Read Gobaith i Gymru Hosea 9 Bible Online

Hosea 9 - Gobaith i Gymru bible

Hosea 9

¹O Israel, stopia ddathlu a gweiddi'n llawen fel y paganiaid; ti wedi bod yn anffyddlon i dy Dduw. Ti'n hoffi derbyn cyflog putain wrth ‛addoli‛ ar bob llawr dyrnu!

²Fydd dy gynhaeaf ŷd ddim digon i fwydo dy bobl, a bydd y grawnwin o'r gwinllannoedd yn dy siomi.

³Fyddan nhw ddim yn aros ar dir yr ARGLWYDD. Bydd Effraim [37] yn mynd yn ôl i'r Aifft, ac yn bwyta bwyd aflan [38] yn Asyria.

⁴Fyddan nhw ddim yn gallu tywallt gwin i'r ARGLWYDD, nac offrymu aberthau iddo. Bydd yr aberthau'n aflan, fel bwyd pobl sy'n galaru; bydd pawb sy'n ei fwyta'n cael eu llygru. Bydd eu bwyd i'w boliau'n unig; fydd e ddim yn mynd yn agos i deml yr ARGLWYDD.

⁵Felly, beth wnewch chi ar Ddydd Gŵyl — sut fyddwch chi'n dathlu Gwyliau'r ARGLWYDD? [39]

⁶Hyd yn oed os byddan nhw'n dianc o'r dinistr, bydd yr Aifft yn cael gafael ynddyn nhw, a Memffis [40] yn eu claddu nhw. Bydd chwyn yn chwennych eu trysorau a mieri'n meddiannu eu tai.

⁷Mae cyfnod y cosbi wedi cyrraedd! [41†] Mae dydd y farn wedi dod! Mae'n bryd i Israel wybod! “Mae'r proffwyd yn hurt! Mae'r dyn ysbrydol yn wallgof!” Ti wedi pechu gymaint, ac mor llawn casineb!

⁸Mae'r proffwyd yn wyliwr dros Effraim ar ran Duw. Ond mae trapiau'n cael eu gosod ar ei lwybrau; a dim byd ond casineb ato yn nheml ei Dduw.

⁹Mae'r llygredd yn mynd o ddrwg i waeth, fel digwyddodd yn Gibea gynt. [42] Bydd Duw yn delio gyda'u drygioni ac yn eu cosbi am eu pechodau.

¹⁰Roedd darganfod Israel fel dod o hyd i rawnwin yn yr anialwch. I mi, roedd dy hynafiaid fel y ffrwyth cyntaf i dyfu ar goeden ffigys. Ond dyma nhw'n cyrraedd Baal-peor, a rhoi eu hunain i eilun cywilyddus [43†] — cyn pen dim aethon nhw mor ffiaidd â'r eilun roedden nhw'n ei addoli.

¹¹“Bydd ysblander Effraim yn hedfan i ffwrdd fel aderyn! Bydd heb blant — byth yn beichiogi. Bydd yn ddiffrwyth!

¹²Hyd yn oed petaen nhw'n magu plant, bydda i'n eu cipio nhw i ffwrdd — fydd dim un ar ôl. Gwae nhw! Dw i'n mynd i droi cefn arnyn nhw!

¹³Roeddwn i'n gweld Effraim fel coeden balmwydd wedi ei phlannu mewn cae hyfryd, ond byddan nhw'n dod â'i plant allan i'w lladd.”

¹⁴Rho iddyn nhw, ARGLWYDD — Ond beth roi di iddyn nhw? — Rho grothau sy'n erthylu, a bronnau wedi sychu!

¹⁵“Am wneud yr holl ddrwg yn Gilgal, [44] dw i'n eu casáu nhw. Dw i'n mynd i'w gyrru nhw allan o'm tir o achos eu holl ddrygioni. Dw i ddim yn eu caru nhw bellach; mae eu swyddogion i gyd mor ystyfnig.

¹⁶Bydd pobl Effraim yn cael eu taro'n galed — mae'r gwreiddyn wedi sychu; a does dim ffrwyth yn tyfu. A hyd yn oed petaen nhw'n cael plant, byddwn i'n lladd eu babis bach del!”

¹⁷Bydd fy Nuw yn eu gwrthod nhw am beidio gwrando arno; ac yn gwneud iddyn nhw grwydro ar goll ymhlith y cenhedloedd!