Read Gobaith i Gymru Amos 1 Bible Online

Amos 1 - Gobaith i Gymru bible

Amos 1

¹Neges Amos, oedd yn un o ffermwyr defaid Tecoa. [1] Ddwy flynedd cyn y daeargryn [2] cafodd Amos weledigaethau gan Dduw am Israel. Ar y pryd, roedd Wseia yn frenin ar Jwda, a Jeroboam fab Jehoas yn frenin ar Israel. [3] [4†]

²Dyma ddwedodd Amos: “Mae'r ARGLWYDD yn rhuo o Seion, a'i lais yn taranu o Jerwsalem, [5†] nes bod porfa'r anifeiliaid yn gwywo, a glaswellt mynydd Carmel yn sychu.” [7†]

³[6] Dyma mae'r ARGLWYDD yn ei ddweud: “Mae Damascus [8] wedi pechu dro ar ôl tro, felly dw i'n mynd i'w cosbi nhw. Maen nhw wedi bod yn greulon at bobl Gilead, a'u rhwygo gyda sled a dannedd haearn iddi.

⁴Felly bydda i'n llosgi'r palas gododd y brenin Hasael [9], a bydd y tân yn dinistrio caerau amddiffynnol Ben-hadad. [10]

⁵Bydda i'n dryllio barrau giatiau Damascus, yn cael gwared â'r un sy'n llywodraethu ar Ddyffryn Afen, a'r un sy'n teyrnasu yn Beth-eden. Bydd pobl Syria yn cael eu cymryd yn gaeth i ardal Cir.” [11†] —yr ARGLWYDD sy'n dweud hyn. [12†]

⁶Dyma mae'r ARGLWYDD yn ei ddweud: “Mae Gasa [13] wedi pechu dro ar ôl tro, felly dw i'n mynd i'w cosbi nhw. Maen nhw wedi cymryd pentrefi cyfan yn gaeth, a'u gwerthu nhw i wlad Edom,

⁷Felly bydda i'n llosgi waliau Gasa, a bydd y tân yn dinistrio ei chaerau amddiffynnol.

⁸Bydda i'n cael gwared â'r un sy'n llywodraethu yn ninas Ashdod a'r un sy'n teyrnasu yn Ashcelon. Bydda i'n ymosod ar ddinas Ecron, [14] nes bydd neb o'r Philistiaid ar ôl yn fyw!” —fy Meistr, yr ARGLWYDD, sy'n dweud hyn. [15†]

⁹Dyma mae'r ARGLWYDD yn ei ddweud: “Mae Tyrus wedi pechu dro ar ôl tro, felly dw i'n mynd i'w cosbi nhw. Maen nhw wedi torri'r cytundeb gyda'i brodyr drwy gymryd pentrefi cyfan yn gaeth, a'u gwerthu nhw i wlad Edom,

¹⁰Felly bydda i'n llosgi waliau Tyrus, a bydd y tân yn dinistrio ei chaerau amddiffynnol.” [16†]

¹¹Dyma mae'r ARGLWYDD yn ei ddweud: “Mae Edom wedi pechu dro ar ôl tro, felly dw i'n mynd i'w cosbi nhw. Maen nhw wedi ymosod ar eu brodyr [17] gyda'r cleddyf a dangos dim trugaredd atyn nhw. Am iddyn nhw ddal ati i ymosod yn wyllt heb stopio'r trais o gwbl,

¹²dw i'n mynd i anfon tân i losgi Teman, a dinistrio caerau amddiffynnol Bosra.” [18] [19†]

¹³Dyma mae'r ARGLWYDD yn ei ddweud: “Mae pobl Ammon wedi pechu dro ar ôl tro, felly dw i'n mynd i'w cosbi nhw. Maen nhw wedi rhwygo a lladd gwragedd beichiog Gilead er mwyn ennill mwy o dir iddyn nhw eu hunain.

¹⁴Felly bydda i'n llosgi waliau Rabba [20], a bydd y tân yn dinistrio ei chaerau amddiffynnol. Yng nghanol y bloeddio ar ddydd y frwydr, pan fydd yr ymladd yn ffyrnig fel storm,

¹⁵bydd eu brenin a'i holl swyddogion yn cael eu cymryd yn gaeth gyda'i gilydd.” —yr ARGLWYDD sy'n dweud hyn.