Read Gobaith i Gymru Hosea 6 Bible Online

Hosea 6 - Gobaith i Gymru bible

Hosea 6

¹“Dewch! Gadewch i ni droi'n ôl at yr ARGLWYDD. Fe sydd wedi'n rhwygo'n ddarnau, ond bydd e'n iacháu! Fe sydd wedi'n hanafu ni, ond bydd e'n gwella'r briwiau!

²Bydd yn rhoi bywyd newydd i ni mewn ychydig; bydd wedi'n codi ni'n ôl yn fyw mewn dim o bryd. [24] Cawn fyw yn ei gwmni,

³a'i nabod yn iawn. Gadewch i ni fwrw iddi i gydnabod yr ARGLWYDD. Bydd yn dod allan i'n hachub, mor sicr â bod y wawr yn torri. Bydd yn dod fel glaw y gaeaf neu gawodydd y gwanwyn i ddyfrio'r tir.”

⁴O, beth wna i gyda chi, bobl Effraim? [25] Beth wna i gyda chi, bobl Jwda? Mae eich ffyddlondeb fel tarth y bore, neu'r gwlith sy'n diflannu'n gynnar.

⁵Dyna pam dw i wedi anfon y proffwydi i'ch taro. Dw i'n mynd i'ch lladd chi fel y dwedais wrth gyhoeddi barn. Mae'r farn yn siŵr o ddod, fel golau'r wawr.

⁶Ffyddlondeb sy'n fy mhlesio, nid aberthau! [26†] Nabod Duw, nid dim ond offrwm i'w losgi.

⁷Maen nhw wedi sathru fy ymrwymiad fel Adda! Maen nhw wedi fy mradychu i!

⁸Mae Gilead yn dref o bobl ddrwg, ac mae olion traed gwaedlyd yn staen ar ei strydoedd.

⁹Mae'r urdd o offeiriaid fel gang o ladron, yn cuddio i ymosod ar bobl — yn llofruddio ar y ffordd i Sichem. Maen nhw'n gwneud cymaint o ddrwg!

¹⁰Dw i wedi gweld pobl Israel yn gwneud pethau cwbl ffiaidd! Mae Effraim yn puteinio — mae Israel wedi ei llygru'n llwyr!

¹¹Mae cynhaeaf barn yn dod i tithau, Jwda! Dw i eisiau i'm pobl lwyddo eto;