Read Gobaith i Gymru Jona 2 Bible Online

Jona 2 - Gobaith i Gymru bible

Jona 2

¹Dyma Jona yn gweddïo ar yr ARGLWYDD ei Dduw o fol y pysgodyn.

²Roeddwn i mewn trafferthion, a dyma fi'n galw ar yr ARGLWYDD, a dyma fe'n fy ateb i. Dyma fi'n gweiddi am dy help di, o ganol byd y meirw, a dyma ti'n gwrando arna i!

³Teflaist fi i'r dyfnder; i waelod y môr. Roedd y cerrynt o'm cwmpas, a'r tonnau mawr yn torri uwch fy mhen.

⁴Ro'n i'n meddwl fy mod i wedi cael fy ysgubo i ffwrdd gen ti am byth, ac y byddwn i byth yn cael gweld dy deml sanctaidd di eto!

⁵Roeddwn i bron boddi — roedd y môr dwfn o'm cwmpas, a gwymon wedi lapio am fy mhen.

⁶Roeddwn i wedi suddo at waelod isa'r mynyddoedd. Roedd giatiau Byd y Meirw wedi cloi tu ôl i mi am byth. Ond dyma ti, ARGLWYDD Dduw, yn fy achub i o'r Pwll dwfn.

⁷Pan oedd fy mywyd yn llithro i ffwrdd, dyma fi'n galw arnat ti, ARGLWYDD; a dyma ti'n gwrando ar fy ngweddi o dy deml sanctaidd.

⁸Mae'r rhai sy'n addoli eilunod diwerth yn troi cefn ar dy drugaredd di.

⁹Ond dw i'n mynd i offrymu aberth i ti, a chanu mawl i ti'n gyhoeddus. Bydda i'n gwneud beth dw i wedi ei addo! Yr ARGLWYDD ydy'r un sy'n achub!

¹⁰Yna dyma'r ARGLWYDD yn dweud wrth y pysgodyn am chwydu Jona ar dir sych.