Read Gobaith i Gymru Hosea 4 Bible Online

Hosea 4 - Gobaith i Gymru bible

Hosea 4

¹Bobl Israel, gwrandwch ar y neges sydd gan yr ARGLWYDD i chi! Mae'r ARGLWYDD yn dwyn achos yn erbyn pobl y wlad: “Does yna neb sy'n ffyddlon, neb sy'n garedig, neb sy'n nabod Duw go iawn.

²Ond mae yna ddigon o regi, twyllo, llofruddio, dwyn a godinebu! Mae yna drais ym mhobman!

³A dyna pam fydd y wlad yn methu a'i phobl yn mynd yn wan. Bydd hyd yn oed yr anifeiliaid gwyllt a'r adar a'r pysgod yn diflannu!

⁴Peidiwch pwyntio'r bys at bobl eraill, a rhoi'r bai arnyn nhw. Mae fy achos yn eich erbyn chi offeiriaid!

⁵Byddwch yn baglu yng ngolau dydd, a bydd eich proffwydi ffals yn baglu gyda chi yn y nos. Bydd dychryn yn eich dinistrio! [14]

⁶Mae fy mhobl yn cael eu dinistrio am nad ydyn nhw'n fy nabod i. Dych chi offeiriaid ddim eisiau fy nabod i, felly dw i ddim eisiau chi yn offeiriaid. Dych chi wedi gwrthod dysgeidiaeth eich Duw felly dw i'n mynd i wrthod eich plant chi.

⁷Wrth i'r offeiriaid ennill mwy a mwy o gyfoeth maen nhw'n pechu mwy yn fy erbyn i — cyfnewid yr Un Gwych am beth gwarthus!

⁸Maen nhw'n bwyta offrymau dros bechod fy mhobl! Maen nhw eisiau i'r bobl bechu!

⁹Ac mae'r bobl yn gwneud yr un fath â'r offeiriaid — felly bydda i'n eu cosbi nhw i gyd am y drwg; talu'n ôl iddyn nhw am beth maen nhw wedi ei wneud.

¹⁰Byddan nhw'n bwyta, ond byth yn cael digon. Byddan nhw'n cael rhyw, ond ddim yn cael plant. Maen nhw wedi troi cefn ar yr ARGLWYDD a bwrw ati i buteinio.

¹¹Mae gwin wedi drysu fy mhobl!

¹²Maen nhw'n troi at ddarn o bren am help, a disgwyl ateb gan ffon hud rhyw swynwr! Mae'r obsesiwn am ryw wedi gwneud iddyn nhw golli'r ffordd, ac maen nhw'n puteinio eu hunain i ffwrdd oddi wrth eu Duw.

¹³Maen nhw'n aberthu ar gopa'r mynyddoedd, a llosgi arogldarth ar ben y bryniau — dan gysgod hyfryd rhyw dderwen, coeden boplys neu derebinth. A'r canlyniad? Mae eich merched yn buteiniaid, a'ch merched-yng-nghyfraith yn godinebu!

¹⁴Ond pam ddylwn i gosbi dy ferched am buteinio, a'th ferched-yng-nghyfraith am odinebu? Mae'r dynion yr un fath! — yn ‛addoli‛ gyda hwren, ac yn aberthu gyda putain teml! [15] ‘Bydd pobl ddwl yn mynd i ddistryw!’

¹⁵Er dy fod ti, O Israel, yn godinebu, boed i Jwda osgoi pechu. Paid mynd i gysegr Gilgal! Paid mynd i fyny i Beth-afen! [16] Paid tyngu llw, ‘Fel mae'r ARGLWYDD yn fyw …’

¹⁶Mae Israel anufudd yn ystyfnig fel mul! [17] Cyn bo hir bydd yr ARGLWYDD yn ei gyrru allan i bori, a bydd fel oen bach ar dir agored!

¹⁷Mae pobl Effraim [18] yn briod ag eilunod — gad iddyn nhw fod!

¹⁸Ar ôl yfed yn drwm nes bod dim diod ar ôl, maen nhw'n troi at buteiniaid teml ac yn joio eu mochyndra digywilydd!

¹⁹Ond bydd corwynt yn eu cipio, a bydd eu haberthau'n achos cywilydd go iawn.