Read Gobaith i Gymru Micha 1 Bible Online

Micha 1 - Gobaith i Gymru bible

Micha 1

¹Dyma'r neges roddodd yr ARGLWYDD i Micha o Moresheth. [1] Roedd yn proffwydo pan oedd Jotham, Ahas, a Heseceia yn frenhinoedd ar Jwda. [2†] Dyma ddangosodd Duw iddo am Samaria a Jerwsalem. [3]

²Gwrandwch, chi bobl i gyd! Cymrwch sylw, bawb sy'n byw drwy'r byd! Mae'r ARGLWYDD, y Meistr, yn dyst yn eich erbyn; mae'n eich cyhuddo chi o'i deml sanctaidd.

³Edrychwch! Mae'r ARGLWYDD yn dod! Mae'n dod i lawr ac yn sathru'r mynyddoedd!

⁴Bydd y mynyddoedd yn dryllio dan ei draed, a'r dyffrynnoedd yn hollti. Bydd y creigiau'n toddi fel cwyr mewn tân, ac yn llifo fel dŵr ar y llethrau.

⁵Pam? Am fod Jacob wedi gwrthryfela, a pobl Israel wedi pechu. Sut mae Jacob wedi gwrthryfela? Samaria ydy'r drwg! Ble mae allorau paganaidd Jwda? Yn Jerwsalem!

⁶“Dw i'n mynd i droi Samaria yn bentwr o gerrig mewn cae agored — bydd yn lle i blannu gwinllannoedd! Dw i'n mynd i hyrddio ei waliau i'r dyffryn a gadael dim ond sylfeini'n y golwg.

⁷Bydd ei delwau'n cael eu dryllio, ei thâl am buteinio yn llosgi'n y tân, a'r eilunod metel yn bentwr o sgrap! Casglodd nhw gyda'i thâl am buteinio, [4] a byddan nhw'n troi'n dâl i buteiniaid eto.”

⁸Dyna pam dw i'n galaru a nadu, a cherdded heb sandalau ac mewn carpiau; yn udo'n uchel fel siacaliaid, a sgrechian cwyno fel cywion estrys.

⁹Fydd salwch Samaria ddim yn gwella! Mae wedi lledu i Jwda — mae hyd yn oed arweinwyr fy mhobl yn Jerwsalem wedi dal y clefyd!

¹⁰‛Peidiwch dweud am y peth yn Gath!‛ [5] Peidiwch crïo rhag iddyn nhw eich clywed! Bydd pobl Beth-leaffra [6] yn rholio yn y llwch.

¹¹Bydd pobl Shaffir yn pasio heibio yn noeth ac mewn cywilydd. Bydd pobl Saänan yn methu symud, a Beth-haetsel yn gwneud dim ond galaru — fydd hi ddim yn dy helpu eto.

¹²Bydd pobl Maroth [7] yn aflonydd wrth ddisgwyl am rywbeth gwell i ddigwydd na'r difrod mae'r ARGLWYDD wedi ei anfon, ac sy'n gwasgu ar giatiau Jerwsalem.

¹³Clymwch eich cerbydau wrth y ceffylau, bobl Lachish! [8] Chi wnaeth wrthryfela fel Israel ac arwain pobl Seion i bechu! [9]

¹⁴Bydd rhaid i chi ddweud ffarwél wrth Moresheth-gath, a bydd tai Achsib [10] yn siomi — bydd fel ffynnon wedi sychu i frenhinoedd Israel.

¹⁵Bobl Maresha, [11] bydd gelyn yn dod i goncro a dal eich tref, a bydd arweinwyr Israel yn ffoi i ogof Adwlam [12] eto.

¹⁶Felly, Jerwsalem, siafia dy ben i alaru am y plant rwyt ti'n dotio atyn nhw. Gwna dy dalcen yn foel fel y fwltur, am fod y gelyn yn mynd i'w cymryd nhw'n gaeth.