Read Gobaith i Gymru Numeri 12 Bible Online

Numeri 12 - Gobaith i Gymru bible

Numeri 12

¹Roedd Miriam ac Aaron wedi dechrau beirniadu Moses, am ei fod wedi priodi dynes o ddwyrain Affrica [6] (ie, dynes ddu o Affrica).

²“Ai dim ond trwy Moses mae'r ARGLWYDD yn siarad?” medden nhw. “Ydy e ddim wedi siarad trwon ni hefyd?” Ac roedd yr ARGLWYDD wedi ei clywed nhw.

³(Roedd Moses ei hun yn ddyn gostyngedig iawn. Doedd neb llai balch drwy'r byd i gyd.)

⁴Felly dyma'r ARGLWYDD yn galw ar Moses, Aaron a Miriam: “Dw i eisiau i'r tri ohonoch chi ddod at Babell Presenoldeb Duw.” Felly dyma'r tri ohonyn nhw'n mynd.

⁵A dyma'r ARGLWYDD yn dod i lawr mewn colofn o niwl o flaen mynedfa'r Tabernacl. A dyma fe'n dweud wrth Aaron a Miriam i gamu ymlaen, a dyma nhw'n gwneud hynny.

⁶Yna dyma fe'n dweud wrthyn nhw, “Gwrandwch yn ofalus ar beth dw i'n ddweud: Os oes proffwyd gyda chi, dw i'r ARGLWYDD yn siarad â'r person hwnnw drwy weledigaeth a breuddwyd.

⁷Ond mae fy ngwas Moses yn wahanol. Dw i'n gallu ei drystio fe'n llwyr.

⁸Dw i'n siarad gydag e wyneb yn wyneb — yn gwbl agored. Does dim ystyr cudd. Mae e'n gweld yr ARGLWYDD mewn ffordd unigryw. Felly pam oeddech chi mor barod i'w feirniadu?”

⁹Roedd yr ARGLWYDD wedi digio go iawn gyda nhw, a dyma fe'n mynd i fwrdd.

¹⁰Ac wrth i'r cwmwl godi oddi ar y Tabernacl, roedd croen Miriam wedi troi'n wyn gan wahanglwyf. Pan welodd Aaron y gwahanglwyf arni

¹¹dyma fe'n galw ar Moses, “Meistr, plîs paid cymryd yn ein herbyn ni. Dŷn ni wedi bod yn ffyliaid, ac wedi pechu!

¹²Paid gadael iddi fod fel plentyn wedi ei eni'n farw, a hanner ei gnawd wedi diflannu cyn iddo ddod o'r groth!”

¹³A dyma Moses yn gweddïo ar yr ARGLWYDD, “O Dduw, plîs wnei di iacháu hi?”

¹⁴A dyma'r ARGLWYDD yn ei ateb, “Petai ei thad wedi poeri yn ei hwyneb byddai'n cael ei diystyru am saith diwrnod. Cau hi allan o'r gwersyll am saith diwrnod, a bydd hi'n cael dod yn ôl wedyn.”

¹⁵Felly dyma Miriam yn cael ei chau allan o'r gwersyll am saith diwrnod. A wnaeth y bobl ddim teithio yn eu blaenau nes roedd Miriam yn ôl gyda nhw.

¹⁶Ar ôl hynny dyma'r bobl yn gadael Chatseroth, ac yn gwersylla yn anialwch Paran.