Read Gobaith i Gymru Amos 6 Bible Online

Amos 6 - Gobaith i Gymru bible

Amos 6

¹Gwae chi sydd mor gyfforddus yn Seion, ac yn teimlo mor saff ar fryniau Samaria! Chi bobl bwysig y genedl sbesial ma — ie, chi mae pobl Israel yn troi atyn nhw am arweiniad.

²Dych chi'n dweud wrthyn nhw, “Ewch draw i ddinas Calne, i weld sut mae pethau yno! Ewch yn eich blaen wedyn i Chamath fawr, ac i lawr i Gath [32] y Philistiaid. Ydy pethau'n well arnyn nhw nag ar y ddwy wlad yma? Oes ganddyn nhw fwy o dir na chi?”

³Dych chi'n gwrthod derbyn fod dydd drwg yn dod. Dych chi'n gofyn am gyfnod o drais!

⁴Druan ohonoch chi, sy'n diogi ar eich soffas ifori moethus. Yn gorweddian ar glustogau cyfforddus, ac yn mwynhau gwledda ar gig oen a'r cig eidion gorau.

⁵Yn mwmian canu i gyfeiliant y nabl — a meddwl eich bod chi'n gerddorion gwych fel y Brenin Dafydd!

⁶Dych chi'n yfed gwin wrth y galwyni ac yn pampro eich cyrff gyda'r olew gorau! Ond dych chi'n poeni dim fod dinistr yn dod ar bobl Joseff!

⁷Felly, chi fydd y rhai cyntaf i gael eich caethgludo, a hynny'n fuan iawn! Bydd y gwledda a'r gorweddian yn dod i ben!

⁸Mae fy Meistr, yr ARGLWYDD, yn tyngu iddo'i hun: “Dw i'n casáu balchder gwlad Jacob, ac yn ffieiddio ei phlastai. Bydda i'n cyhoeddi y bydd dinas Samaria a'i phobl yn cael eu rhoi yn llaw'r gelyn.” —yr ARGLWYDD sy'n dweud hyn, y Duw holl-bwerus.

⁹Os bydd deg o bobl yn dal yn fyw mewn tŷ, byddan nhw'n marw.

¹⁰Yna bydd perthynas yn dod i gasglu'r cyrff o'r tŷ — gyda'r bwriad o'u llosgi. A bydd yn galw ar rywun sy'n cuddio yng nghefn y tŷ, “Oes unrhyw un arall yn fyw ond ti?” ac yn cael yr ateb, “Na, neb.” Yna bydd yn dweud, “Ust! paid hyd yn oed â dweud enw'r ARGLWYDD”.

¹¹Felly, mae'r ARGLWYDD yn rhoi'r gorchymyn: “Mae'r tai mawr crand i gael eu chwalu'n ulw, a'r tai cyffredin hefyd, yn ddarnau mân.”

¹²Ydy ceffylau'n gallu carlamu dros greigiau mawrion? Ydy'n bosib ei aredig hefo ychen? Ac eto dych chi wedi troi cyfiawnder yn wenwyn marwol ac wedi gwneud yr hyn sy'n iawn yn beth chwerw.

¹³Dych chi mor falch eich bod chi wedi concro tref Lo-debâr [33], a meddech chi wedyn, “Dŷn ni wedi dal Carnaïm! [34] Roedden ni'n rhy gryf iddyn nhw!”

¹⁴Ond gwylia di, wlad Israel, —yr ARGLWYDD sy'n dweud hyn, y Duw holl-bwerus. Dw i'n codi cenedl i ymladd yn dy erbyn di. Bydd yn dy ormesu di o Fwlch Chamath yn y gogledd i Wadi'r Araba [35] lawr yn y de!