⁰Roedd Dedan yn cynnig eu carthenni cyfrwy.

²¹Arabia a shîcs Cedar yn gwerthu ŵyn, hyrddod a geifr.

²²Masnachwyr Sheba a Raama yn cynnig eu perlysiau gorau, meini gwerthfawr o bob math ac aur.

²³Roedd Haran, Canne ac Eden, a masnachwyr Sheba, Ashŵr a Cilmad yn gwsmeriaid i ti hefyd,

²⁴yn cynnig dillad costus, defnydd porffor, brodwaith a charpedi amryliw wedi eu clymu a'u plethu'n dynn.

²⁵Roedd llongau masnach mawr [60] yn cludo dy nwyddau ar draws y moroedd. Roeddet fel llong wedi ei llwytho'n llawn, yng nghanol y moroedd.

²⁶Ond aeth dy rwyfwyr â ti i ganol storm ar y môr mawr! Daeth gwynt y dwyrain i dy ddryllio yng nghanol y moroedd.

²⁷“‘Mae diwrnod dy ddryllio'n dod, a byddi'n suddo yng nghanol y môr, gyda dy gyfoeth i gyd, dy nwyddau, dy fasnach, dy forwyr, dy rwyfwyr, dy grefftwyr, dy fasnachwyr a dy filwyr — pawb sydd ar dy fwrdd.

²⁸Bydd y morwyr yn gweiddi nes i gefn gwlad grynu.

²⁹Bydd rhwyfwyr a morwyr yn gadael eu llongau i sefyll ar dir sych.

³⁰Byddan nhw'n galaru'n uchel ac yn crïo'n chwerw; byddan nhw'n taflu pridd ar eu pennau ac yn rholio mewn lludw.

³¹Byddan nhw'n siafio eu pennau ac yn gwisgo sachliain. Byddan nhw'n wylo'n chwerw wrth alaru ar dy ôl.

³²Yn nadu canu cân o alar ar dy ôl: “Pwy oedd fel Tyrus, fel tŵr yng nghanol y môr?”

³³Roedd dy nwyddau'n cael eu dadlwytho o'r moroedd, i gwrdd ag angen pobloedd. Roedd dy gyfoeth mawr a dy nwyddau yn cyfoethogi brenhinoedd i ben draw'r byd!

³⁴Ond bellach rwyt yn llong wedi ei dryllio yn gorwedd ar waelod y môr. Mae dy nwyddau a'r criw i gyd wedi suddo a boddi gyda ti.

³⁵Mae pobl yr arfordir i gyd wedi dychryn yn lân; brenhinoedd yn crynu mewn braw, a'r poen i'w weld ar eu hwynebau.

³⁶Mae masnachwyr y gwledydd yn chwibanu mewn rhyfeddod arnat. Roedd dy ddiwedd yn erchyll a fydd dim sôn eto amdanat.’”