Read Gobaith i Gymru Numeri 26 Bible Online

Numeri 26 - Gobaith i Gymru bible

Numeri 26

¹Ar ôl i'r pla orffen, dyma'r ARGLWYDD yn dweud wrth Moses: ac wrth Eleasar fab Aaron, yr offeiriad:

²“Dw i eisiau i ti gynnal cyfrifiad arall o bobl Israel — pawb o bob llwyth sydd dros ugain oed ac yn gallu ymuno â'r fyddin.”

³Ar y pryd roedd pobl Israel yn gwersylla ar wastatir Moab, wrth ymyl Afon Iorddonen, gyferbyn â Jericho. A dyma Moses ac Eleasar yn dweud wrthyn nhw,

⁴“Rhaid cyfrif pawb dros ugain oed.” Dyna oedd yr ARGLWYDD wedi ei orchymyn i Moses. A dyma bobl Israel ddaeth allan o wlad yr Aifft:

⁵O lwyth Reuben (mab hynaf Jacob) — disgynyddion Hanoch, Palw,

⁶Hesron, a Carmi.

⁷Cyfanswm Reuben oedd 43,730.

⁸(Roedd Eliab yn un o ddisgynyddion Palw,

⁹sef tad Nemwel, Dathan ac Abiram. Roedd Dathan ac Abiram gyda Cora yn arwain y bobl wnaeth droi yn erbyn Moses ac Aaron a gwrthryfela yn erbyn yr ARGLWYDD.

¹⁰A dyma'r ddaear yn agor ac yn eu llyncu nhw a Cora. Lladdodd y tân ddau gant pum deg ohonyn nhw. Mae beth ddigwyddodd iddyn nhw yn rhybudd i ni.

¹¹Ond wnaeth llinach Cora ei hun ddim diflannu'n llwyr.)

¹²O lwyth Simeon — disgynyddion Nemwel, Iamin, Iachin,

¹³Serach, a Saul.

¹⁴Cyfanswm Simeon oedd 22,200.

¹⁵O lwyth Gad — disgynyddion Seffon, Haggi, Shwni,

¹⁶Osni, Eri,

¹⁷Arod ac Areli.

¹⁸Cyfanswm Gad oedd 40,500.

¹⁹Roedd gan Jwda ddau fab, Er ac Onan, ond buodd y ddau farw yn fuan yn Canaan.

²⁰O lwyth Jwda — disgynyddion Shela, Perets, a Serach.

²¹Ac o Perets — disgynyddion Hesron a Chamŵl.

²²Cyfanswm Jwda oedd 76,500.

²³O lwyth Issachar — disgynyddion Tola, Pwa,

²⁴Iashŵf, a Shimron.

²⁵Cyfanswm Issachar oedd 64,300.

²⁶O lwyth Sabulon — disgynyddion Sered, Elon a Iachle-el.

²⁷Cyfanswm Sabulon oedd 60,500.

²⁸Roedd dau lwyth, sef Manasse ac Effraim, yn ddisgynyddion i Joseff.

²⁹O lwyth Manasse — disgynyddion Machir a'i fab Gilead.

³⁰O Gilead — disgynyddion Ieser, Chelec,

³¹Asriel, Sechem,

³²Shemida a Cheffer.

³³(Doedd gan Seloffchad fab Cheffer ddim meibion, dim ond merched. Ac enwau'r merched oedd Machla, Noa, Hogla, Milca a Tirtsa.)

³⁴Cyfanswm Manasse oedd 52,700.

³⁵O lwyth Effraim — disgynyddion Shwtelach, Becher, a Tachan.

³⁶Ac o Shwtelach — disgynyddion Eran.

³⁷Cyfanswm Effraim oedd 32,500. Roedden nhw i gyd yn ddisgynyddion Joseff, drwy Manasse ac Effraim.

³⁸O lwyth Benjamin — disgynyddion Bela, Ashbel, Achiram,

³⁹Sheffwffâm, a Hwffam.

⁴⁰Wedyn o feibion Bela — disgynyddion Ard a Naaman.

⁴¹Cyfanswm Benjamin oedd 45,600.

⁴²O lwyth Dan — disgynyddion Shwcham. Y Shwchamiaid oedd disgynyddion Dan,

⁴³a'i cyfanswm nhw oedd 64,400.

⁴⁴O lwyth Asher — disgynyddion Imna, Ishfi, a Bereia.

⁴⁵Wedyn o feibion Bereia — disgynyddion Heber a Malciel.

⁴⁶Roedd gan Asher ferch hefyd, sef Serach.

⁴⁷Cyfanswm Asher oedd 53,400.

⁴⁸O lwyth Nafftali — disgynyddion Iachtseël, Gwni,

⁴⁹Jeser, a Shilem.

⁵⁰Cyfanswm Nafftali oedd 45,400.

⁵¹Felly cyfanswm y dynion gafodd eu cyfri yn Israel oedd 601,730.

⁵²Yna dyma'r ARGLWYDD yn dweud wrth Moses:

⁵³“Mae'r tir i gael ei rannu rhwng y llwythau ar sail y ffigyrau yma.

⁵⁴Mae'r llwythau mwyaf i gael etifeddu mwy o dir na'r llwythau lleiaf. Mae faint o dir fydd pob llwyth yn ei gael yn seiliedig ar y ffigyrau yma.

⁵⁵Rhaid defnyddio coelbren wrth rannu'r tir, ond mae canlyniadau'r cyfrifiad i gael eu defnyddio i benderfynu faint o dir mae pob llwyth yn ei gael.

⁵⁶Bydd y tir mae'r llwythau bach a mawr yn ei etifeddu yn cael ei bennu drwy daflu coelbren.”

⁵⁷A dyma'r Lefiaid gafodd eu cyfrif — disgynyddion Gershon, Cohath a Merari.

⁵⁸A disgynyddion eraill Lefi — y Libniaid, Hebroniaid, Machliaid, Mwshiaid a Corahiaid. Cohath oedd tad Amram,

⁵⁹ac enw gwraig Amram oedd Iochefed, merch Lefi, gafodd ei geni yn yr Aifft. Wedyn plant Amram a Iochefed oedd Aaron, Moses, a Miriam eu chwaer.

⁶⁰Roedd Aaron yn dad i Nadab, Abihw, Eleasar ac Ithamar.

⁶¹Ond roedd Nadab ac Abihw wedi marw wrth ddefnyddio tân o rywle arall i wneud offrwm i'r ARGLWYDD. [18]

⁶²Roedd 23,000 o Lefiaid — pob dyn a bachgen oedd dros fis oed. Doedden nhw ddim wedi cael eu cyfrif gyda gweddill pobl Israel, am fod dim tir i gael ei roi iddyn nhw fel i weddill llwythau Israel.

⁶³Felly dyna ffigyrau'r cyfrifiad wnaeth Moses ac Eleasar yr offeiriad, pan oedd pobl Israel yn gwersylla ar wastatir Moab, wrth ymyl Afon Iorddonen, gyferbyn â Jericho.

⁶⁴Doedd neb o'r dynion gafodd eu cyfrif y tro yma, wedi eu cynnwys yn y cyfrifiad cyntaf wnaeth Moses ac Aaron yn anialwch Sinai.

⁶⁵Roedd yr ARGLWYDD wedi dweud, “Byddan nhw i gyd yn marw yn yr anialwch!” A doedd neb ohonyn nhw ar ôl, ar wahân i Caleb fab Jeffwnne a Josua fab Nwn.