Read Gobaith i Gymru Numeri 31 Bible Online

Numeri 31 - Gobaith i Gymru bible

Numeri 31

²“Dial ar bobl Midian am beth wnaethon nhw i bobl Israel. Ar ôl i ti wneud hynny byddi di'n mynd at dy hynafiaid sydd wedi marw.”

³Felly dyma Moses yn dweud wrth y bobl, “Dewiswch ddynion i fynd i ryfel yn erbyn Midian, ac i ddial arnyn nhw ar ran yr ARGLWYDD.

⁴Rhaid anfon mil o ddynion o bob llwyth i'r frwydr.”

⁵Felly dyma nhw'n dewis mil o ddynion o bob llwyth yn Israel — un deg dau mil o ddynion arfog yn barod i ymladd.

⁶A dyma Moses yn eu hanfon nhw allan, gyda Phineas (mab Eleasar yr offeiriad) yn gofalu am y taclau o'r cysegr a'r utgyrn i alw'r fyddin.

⁷A dyma nhw'n mynd allan i ymladd yn erbyn Midian, fel roedd yr ARGLWYDD wedi gorchymyn i Moses. Dyma nhw'n lladd y dynion i gyd,

⁸gan gynnwys pum brenin Midian, sef Efi, Recem, Swr, Hur, a Reba, a hefyd Balaam fab Beor.

⁹Yna dyma fyddin Israel yn cymryd merched a phlant Midian yn gaeth. Dyma nhw hefyd yn cymryd eu gwartheg, defaid, a popeth arall o werth oddi arnyn nhw.

¹⁰Wedyn dyma nhw'n llosgi eu trefi a'u pentrefi nhw i gyd.

¹¹Dyma nhw'n ysbeilio ac yn dwyn popeth, gan gynnwys y bobl a'r anifeiliaid i gyd.

¹²A dyma nhw'n mynd â'r cwbl yn ôl at Moses ac Eleasar yr offeiriad, a holl bobl Israel oedd yn gwersylla ar wastatir Moab, wrth yr Afon Iorddonen gyferbyn â Jericho.

¹³Aeth Moses ac Eleasar a'r arweinwyr eraill i gyfarfod y fyddin tu allan i'r gwersyll.

¹⁴Ond dyma Moses yn gwylltio'n lân gyda swyddogion y fyddin — y capteiniaid ar unedau o fil a'r unedau o gant oedd wedi dod yn ôl o'r frwydr.

¹⁵“Pam ydych chi wedi cadw'r merched yn fyw?” meddai wrthyn nhw.

¹⁶“Dyma'r union bobl wnaeth wrando ar Balaam, a gwneud i bobl Israel wrthryfela yn erbyn yr ARGLWYDD yn y digwyddiad yn Peor! A'r canlyniad oedd y pla ofnadwy wnaeth daro pobl yr ARGLWYDD!

¹⁷Felly lladdwch y bechgyn i gyd, a lladdwch bob gwraig sydd wedi cysgu gyda dyn.

¹⁸Ond cewch gadw'n fyw y merched ifanc hynny sydd heb eto gael rhyw.”

¹⁹“Pwy bynnag sydd wedi lladd rhywun, neu wedi cyffwrdd corff marw, rhaid i chi aros tu allan i'r gwersyll am saith diwrnod. A rhaid i chi a'r merched dych chi wedi eu cymryd yn gaeth fynd drwy'r ddefod o buro eich hunain ar y trydydd diwrnod a'r seithfed diwrnod.

²⁰Rhaid i chi lanhau eich dillad i gyd, a popeth sydd wedi ei wneud o groen anifail, blew gafr neu bren.”

²¹Yna dyma Eleasar yr offeiriad yn dweud wrth y dynion oedd wedi bod yn ymladd yn y frwydr, “Dyma reol roddodd yr ARGLWYDD orchymyn i Moses i ni ei chadw:

²²Mae popeth sydd wedi ei wneud o aur, arian, pres, haearn, tin neu blwm

²³(popeth sydd ddim yn llosgi) i gael ei buro drwy dân, a bydd yn lân yn seremonïol, ond rhaid iddo gael ei daenellu gyda dŵr y puro hefyd. Mae popeth fyddai'n llosgi yn y tân i gael ei buro gyda'r dŵr yn unig.

²⁴Yna rhaid i chi olchi eich dillad ar y seithfed diwrnod. Wedyn byddwch chi'n lân yn seremonïol, a gallwch ddod yn ôl i mewn i'r gwersyll.”

²⁵Yna dyma'r ARGLWYDD yn dweud wrth Moses:

²⁶“Dw i eisiau i ti ac Eleasar yr offeiriad, a'r arweinwyr eraill, gyfri'r ysbail gafodd ei gasglu i gyd — yn ferched a phlant ac yn anifeiliaid.

²⁷Yna rhannu'r cwbl rhwng y dynion aeth i ymladd yn y frwydr, a gweddill pobl Israel.

²⁸Ond rhaid cymryd cyfran i'r ARGLWYDD o siâr y milwyr fuodd yn ymladd: Cyfran yr ARGLWYDD o'r caethion, y gwartheg, asynnod a defaid, fydd un o bob pum cant.

²⁹Mae hwn i'w gymryd o siâr y milwyr, a'i roi i Eleasar yr offeiriad i'w gyflwyno yn offrwm i'r ARGLWYDD.

³⁰Yna o'r hanner arall, sef siâr pobl Israel, rhaid cymryd un o bob hanner cant o'r caethion, y gwartheg, yr asynnod, a'r defaid. Un o bob hanner cant o'r anifeiliaid i gyd, i'w cyflwyno i'r Lefiaid sy'n gofalu am y Tabernacl i'r ARGLWYDD.”

³¹Felly dyma Moses ac Eleasar yr offeiriad yn gwneud yn union fel roedd yr ARGLWYDD wedi dweud wrth Moses.

³²A dyma swm yr ysbail roedd y dynion wedi ei gasglu: 675,000 o ddefaid,

³³72,000 o wartheg,

³⁴61,000 o asynnod,

³⁵a 32,000 o ferched ifanc oedd erioed wedi cysgu gyda dyn.

³⁶Siâr y dynion oedd wedi mynd i ymladd yn y rhyfel oedd: 337,500 o ddefaid

³⁷— 675 ohonyn nhw'n mynd i'r ARGLWYDD.

³⁸36,000 o wartheg — 72 ohonyn nhw i'r ARGLWYDD.

³⁹30,500 o asynnod — 61 ohonyn nhw i'r ARGLWYDD.

⁴⁰16,000 o ferched ifanc — 32 ohonyn nhw i'r ARGLWYDD.

⁴¹Felly dyma Moses yn rhoi'r siâr oedd i'w gyflwyno'n offrwm i'r ARGLWYDD i Eleasar yr offeiriad, yn union fel roedd yr ARGLWYDD wedi dweud wrtho.

⁴²A dyma oedd siâr pobl Israel, sef hanner arall yr ysbail:

⁴³675,000 o ddefaid,

⁴⁴36,000 o wartheg,

⁴⁵30,500 o asynnod,

⁴⁶a 16,000 o ferched ifanc.

⁴⁷A dyma Moses yn cymryd un o bob hanner cant o siâr pobl Israel, a'i roi i'r Lefiaid oedd yn gofalu am y Tabernacl i'r ARGLWYDD, yn union fel roedd yr ARGLWYDD wedi dweud wrtho.

⁴⁸Yna dyma'r swyddogion milwrol yn dod at Moses — capteiniaid yr unedau o fil ac o gant.

⁴⁹A dyma nhw'n dweud wrtho, “Mae dy weision wedi cyfri'r dynion fuodd yn ymladd yn y frwydr gyda ni. Dŷn ni wedi colli neb!

⁵⁰Felly dŷn ni wedi dod ag offrwm i'r ARGLWYDD o'r tlysau aur wnaethon ni eu casglu — breichledau, modrwyau, clustdlysau a chadwyni. Mae hyn i wneud pethau'n iawn rhyngon ni â Duw.”

⁵¹Dyma Moses ac Eleasar yn cymryd yr aur ganddyn nhw — pob math o dlysau cywrain.

⁵²Roedd yr aur i gyd, gafodd ei gyflwyno i'r ARGLWYDD gan y capteiniaid, yn pwyso bron ddau gan cilogram.

⁵³(Roedd pob un o'r dynion wedi cymryd peth o'r ysbail iddo'i hun.)

⁵⁴Felly dyma Moses ac Eleasar yr offeiriad yn derbyn yr aur gan y capteiniaid, ac yn mynd â'r cwbl i Babell Presenoldeb Duw i atgoffa'r ARGLWYDD o bobl Israel.