Read Gobaith i Gymru Micha 5 Bible Online

Micha 5 - Gobaith i Gymru bible

Micha 5

¹Ar hyn o bryd rwyt ti'n torri dy hun â chyllyll [24†] ti ddinas dan ymosodiad! Mae'r gelyn yn gwarchae [25] arnon ni! Maen nhw'n taro arweinydd Israel ar y foch gyda theyrnwialen.

²Ond wedyn ti, Bethlehem Effrata, [26†] rwyt ti'n un o'r pentrefi lleiaf pwysig yn Jwda. Ond ohonot ti y daw un fydd yn teyrnasu yn Israel — Un sydd â'i wreiddiau yn mynd yn ôl i'r dechrau yn y gorffennol pell.

³Felly bydd yr ARGLWYDD yn rhoi pobl Israel i'r gelyn, hyd nes bydd yr un sy'n cael y babi wedi geni'r plentyn. Wedyn bydd gweddill ei deulu yn dod adre at blant Israel.

⁴Bydd yn codi i arwain ei bobl fel bugail yn gofalu am ei braidd. Bydd yn gwneud hyn yn nerth yr ARGLWYDD a gydag awdurdod yr ARGLWYDD ei Dduw. Byddan nhw yno i aros, achos bydd e'n cael ei anrhydeddu gan bawb i ben draw'r byd.

⁵Bydd e'n dod â heddwch i ni. Os bydd Asyria'n ymosod ar ein tir ac yn ceisio mynd i mewn i'n plastai, bydd digon o arweinwyr i'w rhwystro!

⁶Byddan nhw'n rheoli Asyria gyda'r cleddyf; gwlad Nimrod [27] gyda llafnau parod! Bydd ein brenin yn ein hachub pan fydd Asyria'n ymosod ar ein gwlad, ac yn ceisio croesi ein ffiniau.

⁷Bydd pobl Jacob [28] sydd ar ôl ar wasgar yng nghanol y bobloedd, fel y gwlith mae'r ARGLWYDD yn ei anfon, neu gawodydd o law ar laswellt — sydd ddim yn dibynnu ar bobl na disgwyl am eu caniatâd cyn dod.

⁸Bydd pobl Jacob sydd ar ôl yn byw yn y gwledydd, ar wasgar yng nghanol y bobloedd. Byddan nhw fel llew yng nghanol yr anifeiliaid gwylltion, neu lew ifanc yng nghanol praidd o ddefaid — yn rhydd i ladd a rhwygo heb neb i'w stopio.

⁹Byddi'n codi dy law i daro'r rhai sy'n dy erbyn, a dinistrio dy elynion i gyd!

¹⁰“Bryd hynny,” meddai'r ARGLWYDD, “bydda i'n cael gwared â'ch arfau i gyd — y ceffylau a'r cerbydau rhyfel. [29†]

¹¹Bydda i'n dinistrio trefi'r wlad ac yn bwrw i lawr y caerau amddiffynnol.

¹²Bydda i'n stopio eich dewino a'ch swynion, a fydd neb ar ôl i ddweud ffortiwn.

¹³Bydda i'n dinistrio eich delwau cerfiedig a'ch colofnau cysegredig. Fyddwch chi byth eto yn plygu i addoli gwaith eich dwylo eich hunain. [30†]

¹⁴Bydda i'n diwreiddio polion y dduwies Ashera, [31] ac yn dinistrio eich eilun-dduwiau.

¹⁵Bydda i'n dial yn wyllt ar y gwledydd sy'n gwrthod gwrando arna i.”