Read Gobaith i Gymru Numeri 34 Bible Online

Numeri 34 - Gobaith i Gymru bible

Numeri 34

¹Dyma'r ARGLWYDD yn dweud wrth Moses:

²“Dywed wrth bobl Israel: ‘Pan ewch i mewn i wlad Canaan, dyma'r ffiniau i'r tir dw i'n ei roi i chi i'w etifeddu:

³Bydd ffin y de yn mynd o anialwch Sin i'r ffin gydag Edom. Bydd yn ymestyn i'r dwyrain at ben isaf y Môr Marw. [26]

⁴Bydd yn mynd i'r de, heibio Bwlch Acrabbîm (sef Bwlch y Sgorpion), ymlaen i Sin ac yna i gyfeiriad Cadesh-barnea, ac wedyn i Chatsar-adar a throsodd i Atsmon.

⁵O'r fan honno bydd y ffin yn troi i ddilyn Wadi'r Aifft ac allan i Fôr y Canoldir.

⁶“‘Y Môr Mawr (sef Môr y Canoldir) fydd y ffin i'r gorllewin.

⁷“‘Bydd ffin y gogledd yn mynd o Fôr y Canoldir i Fynydd Hor,

⁸ac yna i Fwlch Chamath ac ymlaen i Sedad.

⁹Yna o Sedad ymlaen i Siffron, ac wedyn i Chatsar-einan. Dyna fydd ffin y gogledd.

¹⁰“‘Bydd ffin y dwyrain yn mynd i gyfeiriad y de o Chatsar-einan i Sheffam;

¹¹wedyn o Sheffam i Ribla sydd i'r dwyrain o Ain. Yna i lawr ochr ddwyreiniol Llyn Galilea,

¹²ac ar hyd Afon Iorddonen yr holl ffordd i'r Môr Marw. [27] Dyna fydd y ffiniau o gwmpas eich tir chi.’”

¹³A dyma Moses yn dweud wrth bobl Israel: “Dyma'r tir fydd yn cael ei rannu rhyngoch chi. Mae'r ARGLWYDD wedi dweud ei fod i gael ei roi i'r naw llwyth a hanner sydd ar ôl.

¹⁴Mae llwythau Reuben a Gad, a hanner llwyth Manasse wedi cael eu tir nhw.

¹⁵Maen nhw wedi cael tir yr ochr yma i'r Iorddonen, sef i'r dwyrain o Jericho.”

¹⁶Dyma'r ARGLWYDD yn dweud wrth Moses:

¹⁷“Dyma'r dynion fydd yn gyfrifol am rannu'r tir rhyngoch chi: Eleasar yr offeiriad a Josua fab Nwn.

¹⁸A rhaid i chi gymryd un arweinydd o bob llwyth i helpu gyda'r gwaith.”

¹⁹[19-28] Dyma enwau'r arweinwyr ddewisodd yr ARGLWYDD: [Arweinydd] — [Llwyth] Caleb fab Jeffwnne — Jwda Shemwel fab Amihwd — Simeon Elidad fab Cislon — Benjamin Bwcci fab Iogli — Dan Channiel fab Effod — Manasse Cemwel fab Shifftan — Effraim Elitsaffan fab Parnach — Sabulon Paltiel fab Assan — Issachar Achihwd fab Shelomi — Asher Pedahel fab Amihwd — Nafftali

²⁹Y rhain gafodd eu dewis gan yr ARGLWYDD i fod yn gyfrifol am rannu tir Canaan rhwng pobl Israel.