Read Gobaith i Gymru Numeri 3 Bible Online

Numeri 3 - Gobaith i Gymru bible

Numeri 3

¹Dyma hanes teulu Aaron a Moses pan wnaeth yr ARGLWYDD siarad gyda Moses ar Fynydd Sinai:

²Enwau meibion Aaron oedd Nadab (y mab hynaf), Abihw, Eleasar ac Ithamar.

³Cawson nhw eu heneinio a'u cysegru i wasanaethu fel offeiriaid.

⁴Ond roedd Nadab ac Abihw wedi marw yn anialwch Sinai wrth ddefnyddio tân o rywle arall i wneud offrwm i'r ARGLWYDD. Doedd ganddyn nhw ddim plant. Felly Eleasar ac Ithamar oedd yn gwasanaethu fel offeiriaid gyda'u tad Aaron.

⁵Dyma'r ARGLWYDD yn dweud wrth Moses:

⁶“Tyrd â llwyth Lefi at Aaron, a'u rhoi nhw iddo fel ei helpwyr.

⁷Byddan nhw'n gwasanaethu Aaron a'r bobl i gyd o flaen Pabell Presenoldeb Duw. Nhw fydd yn gyfrifol am wneud yr holl waith yn y Tabernacl.

⁸Byddan nhw'n gofalu am holl offer Pabell Presenoldeb Duw, ac yn gwasanaethu yn y Tabernacl ar ran pobl Israel.

⁹Rwyt i roi'r Lefiaid i Aaron a'i feibion fel eu helpwyr. Maen nhw i weithio iddo fe a neb arall.

¹⁰Aaron a'i feibion sydd i'w penodi'n offeiriaid. Os ydy unrhyw un arall yn mynd yn rhy agos at y cysegr, y gosb ydy marwolaeth.”

¹¹A dyma'r ARGLWYDD yn dweud wrth Moses:

¹²“Dw i wedi cymryd y Lefiaid i mi fy hun, yn lle'r mab cyntaf i ddod allan o groth pob gwraig yn Israel. Fi piau'r Lefiaid,

¹³am mai fi piau pob mab cyntaf. Ro'n i wedi cysegru pob mab ac anifail cyntaf i gael ei eni i mi fy hun, pan wnes i ladd y rhai cyntaf i gael eu geni yng ngwlad yr Aifft. Felly fi piau pob un cyntaf i gael ei eni. Fi ydy'r ARGLWYDD.”

¹⁴Yna dyma'r ARGLWYDD yn siarad gyda Moses yn anialwch Sinai:

¹⁵“Dw i eisiau i ti gyfri'r Lefiaid, yn ôl eu teuluoedd estynedig a'i claniau — pob dyn, a phob bachgen sydd dros fis oed.”

¹⁶Felly dyma Moses yn eu cyfri nhw, fel roedd yr ARGLWYDD wedi dweud wrtho.

¹⁷Enwau meibion Lefi oedd Gershon, Cohath a Merari.

¹⁸Enwau claniau meibion Gershon oedd Libni a Shimei.

¹⁹Enwau claniau meibion Cohath oedd Amram, Its'har, Hebron ac Wssiel.

²⁰Enwau claniau meibion Merari oedd Machli a Mwshi. Y rhain oedd teuluoedd Lefi yn ôl eu claniau.

²¹Disgynyddion Gershon oedd claniau Libni a Simei —

²²sef 7,500 o ddynion a bechgyn oedd dros fis oed.

²³Roedd teuluoedd y Gershoniaid i wersylla tu ôl i'r Tabernacl, i'r gorllewin.

²⁴Ac arweinydd y Gershoniaid oedd Eliasaff fab Laël.

²⁵Cyfrifoldeb y Gershoniaid oedd pabell y Tabernacl, y gorchudd, y sgrîn o flaen y fynedfa i Babell Presenoldeb Duw,

²⁶llenni'r iard oedd o gwmpas y Tabernacl a'r allor, y sgrîn o flaen y fynedfa i'r iard, y rhaffau, a popeth arall oedd ag unrhyw beth i'w wneud â'r rhain.

²⁷Disgynyddion Cohath oedd claniau Amram, Its'har, Hebron ac Wssiel —

²⁸sef 8,600 o ddynion a bechgyn oedd dros fis oed. Nhw oedd yn gyfrifol am y cysegr.

²⁹Roedd teuluoedd y Cohathiaid i wersylla i'r de o'r Tabernacl.

³⁰Ac arweinydd y Cohathiaid oedd Elitsaffan fab Wssiel.

³¹Nhw oedd yn gyfrifol am yr Arch, y bwrdd, y menora (sef y stand i'r lampau), yr allorau, unrhyw offer oedd yn cael ei ddefnyddio yn y cysegr, y gorchudd mewnol, a popeth arall oedd ag unrhyw beth i'w wneud â'r rhain.

³²Eleasar, mab Aaron oedd pennaeth arweinwyr y Lefiaid. Roedd ganddo gyfrifoldeb arbennig i oruchwylio'r rhai oedd yn gyfrifol am y cysegr.

³³Disgynyddion Merari oedd claniau Machli a Mwshi —

³⁴sef 6,200 o ddynion a bechgyn oedd dros fis oed.

³⁵Arweinydd y Merariaid oedd Swriel fab Afichaïl. Roedden nhw i wersylla i'r gogledd o'r Tabernacl.

³⁶Cyfrifoldeb y Merariaid oedd fframiau'r Tabernacl, y croesfarrau, y polion, y socedi, y llestri i gyd, a popeth arall oedd ag unrhyw beth i'w wneud â'r rhain.

³⁷Hefyd, polion yr iard i gyd, gyda'i socedi, pegiau a rhaffau.

³⁸Yr unig rai oedd i wersylla ar yr ochr ddwyreiniol, o flaen y Tabernacl, oedd Moses ac Aaron a'i feibion. Nhw oedd yn gyfrifol am y cysegr ar ran pobl Israel. Os oedd unrhyw un arall yn mynd yn rhy agos at y cysegr, y gosb oedd marwolaeth.

³⁹Nifer y Lefiaid i gyd, gafodd eu cyfri gan Moses ac Aaron, oedd 22,000 o ddynion a bechgyn dros un mis oed.

⁴⁰Yna dyma'r ARGLWYDD yn dweud wrth Moses: “Dw i eisiau i ti gyfri pob un o'r Israeliaid sy'n fab hynaf, o un mis oed i fyny. A cofrestru enw pob un.

⁴¹Mae'r Lefiaid i gael eu rhoi i mi yn lle meibion hynaf yr Israeliaid — cofia mai fi ydy'r ARGLWYDD. A fi piau anifeiliaid y Lefiaid hefyd, yn lle pob anifail cyntaf i gael ei eni i anifeiliaid pobl Israel.”

⁴²Felly dyma Moses yn cyfrif pob un o feibion hynaf yr Israeliaid, fel roedd yr ARGLWYDD wedi dweud wrtho.

⁴³Y nifer gafodd eu cyfrif a'u cofrestru oedd 22,273.

⁴⁴Yna dyma'r ARGLWYDD yn dweud wrth Moses:

⁴⁵“Cymer y Lefiaid yn lle meibion hynaf pobl Israel, ac anifeiliaid y Lefiaid yn lle eu hanifeiliaid nhw. Fi fydd piau'r Lefiaid. Fi ydy'r ARGLWYDD.

⁴⁶Mae nifer y meibion hynaf ddau gant saith deg tri yn fwy na nifer y Lefiaid. Rwyt i brynu rhyddid i'r dau gant saith deg tri

⁴⁷drwy gasglu pum darn arian am bob un ohonyn nhw. Dylid ei dalu gydag arian y cysegr, sef darnau arian sy'n pwyso dau ddeg gera yr un.

⁴⁸Rho'r arian yma i Aaron a'i feibion.”

⁴⁹Felly dyma Moses yn casglu'r arian i brynu'n rhydd y meibion hynaf oedd dros ben.

⁵⁰Casglodd 1,365 sicl, sef tua un deg pump cilogram o arian.

⁵¹Yna dyma Moses yn rhoi'r arian i Aaron a'i feibion, yn union fel roedd yr ARGLWYDD wedi dweud wrtho.