Read Gobaith i Gymru Hosea 5 Bible Online

Hosea 5 - Gobaith i Gymru bible

Hosea 5

¹Gwrandwch, chi offeiriaid! Daliwch sylw, bobl Israel! Clywch, chi'r teulu brenhinol! Mae'r farn ar fin dod arnoch! Dych chi wedi bod fel trap i bobl Mitspa, a rhwyd i ddal pobl Tabor;

²yn wrthryfelwyr wedi achosi lladdfa ddifrifol, a bydda i'n eich cosbi chi i gyd.

³Dw i'n gwybod yn iawn am Effraim. [19] Dydy Israel ddim yn gallu cuddio oddi wrtho i! Rwyt ti Effraim wedi troi at buteinio — mae Israel wedi ei llygru'n llwyr.

⁴Mae eu drygioni'n eu rhwystro rhag troi yn ôl at eu Duw. Mae puteindra ysbrydol wedi eu meddiannu, a dŷn nhw ddim yn nabod yr ARGLWYDD.

⁵Mae balchder Israel yn tystio yn ei herbyn. Bydd Israel ac Effraim yn syrthio o achos eu drygioni. A bydd Jwda, hefyd, yn syrthio gyda nhw.

⁶Wedyn, byddan nhw'n mynd at yr ARGLWYDD gyda'i defaid a'u geifr a'u bustych. Ond bydd yn rhy hwyr! Bydd e wedi eu gadael nhw.

⁷Maen nhw wedi bradychu'r ARGLWYDD ac maen nhw wedi cael plant siawns. Yn fuan iawn, ar Ŵyl y Lleuad Newydd, byddan nhw a'u tir yn cael eu difa.

⁸Chwythwch y corn hwrdd [20] yn Gibea! Canwch utgorn yn Rama! Rhybuddiwch bobl Beth-afen! [21] Ti fydd gyntaf, Benjamin!

⁹Bydd Effraim yn cael ei dinistrio ar ddydd y cosbi! Mae beth dw i'n ei ddweud wrth lwythau Israel yn mynd i ddigwydd.

¹⁰Mae arweinwyr Jwda fel rhai sy'n symud terfyn i ddwyn tir; [22†] a bydda i'n tywallt fy llid arnyn nhw fel llifogydd!

¹¹Bydd Effraim [23] yn cael ei orthrymu, a'i sathru pan fydda i'n barnu; am ei fod wedi penderfynu dilyn eilunod diwerth.

¹²Bydda i fel gwyfyn yn difa Effraim, fel pydredd i bobl Jwda.

¹³Pan welodd Effraim ei fod yn sâl, a Jwda'n gweld ei ddolur, dyma Effraim yn troi at Asyria am help gan ‛y brenin mawr‛. Ond dydy e ddim yn gallu dy helpu. Fydd e ddim yn gwella dy glwyf!

¹⁴Fi sy'n ymosod ar Effraim a Jwda, fel llew yn rhwygo ei ysglyfaeth. Fi — ie, fi! Bydda i'n eu rhwygo nhw'n ddarnau a'i cario nhw i ffwrdd. Fydd neb yn gallu eu helpu.

¹⁵Bydda i'n mynd yn ôl i'm ffau nes byddan nhw'n cyfaddef eu bai. Wedyn, byddan nhw'n chwilio amdana i; yn eu helbul, byddan nhw'n chwilio'n daer amdana i: