Read Gobaith i Gymru Hosea 10 Bible Online

Hosea 10 - Gobaith i Gymru bible

Hosea 10

¹Roedd Israel fel gwinwydden iach a'i ffrwyth yn drwm ar ei changhennau. Ond po fwya o ffrwyth gafwyd, mwya o allorau a godwyd. Wrth i gnydau'r tir lwyddo byddai'r colofnau cysegredig yn cael eu haddurno.

²Maen nhw'n rhagrithio, felly byddan nhw'n cael eu cosbi. Bydd yr ARGLWYDD ei hun yn chwalu'r allorau ac yn malu'r colofnau.

³Yn fuan iawn byddan nhw'n cyfaddef, “Does dim brenin am ein bod heb barchu'r ARGLWYDD. Ond beth wnaeth brenin i ni beth bynnag?”

⁴Maen nhw'n llawn geiriau gwag, addewidion wedi eu torri, a chytundebau diwerth. Mae achosion llys yn lledu fel chwyn gwenwynig mewn cae wedi ei aredig.

⁵Bydd pobl Samaria yn ofni beth ddigwydd i lo Beth-afen. [45] Bydd y bobl yn galaru gyda'r offeiriaid ffals a fu'n dathlu, am fod ei ysblander wedi ei gipio,

⁶a'i gario i Asyria yn anrheg i'r brenin mawr. Bydd Effraim [46] yn destun sbort, ac Israel yn cywilyddio o achos yr eilun o bren.

⁷Bydd Samaria'n cael ei dinistrio, a'i brenin yn cael ei gipio fel brigyn yn cael ei gario ar lif afon.

⁸Bydd yr allorau paganaidd yn cael eu dinistrio — sef y lleoedd lle bu Israel yn pechu. Bydd drain ac ysgall yn tyfu dros yr allorau. Byddan nhw'n dweud wrth y mynyddoedd, “Cuddiwch ni!” ac wrth y bryniau, “Syrthiwch arnon ni!” [47†]

⁹“Israel, ti wedi pechu ers y digwyddiad erchyll yn Gibea [48]. A does dim byd wedi newid! Onid rhyfel oedd canlyniad yr holl ddrwg yn Gibea?

¹⁰A dw i'n barod i gosbi eto. Dw i'n mynd i gasglu'r cenhedloedd i ymosod arnat ti a dy gymryd yn gaeth am y ddau bechod.

¹¹Roedd Effraim fel heffer wedi ei hyfforddi, ac wrth ei bodd yn sathru'r grawn. Ond dw i'n mynd i roi iau trwm ar ei gwddf, a gêr i wneud i Effraim aredig. Bydd rhaid i Jwda aredig a Jacob lyfnu'r tir ei hun!

¹²Heuwch hadau cyfiawnder, a chewch gynhaeaf o gariad gen i. Trin tir eich calon galed [49†] — ceisio'r ARGLWYDD nes iddo ddod gyda chawodydd achubiaeth.

¹³Ond rwyt wedi plannu drygioni, a medi anghyfiawnder, ac yna bwyta ffrwyth y twyll. Ti wedi dibynnu ar gerbydau rhyfel, a phwyso ar faint dy fyddin.

¹⁴Felly daw sŵn brwydro ar dy bobl, a bydd dy gaerau i gyd yn syrthio. “Bydd fel y frwydr honno pan ddinistriodd y Brenin Shalman [50] Beth-arbel, a'r mamau'n cael eu curo i farwolaeth gyda'u plant.

¹⁵Dyna fydd yn digwydd i ti, Bethel, am wneud cymaint o ddrwg! Pan fydd y diwrnod hwnnw'n gwawrio, bydd brenin Israel wedi mynd am byth. [51]